ޑރ ޝަހީމް އިމާމުވެ ތަރާވީޙް ނަމާދު ކުރައްވާނީ ހުޅުމާލެ ރަޝީދު މިސްކިތުގައި

މި އަހަރުގެ ރަމަޟާން މަހުގައި ޑރ. މުޙައްމަދު ޝަހީމް ޢަލީ ސަޢީދު އިމާމުވެ ތަރާވީޙް ނަމާދު ކުރައްވާނީ ހުޅުމާލޭ ރަޝީދު މިސްކިތުގައިކަމަށް އެ މަނިކުފާނު ވިދާޅުވެއްޖެއެވެ.

އިސްލާމީ ކަންތައްތަަކާ ބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދަކީ ރާއްޖޭގެ އެންމެ އިސް ދީނީ ޢިލްމުވެރިންގެ ތެރެއިން ބޭފުޅެކެވެ. ވަޒީރު ވަނީ ފާއިތުވި އަހަރުތަކުގައިވެސް ރާއްޖޭގެ އެކި މިސްކިތްތަކުގައި އިމާމުވެ ތަރާވީޙް ނަމާދު ކުރައްވާފައެވެ. އެހެން ނަމަވެސް ފާއިތުވީ 2-3 އަހަރުގައި ޝަހީމް އިމާމުވެ ތަރާވީޙް ކުރައްވާފައިވަނީ ހުޅުމާލޭ ރަޝީދު މިސްކިތުގައެވެ.

ރަޝީދު މިސްކިތުގައި އާންމު ގޮތެއްގައި ތަރާވީޙް ނަމާދު ކުރަނީ 8 ރަކުޢަތަށެވެ. ޑރ ޝަޙީމްއަކީ ގިނަ ބައެއްގެ މަޤުބޫލުކަން ލިބިފައިވާ ބޭފުޅެކެވެ. މި އަހަރުގެ ރަމަޟާންމަހު އިސްލާމީ މަރުކަޒުގައި އިމާމްވެ ތަރާވީޙު ނަމާދާއި ދަމު ނަމާދު ކުރުމަށްވެސް ޒުވާން ޓީމެއް ވަނީ ކަނޑައަޅާފައެވެ. އެގޮތުން އިސްލާމީ މަރުކަޒުގައި ރޯދަ މަހު އިމާމުވެ ތަރާވީސް ކުރައްވާނީ، މަރުކަޒުގެ އިމާމު އައްޝައިޚު އަލްޙާފިޒު ސަލްމާން މުޙައްމަދު ލަޠީފާއި، އަލްޙާފިޒް ޢުވައިސް ބިން އިނާޒް، އަލްޙާފިޒް ޚިޟްރު ބިން ޢިމާދުގެ އިތުރުން އައްޝައިޚު އަލްޙާފިޒް ސުލްޠާން މުޙައްމަދު ލަޠީފާއި މި ހަތަރު ބޭފުޅުންނެވެ. މީގެ އިތުރުން ސަލްމާން މިސްކިތުގައިވެސް އިމާމުވެ ތަރާވީޙު ނަމާދު ކުރުމަށް ޚާއްޞަ ޓީމެއް ވަނީ ކަނޑައަޅާފައެވެ.