ކުޅިވަރު

ހަނި މޮޅަކާއެކު ބާސެލޯނާ އަނބުރާ ލީގު އެއްވަނައަށް އަރައިފި

ހަނި މޮޅަކާއެކު ބާސެލޯނާ އަނބުރާ ލީގު އެއްވަނައަށް އަރައިފި

ލެވަންޑޯސްކީ ވަނީ މި ސީޒަނުގައި 20 ގޯލު ކާމިޔާބުކޮށްފައި، ފޮޓޯ: ގެޓީ

މިފްތާޙް މުޙައްމަދު

މިފްތާޙް މުޙައްމަދު

18 ފެބްރުއަރީ 2025، 08:52

18 ފެބްރުއަރީ 2025، 08:52

ސްޕެނިޝް ލަ ލީގާގައި ރަޔޯ ވަޔޯކާ 1-0 އިން ބަލިކުރުމަށްފަހު، ޑިސެމްބަރު މަހަށްފަހު އަލަށް ބާސެލޯނާ އަނބުރާ ލީގުގެ އެއްވަނައަށް ކުރިޔަށް ޖެހިލައިފިއެވެ.

ބާސެލޯނާ މެޗުން މޮޅުކޮށްދިން ގޯލު ކާމިޔާބުކުރީ، އެ ޓީމަށް ލިބުނު ޕެނަލްޓީއެއްގައި ރޮބަޓް ލެވަންޑޯސްކީއެވެ. އަދި މި ހަފްތާގައި އެތުލެޓިކޯ މެޑްރިޑާއި ރެއާލް މެޑްރިޑުން ކުޅުނު މެޗުތައް 1-1 އިން އެއްވަރުވެފައިވުމުން، މި ތިން ޕޮއިންޓަކީ އެ ދެ ޓީމު ފަހަތަށްޖައްސާލުމަށް ލިބުނު މުހިންމު ޕޮއިންޓުތަކެކެވެ. 

ބާސެލޯނާގެ ޕެނަލްޓީއަކީ ވަޔޯކާގެ ކުޅުންތެރިއަކު އެ ޓީމުގެ ޕެނަލްޓީ އޭރިއާ ތެރޭގައި ދެ އަތުން ބާސެލޯނާގެ ކުޅުންތެރިއަކު ހިފެހެއްޓުމުން ވީޑިއޯ އެސިސްޓެންޓު ރެފްރީ (ވީއޭއާރު) ދިން ޕެނަލްޓީއެކެވެ. އަދި މި ޕެނަލްޓީއަކީ ލެވަންޑޯސްކީ މި ސީޒަނުގައި ކާމިޔާބުކުރި 20 ވަނަ ލީގު ގޯލެވެ. 

ބާސެލޯނާގެ ޕެނަލްޓީ އޭރިއާ ތެރޭގައި ވެސް، ވަޔޯކާގެ ކުޅުންތެރިއަކާއި ބާސެލޯނާގެ ކުޅުންތެރިއަކާ ދެމެދު މިފަދަ ހާދިސާއެއް ހިނގާފައިވެއެވެ. ނަމަވެސް، އެއީ ޕެނަލްޓީއެއް ނޫންކަމަށް ރެފްރީ ނިންމުމުން ވަޔޯކާގެ ކުޅުންތެރިން ރުޅި ގަދަވެ އެކަމަށް ދެކޮޅުހެދިތަން ފެނުނެވެ.

މި ހޫނުގަނޑުގެ ތެރެއިން ވަޔޯކާއިން ގޯލެއް ވެސް ކާމިޔާބުކުރިއެވެ. ނަމަވެސް ބާސެލޯނާގެ ގޯލްކީޕަރު، ވޮޒްނިއެކް ޝެޒްނީއަށް އުނދަގޫވާގޮތަށް، ބޯޅައަށް ހަރަކާތް ނުކޮށް ވިޔަސް، ވަޔޯކާގެ ފޯވާޑު އޮފްސައިޑުގައި ހުރުމުން، އެ ގޯލު ނުގުނުމަށް ރެފްރީ ނިންމިއެވެ. 

ބާސެލޯނާއިން ދެވަނަ ހާފުގައި ގިނަ ހަމަލާތަކެއް ވަޔޯކާގެ ގޯލަށް ފޮނުވާލިއެވެ. ނަމަވެސް އެ ޓީމަށް އިތުރު ގޯލެއް ކާމިޔާބުކުރެވޭ ގޮތެއް ނުވިއެވެ. އަދި ވަޔޯކާގެ ޑި ފްރުޓޯސް ވަނީ މެޗު ނިމެން ކުޑަތަންވެފައި ވަނިކޮށް، މެޗުގެ ނަތީޖާ ހަމަހަމަ ކުރުމަށް ބޮލުން ނުރައްކާތެރި ހަމަލާއެއް ގޯލަށް ފޮނުވާލާފައެވެ. ނަމަވެސް، އެ ހަމަލާ ގޯލަކަށް ބަދަލުނުކުރެވުނީއެވެ.

މި ނަތީޖާއާއެކު ބާސެލޯނާ ލީގުގެ އެއްވަނައިގައި އޮތީ 51 ޕޮއިންޓާއެކުއެވެ. އަދި ދެވަނައިގައި އޮތް ރެއާލް މެޑްރިޑަށް ހަމަ އެ އަދަދަށް ޕޮއިންޓު ލިބިފައި އޮތްނަމަވެސް، ބާސެލޯނާ ކުރި ހޯދީ ގޯލުގެ ފަރަގުންނެވެ. ތިން ވަނައިގައި އޮތް އެތުލެޓިކޯއަށް ލިބިފައިވަނީ 50 ޕޮއިންޓެވެ.

މި ލިޔުން ކިޔާލުމުން

Ads by MSS