ޚަބަރު
އިސްރަށްވެހިންގެ ނާދީއަށް އެއް އަހަރު ފުރުން ކުލަގަދަކޮށް ފާހަގަކޮށްފި

އިސްރަށްވެހިންގެ ނާދީގެ އަހަރީ ދުވަސް ފާހަގަކުރުން/ ފޮޓޯ
މާލޭގައި ޤާއިމުކޮށްފައިވާ އިސްރަށްވެހީންގެ ނާދީއަށް އެއް އަހަރު ފުރި، އަހަރީ ދުވަސް ވަރަށް ކުލަ ގަދަކޮށް ފާހަގަ ކޮށްފިއެވެ.
އިސްރަށްވެހީންގެ އަހަރީ ދުވަހުގެ ރަސްމިއްޔާތު، ރައީސުލްޖުމްހޫރިއްޔާގެ އަނބިކަންބަލުން މެޑަމް ސާޖިދާ މުޙައްމަދު ޝަރަފުވެރިކޮށްދެއްވާފައި ވާއިރު، މި ރަސްމިއްޔާތުގައި އިޖުތިމާޢި އަދި ޢާއިލީ ތަރައްޤީއާ ބެހޭ ވަޒީރު ޑރ. އައިޝަތު ޝިހާމް ވެސް ބައިވެރިވެވަޑައިގެންފައި ވެއެވެ.
އޯގާތެރި މުޖުތަމަޢެއް ބިނާކުރުމަށް ޑރ. މުޙައްމަދު މުޢިއްޒު ގެންގުޅުއްވާ ސިޔާސަތުގެ ތެރެއިން ބިނާކުރެވިފައިވާ އިސްރަށްވެހީންގެ ނާދީ އަކީ، އިސްރަށްވެހިންގެ ޖިސްމާނީ، ނަފްސާނީ އަދި އިޖްތިމާޢީ ދުޅަހެޔޮކަން ކަށަވަރުކުރުމަށް އިންތިޒާމުކުރެވިގެން ތަފާތު ހަރަކާތްތަކެއް ކުރިއަށް ގެންދެވޭނެ މަރުކަޒުތަކެއް ޤާއިމްކުރުމަށް އެމަނިކުފާނު ވެލެއްވި ވަޢުދުފުޅާއި އެއްގޮތަށް ހުޅުވުނު ފުރަތަމަ އިސްރަށްވެހިންގެ އިޖްތިމާޢީ މަރުކަޒެވެ.
ލުއި ކަސްރަތު ޕްރޮގްރާމްތަކާއި، މިންހެޔޮ ކާނާ ތައްޔާރުކުރާނެ ގޮތްތައް ދަސްކޮށްދިނުމާއި، ހެލްތު ސްކްރީނިން ޕްރޮގްރާމުތަކާއި، ޑިމެންޝިއާ ސްކްރީނިން، އަދި ސިއްހީ ތަފާތު މައުލޫތަކަށް ހޭލުންތެރިކުރުމުގެ ޕްރޮގްރާމުތައް ފާއިތުވި އަހަރު ތެރޭގައި މި އިސްރަށްވެހީންގެ ނާދީގައި ވަނީ ހިންގިފައެވެ. ހަމައެހެންމެ، އިސްރަށްވެހީންގެ އިޖުތިމާޢީ ދުޅަހެޔޮކަން ކަށަވަރުކުރުމަށްޓަކައި، ގާޑަނިން އާއި، ޅެންވެރިކަމާއި ގުޅޭ ކްލާސްތަކާއި، މުޙިންމު ދުވަސްތައް ފާހަގަކުރުމާއި، އައުޓް ޑޯ ހަރަކާތްތައް ހިމެނޭހެން ގިނަ ހަރަކާތްތަކެއް ފާއިތުވި އަހަރުތެރޭގައި ކުރިއަށް ގެންދެވިފައިވެއެވެ.
އިސްރަށްވެހީންގެ މަޢުލޫމާތު މުއްސަންދިކޮށް ހޭލުންތެރިކަން އިތުރުކުރުމަށްޓަކައި، ދީނީ ހޭލުންތެރިކަން އިތުރުކުރުމާއި، ޢާންމު މަޢުލޫމާތު މުއްސަނދިކުރުމާއި، ޑިޖިޓަލް މަންސަތަކަށް އަހުލުވެރިކުރުމާއި، ސައިބާ ސްކޭމްތަކުން ރައްކާތެރިވާނެ ގޮތްތަކާއި ގުޅޭ މުހިންމު ސެޝަންތަކެއް، މި ނާދީގެ ތެރޭގައި ކުރިއަށްގެންދެވިފައި ވެއެވެ.
ފާހަގަކުރެވިގެން ދިޔަ އިސްރަށްވެހީންގެ ނާދީގެ އަހަރީ ދުވަހުގެ ތެރެއިން 'އިސްރަށްވެހިންގެ ނާދީ މެމްބަޝިޕް ކާޑު' ތަޢާރަފްވެގެން ދިޔުމަކީ، އެ ނާދީއަށް ލިބިގެން ދިޔަ އިތުރު ކުރިއެރުމަކާއި، ފުރިހަމަކަމެކެވެ. މިގޮތުން، އިސްރަށްވެހިންގެ ނާދީގައި ރަޖިސްޓާވާ 55 އަހަރުން މަތީގެ ކޮންމެ ބޭފުޅަކަށް މި ކާޑު ލިބިގެންދާނެއެވެ. އަދި މި ކާޑުގެ ބޭނުން ހިއްޕަވައިގެން އިސްރަށްވެހިންގެ ނާދީއާއި ޕާޓްނާ ކްލިނިކްތަކުން ޑޮކްޓަރަށް ދެއްކުމާއި، އެޕޮއިންޓްމެންޓް ހޯދުމުގައި ފަހި ގޮތްތަކެއް ހަމަޖެއްސުމާއި، ފިހާރަތަކުން ޑިސްކައުންޓް ލިބުންފަދަ ފައިދާތައް ވެސް ލިބިގެންދާނެ އެވެ.
މި ކާޑަކީ ޕެންޝަން އޮފީހުގެ އެހީތެރިކަމާއެކު ތައްޔާރުކޮށްފައިވާ ކާޑެކެވެ.