ޚަބަރު
އެމްއެންޔޫގެ ދެ ފެކަލްޓީއަކަށް އައު އިސްވެރިން ޢައްޔަނުކުރަށްވައިފި

ރާއްޖޭގެ ޤައުމީ ޔުނިވާރސިޓީ/ ފޮޓޯ: ރާއްޖޭގެ ޤައުމީ ޔުނިވާރސިޓީގެ ރަސްމީ ވެބްސައިޓް
ޤައުމީ ޔުނިވަރސިޓީ، މޯލްޑިވްސް ނޭޝަނަލް ޔުނިވާސިޓީ، އެމްއެންޔޫގެ ފެކަލްޓީ އޮފް ޝަރީއާ އެންޑް ލޯގެ ޑީން އަދި ސެންޓަރ ފޯ އެޑިޔުކޭޝަނަލް ޓެކްނޮލޮޖީ އެންޑް އެކްސެލެންސްގެ އިސްވެރިޔާގެ މަޤާމު ހަވާލުކުރުމަށް މިއަދު ވަނީ ހާއްސަ ރަސްމިޔާތެއް ބާއްވާފައެވެ.
ފެކަލްޓީ އޮފް ޝަރީޢާ އެންޑް ލޯގެ އައު ޑީންއަކަށް ޑރ. ޢަބުދުލް ސައްތާރު އަބްދުލް ރަޙްމާން އައްޔަންކުރައްވާފައި ވާއިރު، ސެންޓަރ ފޯ އެޑިޔުކޭޝަނަލް ޓެކްނޮލޮޖީ އެންޑް އެކްސެލެންސް އިސްވެރިޔާގެ މަގާމަށް އައްޔަންކޮށްފައިވަނީ ރޯޒާ އިބްރާހިމެވެ.
ޑރ. އަބުދުލް ސައްތާރު އަބްދުލް ރަޙްމާނަކީ، ދިވެހިރާއްޖޭގެ ޤައުމީ ޔުނިވާސިޓީއާ ގުޅިވަޑައިގަތީ 2004 ވަނަ އަހަރުއެވެ. ތަޢުލީމީ ދާއިރާގައި ކުރައްވާފައިވާ ޚިދުމަތްތަކުގެ އިތުރުން މުޖުތަމަޢުގައި ދިނީ ހޭލުންތެރިކަން އިތުރުކުރުމަށް، ދީނީ ފޮތްތައް ދިވެހިބަހުން ދަރިވަރުންނާއި މުޖުތަމަޢާ ހިސާބަށް ގެނައުމުގެ ގޮތުން ޑރ. އަބުދުލް ސައްތާރު ގިނަ މަސައްކަތްތަކެއް ކޮށްފައިވާކަން އެމްއެންޔޫއިން ވަނީ ފާހަގަކުރައްވައެވެ.
ސެންޓަރ ފޯ އެޑިޔުކޭޝަނަލް ޓެކްނޮލޮޖީ އެންޑް އެކްސެލެންސް އިސްވެރިޔާގެ މަގާމަށް އައްޔަނުކޮށްފައިވާ ރޯޒާ އިބްރާހިމް ދިވެހިރާއްޖޭގެ ޤައުމީ ޔުނިވާސިޓީއާ ގުޅިވަޑައިގަތީ 2005 ވަނަ އަހަރުއެވެ. އެމްއެންޔޫއިން ވިދާޅުވީ ރޯޒާ އިބްރާހިމް ވަނީ ސެންޓަރ ކުރިއެރުވުމަށް ވަރަށް ގިނަގުނަ މަސައްކަތްތަކެއް ކުރައްވާފައިކަމަށެވެ. އެގޮތުން 2023 ވަނަ އަހަރުން ފެށިގެން މިއަދާ ހަމައަށް އެކްޓިންގ ވެރިޔާކަމުގައި ސެންޓަރ ތަމްސީލުކޮށް ޔުނިވާސިޓީ ކޯސްތަކުގެ އިންސްޓުރަކްޝަން މަސައްކަތް ކުރިއަރުވާ އަގުހުރި މަސައްކަތް ތަކެއް ކުރައްވާފައިވާކަމަށް ވެސް އެމްއެންޔޫއިން ވިދާޅުވެއެވެ.