ޚަބަރު
ޤާނޫނުތަކަށް އަންނަ ބަދަލުތަކަށް ހޭލުންތެރިވުން ވަރަށް މުހިންމު: އުއްތަމަ ފަނޑިޔާރު

އުއްތަމަފަނޑިޔާރު އަލްއުސްތާޛު އަޙުމަދު މުޢުތަސިމް އަދުނާން - ފޮޓޯ: ބާކައުންސިލް

ފަރުދުން
18 ފެބްރުއަރީ 2025، 06:25
18 ފެބްރުއަރީ 2025، 06:25
ރާއްޖެ އަށް އަންނަ ބަދަލާއި ތަރައްޤީއާއެކު، ކުރިއަރައިގެންދާ ބަޔަކަށް ވާންޖެހޭ ކަމަށާއި އޭގެ ތެރޭގައި ޤާނޫނުތަކަށް އަންނަ ބަދަލުތަކަށް ހޭލުންތެރިވުމަކީ މުހިންމު ކަމެއްކަމަށް އުއްތަމަފަނޑިޔާރު އަލްއުސްތާޛު އަޙުމަދު މުޢުތަސިމް އަދުނާން ވިދާޅުވެއްޖެއެވެ.
ޤާނޫނީ ވަކީލުކަމާ އަލަށް ގުޅުނު ވަކީލުން ހުވާކުރަން މިއަދު ހަވީރު ބޭއްވި ރަސްމިއްޔާތުގައި އުއްތަމަ ފަނޑިޔާރު ވިދާޅުވީ، މި ދާއިރާގައި އެ މަނިކުފާނު މަސައްކަތް ކުރައްވާތާ 32 އަހަރު ވެގެން ދިޔައިރު އޭރާއި މިހާރު ކަންކަން އިންތިޒާމުވެފައިވާ ގޮތް ވަރަށް ތަފާތު ކަމަށެެވެ. އެހެންކަމުން ޤާނޫނަށް ގެންނަ ބަދަލުތަކާއި، ދާއިރާއަށް އަންނަ ކުރިއެރުންތަކަށް ޤާނޫނީ ވަކީލުން ވަރަށް ބޮޑަށް ފަރިތަވުމަށް އުއްތަމަފަނޑިޔާރު ވަނީ ގޮވާލައްވާފައެވެ. އަދި އެ މަގުން ދެވިއްޖެ ނަމަ ވަކީލުންނަށް މި ދާއިރާގައި ކުރިއެރުމާއި ބާއްޖަވެރިކަން ލިބޭނެކަމަށް އުއްތަމަ ފަނޑިޔާރު ވިދާޅުވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެ މަނިކުފާނު ވަނީ އަލަށް ހުވާ ކުރެއްވި ފަރާތްތަކަށް ނަޞޭޙަތްތެރިވެ، އެ މަނިކުފާނުގެ ތަޖުރިބާ ހިއްސާ ކުރައްވާފައެވެ. އެގޮތުން އެމަނިކުފާނަށް މި ދާއިރާއިން ލިބިވަޑައިގެންނެވި އެންމެ މުހިންމު އެއް ނަސޭހަތަކީ ވަކީލުންނަކީ ސިއްރު ހިފަހައްޓަން ޖެހޭ ބައެއްކަމުގެ ނަސޭޙަތްކަމަށާއި އަލަށް ހުވާކުރެއްވި ފަރާތްތަކަށްވެސް މި ނަޞޭޙަތް ދެއްވާ ކަމަށެވެ.
ޤާނޫނީ ފަންނުގެ ޤާނޫނުގެ ދަށުން އަލަށް 37 ފަރާތެއް ވަނީ ޤާނޫނީ ވަކީލުކަމުގެ ހުވާކޮށްފައެވެ. މިއާއެކު އައު ޤާނޫނުގެ ދަށުން މިހާތަނަށް 448 ފަރާތެއް މިވަނީ ވަކީލުންގެ ހުވާކޮށްފައެވެ.