ޚަބަރު
މިވަގުތު މުސާރަތައް އުނިކުރުމަށް ނުފެންނަކަމަށް މާލިއްޔަތު ކޮމެޓީން ނިންމައިފި

މާލިއްޔަތު ކޮމެޓީގެ މުޤައްރިރު ޤާސިމް އިބްރާޙިމް، ފޮޓޯ: މަޖިލިސް
ހުލާސާ
މި މައްސަލައަކީ މިނިވަން މުވައްސަސާތަކުގެ އިސްވެރިންނާއި، ރައްޔިތުންގެ މަޖިލީހުގެ މެންބަރުންނާއި އަދި ޝަރުޢީ ދާއިރާގެ އިސްވެރިންނާ ގުޅޭ މައްސަލައެއް
މިނިވަން މުވައްސަސާތަކުގެ އިސްވެރިންނާއި، ރައްޔިތުންގެ މަޖިލީހުގެ މެންބަރުންނާއި އަދި ޝަރުޢީ ދާއިރާގެ އިސްވެރިންގެ މުސާރަ މިވަގުތު އުނިކުރުމަށް ނުފެންނަކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒަށް ލަފާދެއްވުމަށް، ރައްޔިތުންގެ މަޖިލީހުގެ މާލިއްޔަތު ކޮމެޓީން ނިންމައިފިއެވެ.
މި މައްސަލައަކީ، ސަރުކާރުގެ އިޤްތިޞާދީ އެޖެންޑާގެ ތެރެއިން، މިނިވަން މުވައްސަސާތަކުގެ އިސްވެރިންގެ މުސާރަ ކުޑަކުރުމަށް ލަފާ ހޯއްދެވުމަށް ރައީސުލްޖުމްހޫރިއްޔާ ހުށަހެޅުއްވި މައްސަލައެކެވެ. މި މައްސަލައިގައި ރައްޔިތުންގެ މަޖިލީހުގެ މެންބަރުންނާއި ޝަރުޢީ ދާއިރާގެ އިސްވެރިންގެ މުސާރަ ކުޑަކުރެއްވުމުގެ ލަފާއަކަށް ވެސް ރައީސުލްޖުމްހޫރިއްޔާ ވަނީ އައްސަވާފައެވެ.
އެގޮތުން، މިނިވަން މުޢައްސާސާތަކުގެ އިސްވެރިންގެ މުސާރައިގެ ތެރެއިން 12،000 ރުފިޔާއަށް ވުރެ މަތިން ލިބޭ މުޢައްސާތަކުގެ އިސްވެރިންނާއި، މަޖިލީހުގެ މެންބަރުންނާއި އަދި ޝަރުޢީ ދާއިރާގެ އިސްވެރިންގެ މުސާރައިން 10 އިންސައްތަ އުނިކުރެއްވުމުގެ ލަފަޔަކަށް ރައީސުލްޖުމްހޫރިއްޔާ ވަނީ ހުށަހަޅުއްވާފައެވެ.
މި މައްސަލަ ރައްޔިތުންގެ މަޖިލީހުގެ މާލިއްޔަތު ކޮމެޓީން ދިރާސާކުރެއްވުމަށްފަހު ނިންމީ، ގިނަ މިނިވަން މުޢައްސާސާތަކުގެ މުސާރައާއި އިނާޔަތަށް ބަދަލު ގެނެވެނީ ޤާނޫނުތަކަށް އިސްލާހު ހުށަހަޅައިގެން ކަމަށެވެ. އަދި އެއް ގިންތިއެއްގެ މުސާރައާޢި އިނާޔަތްތައް އުނިކުރަން ޖެހޭނީ އެއްހަމައެއްގެ މަތިން ކަމަށްވުމާއެކު މިފަދަ ގޮތަކަށް ނިންމުމަކީ އިންސާފުވެރި އަދި އަދުލުވެރި ގޮތެއް ނޫންކަމަށް ވަނީ ހުށަހަޅާފައެވެ. އެހެންކަމުން މިވަގުތު މުސާރައިން އުނިކުރުމަށް ނުފެންނަ ކަމަށް ރިޕޯޓުގައި ވެއެވެ.
މި މައްސަލައާ ގުޅިގެން ކުރި ބަހުސްގައި އެ ކޮމެޓީގެ މުޤައްރިރު ޤާސިމް އިބްރާޙިމް ވިދާޅުވީ، ޤާނޫނަށް އިސްލާހު ނުގެނަސް މުސާރަ ކުޑަކުރެވޭނީ މަޖިލިސް މެންބަރުންނާއި، އޮޑިޓު އޮފީހާއި ޖުޑީޝަރީގައި އެކަނި ކަމަށެވެ. އަދި މިއީ 14 މިލިޔަން ރުފިޔާ ކަމުން، މިއީ ނިސްބަތުން ކުޑަ އަދަދެއްކަމަށް ދޭހަވާގޮތަށް މުޤައްރިރު ވަނީ ވާހަކަފުޅު ދައްކަވާފައެވެ.
މީގެ އިތުރުން، މިނިވަން ބައެއް ތަންތަން އެއްކޮށްލައިގެން ޚަރަދު ކުޑަކުރެވޭނެތީ، މިފަދަ ތަންތަން ފާހަގަކޮށް ޤާނޫނުތަކުގެ ތެރެއިން އެ ބަދަލުތައް ގެނައުމަށް ހުށަހެޅުމަށް ރައީސުލްޖުމްހޫރިއްޔާއަށް ލަފާދެއްވުމަށް ކޮމެޓީން ނިންމާފައިވެއެވެ.
މި އިސްލާހު ހިމަނައި މަޖިލީހުގެ ތަޅުމަށް ރިޕޯޓު ފޮނުވުމަށް ފާސްވީ ކޮމެޓީއަށް ހާޒުރުވެ ތިބި މެންބަރުންގެ އިއްތިފާޤުންނެވެ.