ޙައްޖުވެރިންގެ ދަތުރުތަކުގެ އިންތިޒާމް ހަމަޖެއްސުމަށް އައިލެންޑް އޭވިއޭޝަނާއި އެކު އެއްބަސްވުމެއްގައި ސޮއިކޮށްފި

ރާއްޖެއިން މި އަހަރު ހައްޖައްދާ 500 މީހުން ޤައުމީ އެއާރލްއިން މޯލްޑިވިއަނުން ދަތުރުކުރުމަށް ނިންމާފައިވާކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެއެވެ. ވަޒީރު މިހެން ވިދާޅުވެފައި ވަނީ، ހައްޖާޖީންގެ ދަތުރުތަކާ ގުޅިގެން އައިލެންޑް އޭވިއާޝަނާއި، މޯލްޑިވްސް ހައްޖުކޯޕަރޭޝަންއާ ދެމެދު ވެވިގެންދިޔަ އެއްބަސްވުމަކާ ގުޅިގެންނެވެ. 

މި އެއްބަސްވުމުގައި ޙައްޖު ކޯޕަރޭޝަންގެ ފަރާތުން ސޮއިކުރަށްވާފައި ވަނީ، މެނޭޖިންގ ޑިރެކްޓަރ މުޙައްމަދު ޝަކީލެވެ. އަދި އައިލެންޑް އޭވިއޭޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އިބްރާހިމް އިޔާޒެވެ.

އެހެން ޤައުމުތަކުގައި ވަރަށް ބޮޑު އަހަންމިއްޔަތުކަމެއްދޭކަމެއް ޙައްޖުވެރިން ޤައުމީ އެއަރލައިންތަކުގައި ދަތުރުކުރުން. ރާއްޖޭގައި މިދިޔަ ދުވަސްތަކުގައި އެ ފުރުސަތު ނެތީމަ ބޭރުގެ އެއަރލައިންތައް ޗާޓަރކުރަމުން ދަނީ. އަޅުގަނޑުމެންގެ މުސްތަޤްބަލްގެ އަމާޒަކީ ރާއްޖޭގެ ހައްޖުވެރިންގެ %100 ރާއްޖޭގެ ގައުމީ އެއަރލައިންގައި އުފުލުން. އެކަމަކު މިއަހަރު އަޅުގަނޑުމެން މަސައްކަތް ކުރަމުން މިދަނީ %50 ގައުމީ އެއަރލައިންގައި ދަތުރުކުރުމަށް.

ވަޒީރު ވިދާޅުވިއެވެ.

މި ރަސްމިއްޔާތުގައި އައިލެންޑް އޭވިއޭޝަންގެ މެނޭޖިން ޑިރެކްޓަރ އިބްރާހިމް އިޔާޒާއި، ޙައްޖު ކޯޕަރޭޝަންގެ މެނޭޖިންގ ޑިރެކްޓާރ މުޙައްމަދު ޝަކީލް ވެސް ވާހަކަފުޅު ދައްކަވާފައިވެއެވެ. 

މި ކަމަކީ އަޅުގަނޑުމެންނަށް ލިބިގެންދިޔަ ވަރަށް ބޮޑު އުފަލެއް އަދި ޝަރަފެއް. އެއީ ގައުމީ އެއަރލައިންގައި ހައްޖާޖީން އުފުލަން ފުރުސަތު ލިބިގެން ދިއުމަކީ. މިކަން މި ފަހިވެގެންދިޔައީ ރައީސުލްޖުމްހޫރިއްޔާގެ އިސްނެންގެވުމުގެ ސަބަބުން ޤައުމީ އެއަރލައިންއަށް ވައިޑް-ބޮޑީ އެއަރކްރާފްޓް މި ޖަނަވަރީ މަހު ތައާރަފްކުރެވި ވަނީ ދުރު މަންޒިލްތަކަށް ދަތުރުކުރަން ފެށިފައި.

އިޔާޒް ވިދާޅުވިއެވެ.

ދިވެހި ޙައްޖުވެރިން އަޅުގަނޑުމެން ސައުދީއަށް މިގެންދާ ކޯޓާގެ %50 އެއީ 500 ޙައްޖުވެރިން ސައުދީއަށް ގެންދިއުމުގެ ތެރޭގައިވެސް އަޅުގަނޑުމެންގެ ޚަރަދު ގާތްގަނޑަކަށް 3.6 މިލިޔަން ރުފިޔާ ޚަރަދު ކުޑަވެގެން އެބަދޭ އެހެންނޫނިއްޔާ އަޅުގަނޑުމެން ޓްރާންސްޕޯޓަށް މިކުރާ ޚަރަދަށް ބަލާއިރު. އެހެންވީމަ އަޅުގަނޑުމެންގެ އުންމީދަކީ ކުރިއަށްއޮތް ތަނުގައި ހުރިހައި ހައްޖުވެރިންވެސް ހަމަ މޯލްޑިވިއަންގެ ފްލައިޓްގައި ސައުދީ އަރަބިއްޔާއަށް ގެންދިއުން.

ޝަކީލް ވިދާޅުވިއެވެ.