ސައުތު ކޮރެއާގައި ޑީޕްސީކް ޑައުންލޯޑުނުކުރެވޭ ގޮތް ހަދައިފި

ސައުތު ކޮރެއާގައި ޗައިނާގ ޑީޕްސީކް އެޕްލިކޭޝަން ޑައުންލޯޑުނުކުރެވޭ ގޮތް ހަދައިފިއެވެ. 

ސައުތު ކޮރެއާގެ ޑޭޓާ ޕްރޮޓެކްޝަން އޮތޯރިޓީން ހާމަކޮށްފައިވާ ގޮތުގައި އެ ޤައުމުގައި މި އެޕްލިކޭޝަން ޑައުންލޯޑުކުރުން މަނާކުރީ، އެ އެޕްލިކޭޝަންގައި ޒާތީ މަޢުލޫމާތު ރައްކާކުރުމާ ގުޅޭ ޤަވާއިދު އެކުލަވާލާފައިވާ ގޮތުން، މި މަޢުލޫމާތު ރަނގަޅަށް ރައްކާނުކުރެވޭނެކަމަށް ޤަބޫލުކުރެވޭތީ ކަމަށެވެ.

ސައުތު ކޮރެއާގެ ޕާސަނަލް އިންފޮމޭޝަން ޕްރޮޓެކްޝަން ކޮމިޝަން (ޕީއައިޕީސީ) އިން ބުނީ، އެ އެޕްލިކޭޝަންގެ ޒާތީ މަޢުލޫމާތާ ގުޅޭ ޤަވާއިދު ބަދަލުކުރުމުން، އެ ޤައުމުގައި އެޕްލިކޭޝަން ޑައުންލޯޑުކުރެވޭނެ ގޮތް ހަދާނެކަމަށެވެ.

އެ ޤައުމުގައި ހޮނިހިރު ދުވަހު މި ނިންމުމަށް ޢަމަލުކުރަން ފަށާފައިވާއިރު، އަލަށް އެޕްލިކޭޝަން ޑައުންލޯޑު ނުކުރެވުނަސް، ޑީޕްސީކްގެ ވެބް ޚިދުމަތް ސަސްޕެންޑުކޮށްފައެއް ނުވެއެވެ.

ސައުތު ކޮރެއާގެ އިތުރުން، އިޓަލީގައި ވަނީ މިދިޔަ މަހުން ފެށިގެން ޑީޕްސީކްގެ ޗެޓްބޮޓް ބްލޮކްކޮށްފައެވެ. އެ ޤައުމުން ވެސް ހާމަކުރީ، މިއީ ޒާތީ މަޢުލޫމާތު ރައްކާތެރިކުރުމާ ގުޅޭ ގޮތުން ނިންމިނިންމުމެއް ކަމަށެވެ. 

2023 ވަނަ އަހަރުގެ ފަހުކޮޅު އުފެދުނު ޑީޕްސީކް ކުންފުނިން ތަރައްޤީކޮށްފައިވާ އާރް1 އަކީ އޯޕަން އޭއައި، މެޓާ އަދި ގޫގުލްގެ އޭއައި މޮޑެލްތަކާ އެއްފެންވަރުގެ ޤާބިލުކަން  ހުރި މޮޑެލެއްކަމަށް ބެލެވެއެވެ. 

ޑީޕްސީކްގެ މި ކާމިޔާބީއަކީ އެމެރިކާގެ ޓެކްނޮލޮޖީ ދާއިރާއަށް ބޮޑު ނުރައްކަލެއް ކަމަށް ބެލެވެއެވެ. އެމެރިކާއިން ޗައިނާއަށް ހައި-ޕަވަރ އޭއައި ޗިޕްތައް އެކްސްޕޯޓްކުރުން މަނާކޮށްފައި ވީނަމަވެސް، ޑީޕްސީކްއަށް މި ކުރިއެރުން ހޯދިފައިވަނީ ނިސްބަތުން ދަށް ފެންވަރުގެ ޗިޕްތަކެއް ބޭނުންކޮށްގެންނެވެ. މިކަމުގެ ސަބަބުން އެމެރިކާގެ ޓެކްނޮލޮޖީ ދާއިރާގެ އިސްވެރިން ކަންބޮޑުވުން ފާޅުކޮށްފައިވެއެވެ.