ޑޯޕިންގެ މައްސަލަތައް އިންސާފުވެރި ނޫންކަމުން ޖޮކޮވިޗް ފާޑު ކިޔައިފި

ޑޯޕިން ނުވަތަ މަނާ ބޭސް ބޭނުންކުރުމުގެ މައްސަލަތަކުގައި ވޯލްޑް އެންޓި-ޑޯޕިން އެޖެންސީ (ވާޑާ) އަމަލުކުރާ ގޮތް އިންސާފުވެރި ނޫންކަމަށް ބުނެ، 24 ފަހަރު ގްރޭންޑް ސްލޭމް ކާމިޔާބުކޮށްފައިވާ ސާރބިއާގެ ޖޮކޮވިޗް ފާޑުކިޔައިފިއެވެ.

ކުރިން ދުނިޔޭގެ އެއްވަނަ ޓެނިސް ކުޅުންތެރިޔާ ޖޮކޮވިޗް ބުނީ، ޑޯޕިންގެ މައްސަލަތައް ހުއްޓުވުމަށް އެފަދަ ކަންކަމާ ދެކޮޅަށް ހަރުކަށި ފިޔަވަޅު އެޅުމުގެ ބަދަލުގައި ވާޑާއިން ޢަމަލުކުރަމުން ދަނީ އެފަދަ ކުޅުންތެރިންނަށް ފައިދާވާ ގޮތަށް ކަމަށެވެ. އެގޮތުން މިހާރު ދުނިޔޭގެ އެއްވަނައިގައި ސީޑްކޮށްފައިވާ ޖެނިކް ސިނާރ އާއި އިގާ ސްވިއަޓެކް މަނާ ބޭހަށް ޕޮޒިޓިވްވުމުން ވާޑާއިން ކަންތައްތައް ކުރިގޮތަށް ޖޮކޮވިޗް އަލިއަޅުވާލިއެވެ.

ޖޮކޮވިޗް ބުނީ މިފަދަ ކަންކަމަކީ މުޅި ކުޅިވަރަށް ވެސް ދެވޭ ގެއްލުމެއް ކަމަށެވެ. 

މިއީ އެއްގޮތަކަށްވެސް ބަލައިގަނެވޭނެ ކަމެއް ނޫން އަދި މިއީ މި ކުޅިވަރަށްވެސް ރަގަޅު ގޮތެއް ނޫން. މިއީ އަހަރެންގެ އަމިއްލަ ވާހަކަތަކެއް ނޫން. މިއީ ގިނަ ޓެނިސް ކުޅުންތެރިންގެ ވާހަކަތައް. މުޅި މި ޕްރޮސެސް ގެންގޮސްފައިވަނީ ގޯސްކޮށް.

ޤަތަރު އޯޕަންގެ ތެރެއިން ނޫސްވެރިންނާ ވާހަކަ ދައްކަމުން ޖޮކޮވިޗް ބުންޏެވެ.

މީގެ އިތުރުން ޖޮކޮވިޗް ބުނީ، މިފަދަ ކަންކަމުގައި ހުރިހާ ކުޅުންތެރިންނަށް އެއް ހަމައަކުން ޢަމަލު ކުރެވެން ޖެހޭނެކަމަށާއި، މަޝްހޫރު ވިޔަސް ނުވަތަ މަޝްހޫރު ނޫނަސް، މިކަމުގައި ދެވޭ އަދަބުތައް ގެންގުޅެންވާނީ އެއް މިންގަނޑެއްގައިކަމަށެވެ.

ޑޯޕިންގެ ކަންކަމުގައި ޖޮކޮވިޗް ފާޑުކިޔާފައިވާއިރު، ޖެނިކް ސިނާރ މިހާރު ހުރީ ތިން މަހަށް ޓެނިހުގެ ހަރަކާތްތަކުގައި ބައިވެރިނުވެވޭހެން ބޭންކޮށްފައެވެ. ސިނާރ ވަނީ ދެފަހަރަށް ޑޯޕިންއަށް ޕޮޒިޓިވްވެފައެވެ. ނަމަވެސް ސިނާރ ބުނީ، މިއީ އޭނާ ފުރިހަމައަށް ޒިންމާވާންޖެހޭ ކަމެއް ނޫންކަމަށެވެ.

މި އަހަރު އޮތް އޮސްޓްރޭލިއަން އޯޕަން ކާމިޔާބުކުރި ސިނާރގެ ބޭން ފެށުނީ މިމަހުގެ 9ވަނަ ދުވަހެވެ. އަދި މެއި މަހުގެ 4ވަނަ ދުވަހަށް ބޭންގެ މުއްދަތު ހަމަވާއިރު، އޭނާއަށް ފްރެންޗު އޯޕަންގައި ވާދަކުރެވޭނެއެވެ. އެ މުބާރާތް ފެށުމަށް ހަމަޖެހިފައިވަނީ މެއި 25ގައެވެ.

ހޮނިހިރު ދުވަހު ނެރުނު ސްޓޭޓްމެންޓެއްގައި ސިނާރ ބުނީ، މިއީ މުބާރާތްތަކުން ކުރި ހޯދުމުގެ މަޤްސަދުގައި އޭނާ ގަސްތުގައި ކުރިކަމެއް ނޫންކަމަށް ވާޑާއިން ޤަބޫލުކޮށްފައިވާ ކަމަށެވެ. މި މައްސަލައިގައި ސިނާރ އަބަދުވެސް ބުނަމުން އައީ، މާނާ ބާވަތެއް ކަމުގައިވާ ކްލޮސްޓެބޮލް އޭނާގެ ހަށިގަނޑަށް ވަނީ ފިޒިއޮތެރަޕިސްޓު ބޭނުންކުރި ސްޕްރޭއަކުންކަމަށެވެ.