ޚަބަރު
މަދަނީ ޖަމްޢިއްޔާތައް ބާރުވެރިކުރުމަށް ކުޅުދުއްފުށީގައި ޕްރޮގްރާމެއް ހިންގައިފި

ކުޅުދުއްފުށީގައި ކުރިޔަށްގެންދިޔަ ވޯކްޝޮޕް---
ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާއިން މަދަނީ ޖަމްޢިއްޔާތައް ބާރުވެރިކުރުވުމަށް ކުޅުދުއްފުށީގައި ކުރިޔަށްގެންދިޔަ ޕްރޮޖެކްޓް މެނޭޖުމަންޓް ވޯކްޝޮޕް ކާމިޔާބުކަމާއެކު ނިންމާލައިފިއެވެ.
ޒުވާނުންނާ ބެހޭ ވުޒާރާއިން ހާމަކޮށްފައިވާ ގޮތުގައި މި ވޯކްޝޮޕަކީ ކުޅުދުއްފުށީގެ މަދަނީ ޖަމްއިއްޔާތަކާއި، ކައުންސިލް، ޑަބްލިޔުޑީސީ އަދި އެކިއެކި މުއައްސަސާތަކަށް އަމާޒުކޮށްގެން ކުރިޔަށް ގެންދިޔަ ވޯކްޝޮޕެކެވެ.
މި މަހުގެ 14 އިން 15 އަށް ކުރިޔަށް ގެންދިޔަ މި ވޯކްޝޮޕްގައި އެ ރަށުގެ 17 ޒުވާނަކު ވަނީ ބައިވެރިވެފައެވެ.
ރަށްރަށުގައި ޤާއިމްވެފައި ތިބޭ މަދަނީ ޖަމްޢިއްޔާތައް ބާރުވެރިކުރުވުމަކީ މި ޕްރޮގްރާމުގެ އަމާޒެއްކަމަށް ޒުވާނުންނާ ބެހޭ ވުޒާރާއިން ވަނީ ހާމަކޮށްފައެވެ. އެގޮތުން މި ޕްރޮގްރާމުން ފޯރުކޮށްދިން ޢިލްމާއެކު، އިޖްތިމާއީ ގޮތުން މުޖުތަމަޢު ބާރުވެރި ކުރުވުމަށް ރަށުފެންވަރުގައި ހިންގޭ ޕްރޮގްރާމްތަކާއި ހަރަކާތްތައް ކުރިއަށް ގެންދިއުމުގައި ޖަމްޢިއްޔާތަކުގެ އިދާރީ ހިންގުން ހަރުދަނާ ކުރެވިގެން ދާނެކަމަށް އެ ވުޒާރާއިން ހާމަކޮށްފައިވެއެވެ.
މީގެ އިތުރުން މަދަނީ ޖަމްއިއްޔާތަކުގެ ޤަވާއިދާއި ޤާނޫނަށް އަހުލުވެރިކުރުމާއި، ރަށްރަށުގެ މުޖުތަމަޢުތައް އެއްބައްވަންތަ ކުރުމަކީ ވެސް މި ޕްރޮގްރާމުގެ އަމާޒެކެވެ.
ރާއްޖޭގެ ގިނަ ރަށްރަށުގައި މަދަނީ ޖަމްޢިއްޔާތައް އުފައްދާފައި އޮވެއެވެ. ނަމަވެސް މީގެ ތެރެއިން ގިނަ ޖަމްޢިއްޔާތަކކަށް، ދެމެހެއްޓެނިވި ގޮތެއްގައި ތަފާތު ޕްރޮގްރާމުތައް ހިންގުމަށް އޮންނަނީ ދަތި ކަމަކަށް ވެފައެވެ. މިކަމުގެ އެއް ސަބަބަކީ އިދާރީ ހިންގުމަށް އަންނަންޖެހޭ ބަދަލުތައް ޖަމްޢިއްޔާތަކަށް ނުގެނެވުމެވެ. މީގެއިތުރުން މުޖުއަމަޢުގެ އިތުރު ބަޔަކު އެ ޖަމްޢިއްޔާތައް ހިންގުމުގައި ޝާމިލު ނުކުރުވުން ވެސް އެއީ މިކަމުގެ ސަބަބެއް ކަމުގައި ބެލެވެއެވެ. އެހެންކަމުން ޖަމްޢިއްޔާތަކަށް ހިންގޭ މިފަދަ ޕްރޮގްރާމުތަކާއެކު، އެ ޖަމްޢިއްޔާތަކުގެ ހިންގުނު ހަރުދަނާ ވެގެންދާނެކަމަށް ބެލެވެއެވެ.