ދުނިޔެ
އިސްރާއީލް ފަތުރުވެރިންނަށް ސްރީލަންކާގައި ކުރިމަތިލާންޖެހޭ ދަތިތައް އިތުރުވަނީ

ސްރީލަންކާގެ ފަތުރުވެރިން ޒިޔާރަތްކުރާ އެޑަމްސް ޕީކް ގައި ހިތްޕާފައިވާ ލިއުމެއް ފޮޓޯ:ސީއެންއެން
ސްރީލަންކާގެ އަރުގަމް ބޭގައި އިސްރާއީލީ ފަތުރުވެރިންނާއި ރަށުގެ ރައްޔިތުންނާ ދެމެދު ހިނގި ހަމަނުޖެހުމަކާ ގުޅިގެން، ސްރީލަންކާގެ ފަތުރުވެރިކަމުގެ ސިނާއަތުގައި އިސްރާއީލީ ފަތުރުވެރިންނާމެދު އޮތް ގުޅުން ބަދަލުވަމުންދާކަން ފާހަގަކުރެވެއެވެ. މިކަން ހާމަވެގެން ދިޔައީ އަރުގަމް ބޭއަށް ރާޅާ އަޅަންދިޔަ އިސްރާއީލް ފަތުރުވެރިއަކާއި ލަންކާގެ ރާޅާއެޅުންތެރިންނާއި ދެމެދު ހިނގި ދެބަސްވުންތަކާއި ގުޅިގެންނެވެ.
ބައިނަލްއަޤްވާމީ ފެންވަރުގައި މަޝްހޫރު ސްރީލަންކާގެ ރާޅާއެޅުންތެރިއެއް ކަމަށްވާ ޖީވަން ހޯލް ބުނި ގޮތުގައި، އިސްރާއީލަށް ނިސްބަތްވާ ސިފައިންގެ އޮފިސަރަކު ރާޅާއެޅުމަށް އުސޫލުތަކާއި ޚިލާފަށް އަމަލުކުރަމުން ދިޔުމުން އޭނާ އެކަމާ ސުވާލުކުރުމުން، އެ ދެބަސްވުން ހިނގިކަމަށެވެ. އިސްރާއީލް ސިފައިންގެ އޮފިސަރުންތަކެއް ހޯލްއާ ދިމާލަށް އެމީހުންގެ ބަހުން މަލާމާތްކޮށް، ގައްޒާގެ ހަނގުރާމައާ ގުޅުވައިގެން ވާހަކަދެއްކިއެވެ.
ގިނަ އަދަދެއްގެ އިސްރާއީލް ފަތުރުވެރިން ސްރީލަންކާއަށް ޒިޔާރަތްކުރާކަން ފާހަގަކުރެވެއެވެ. 2024 ވަނަ އަހަރު 20،000 އަށްވުރެ ގިނަ އިސްރާއީލް ފަތުރުވެރިން ސްރީލަންކާއަށް ޒިޔާރަތްކޮށްފައިވާއިރު، މިއީ ކުރީ އަހަރުތަކާ އަޅާބަލާއިރު ދެ ގުނައަށްވުރެ އިތުރު އަދަދެކެވެ. އަރުގަމް ބޭގެ އާބާދީގެ ތެރެއިން 100 އަށްވުރެ ގިނަ އިސްރާއީލް ރައްޔިތުން ދިރިއުޅެމުންދާކަން ވެސް ފާހަގަކުރެވެއެވެ.
ނަމަވެސް، އިސްރާއީލުން ޢައްޒާގައި ހިންގަމުންދާ ހަނގުރާމައާ ގުޅިގެން، އިސްރާއީލް ފަތުރުވެރިންނާމެދު ރަށުގެ ރައްޔިތުންގެ ނަޒަރު ބަދަލުވަމުންދާކަން ފާހަގަކުރެވެއެވެ. ބައެއް ފަރާތްތަކުން ގޮވާލަނީ އިސްރާއީލް ޕާސްޕޯޓު ގެންގުޅޭ މީހުންނަށް ސްރީލަންކާއަށް އެތެރެވުން މަނާކުރުމަށެވެ. މިގޮތަށް އަމަލުކޮށްފިނަމަ، އެހެން ގައުމުތަކުގެ ފަތުރުވެރިން އިތުރުވެ، ފަތުރުވެރިކަމުގެ ސިނާއަތަށް ފައިދާވާނެ ކަމަށް ބައެއް ފަރާތްތަކުން ޤަބޫލުކުރެއެވެ.