ޑެލްޓާ މަތިންދާބޯޓެއް ވެއްޓި ރަންވޭގައި ބޯޓު އެކޮޅުކޮޅުން ޖެހިއްޖެ

ކެނެޑާގެ ޓޮރޮންޓޯ ޕިއަރސަން އިންޓަރނޭޝަނަލް އެއަރޕޯޓުގައި ޑެލްޓާ މަތިންދާބޯޓެއް ވެއްޓުނު ހާދިސާއެއްގައި މަދުވެގެން 18 މީހުން ޒަޚަމްވެއްޖެކަމަށް އެ އެއަރޕޯޓުގެ ފަޔަރ ޗީފް ޓޮޑް އެއިޓްކެން ހާމަކޮށްފިއެވެ. މިނިއަޕޮލިސްއިން އައި ޑެލްޓާ އެއަރލައިންސްގެ ފްލައިޓުގައި 80 މީހުން ތިބިއިރު، ބޯޓު ވަނީ ރަންވޭގައި އެކޮޅުކޮޅުންޖެހިފައެވެ. މި ހާދިސާ ހިނގި ވަގުތު ބޯޓުގެ ތެރޭގައި ތިބި މީހުން ވަނީ އެކޮޅުކޮޅުން ޖެހުމުގެ ސަބަބުން ބޯޓު ދަށުން ސަލާމަތްވާން މަސައްކަތްކުރަން ޖެހިފައެވެ.

އެއަރޕޯޓުގެ ސީއީއޯ ޑެބޯރާ ފްލިންޓް ވަނީ މި ހާދިސާގައި އެއްވެސް މީހަކު މަރުނުވުމަކީ ކުއްލި އެހީތެރިކަން ދޭން މަސައްކަތްކުރި ފަރާތްތަކުގެ މަސައްކަތުގެ ނަތީޖާއެއް ކަމުގައި ބުނެފައެވެ. ނަމަވެސް، މި ހާދިސާގެ ސަބަބުން ތަޙުޤީޤުކުރުމަށް ދެ ރަންވޭ އެތައް ދުވަހަކަށް ބަންދުކުރަން ޖެހޭނެ ކަމަށް އޭނާ ވަނީ ބުނެފައެވެ.

މި ހާދިސާ ހިނގާފައިވަނީ ވޮޝިންގްޓަން ޑީސީގެ ރީގަން ނޭޝަނަލް އެއަރޕޯޓަށް ޖައްސަން އުޅުނު އެމެރިކަން އެއަރލައިންސްގެ މަތިންދާބޯޓަކާއި ޔޫއެސް އާމީގެ ބްލެކް ހޯކް ހެލިކޮޕްޓަރަކާ ޖެހުނު ހާދިސާގެ ތިން ހަފްތާއެއްހާ ދުވަސް ފަހުންނެވެ. އަދި މީގެ ކުރިން ޑިސެމްބަރު މަހު ޖެޖޫ އެއަރ އަދި އަޒަރުބައިޖާން އެއަރލައިންސް ބޯޓުވެއްޓީ ވަނީ ހާދިސާތަކެއް ހިނގާފައެވެ.

ހޯމަ ދުވަހު ބޭއްވުނު ނޫސްވެރިންގެ ބައްދަލުވުމެއްގައި ފަޔަރ ޗީފް ޓޮޑް އެއިޓްކެން ވަނީ ޒަޚަމްވި 18 ފަސިންޖަރުން އެއަރޕޯޓާއި ގާތުގައި ހުރި ހޮސްޕިޓަލްތަކަށް ގެންދެވުނު ކަމަށް ބުނެފައެވެ.