2022 ވަނަ އަހަރާއި 2023 ވަނަ އަހަރު އެންމެ ގިނައިން ދިވެހިން ދައްކާފައިވަނީ ގައިނަކޮލޮޖިސްޓުންނަށް!

2022 ވަނަ އަހަރާއި 2023 ވަނަ އަހަރު އެންމެ ގިނައިން ދިވެހިން ދައްކާފައިވަނީ ގައިނަކޮލޮޖިސްޓުންނަށް ކަމަށް ޞިއްޙީ ވުޒާރާގެ ތަފާސްހިސާބުތަކުން ދައްކައިފިއެވެ. 
އެގޮތުން 2022 ވަނަ އަހަރާއި 2023 ވަނަ އަހަރު ދެވަނަ އަށް އެންމެ ގިނައިން ދައްކާފައިވަނީ އެތެރެހަށީގެ ޑޮކްޓަރުންނަށެވެ. 
2022 ވަނަ އަހަރު ތިންވަނަ އަށް އެންމެ ގިނައިން ދައްކާފައިވަނީ ކަށީގެ ޚާއްޞަ ޑޮކްޓަރުންނަށެވެ. އަދި 2023 ވަނަ އަހަރު އެންމެ ގިނައިން ދައްކާފައިވަނީ ކުޑަކުދިންގެ ޑޮކްޓަރުންނަށް ކަމަށް ޞިއްޙީ ވުޒާރާގެ ތަފާސްހިސާބުތަކުން ދައްކައެވެ. 
އެ ވުޒާރާގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރު އެވްރެޖްކޮށް ދުވާލެއްގެ މައްޗަށް 8،722 ފަހަރު މީހުން ޑޮކްޓަރަށް ދައްކާފައިވެއެވެ. އަދި ހަފުތާއެއްގެ މައްޗަށް 61،222 ފަހަރު މީހުން ޑޮކްޓަރަށް ދައްކާފައިވާއިރު، މަހެއްގެ މައްޗަށް 265،298 ފަހަރު މީހުން ޑޮކްޓަރަށް ދައްކާފައިވާ ކަމަށެވެ.

ތަފާސްހިސާބުތަކުން ދައްކާ ގޮތުގައި ޑޮކްޓަރަށް ދެއްކި 95 އިންސައްތަ މީހުންނަކީ ދިވެހިންނެވެ. އަދި ފަސް އިންސައްތަ މީހުންނަކީ ބިދޭސީންނެވެ. 79 އިންސައްތަ މީހުން ސަރުކާރު ހޮސްޕިޓަލަށް ދައްކާފައިވާއިރު 21 އިންސައްތަ މީހުން ދައްކާފައިވަނީ ޕްރައިވެޓް ހޮސްޕިޓަލްތަކަށެވެ.

ޑޮކްޓަރަށް މިިދިޔަ އަހަރު އެންމެ ގިނައިން ދެއްކި ސަރަޙައްދުތައް:
·    މާލެ - 1،441،738 ފަހަރު
·    ހއ. އަތޮޅު - 104،628 ފަހަރު
·    ހދ. އަތޮޅު - 165،795 ފަހަރު
·    ރ. އަތޮޅު - 157،191 ފަހަރު
·    ލ. އަތޮޅު - 129،574 ފަހަރު
·    ގދ. އަތޮޅު - 117،917 ފަހަރު
·    އަައްޑޫ ސިޓީ - 183743 ފަހަރު

މިދިޔަ އަހަރު ޖުމްލަ 3،183،577 ފަހަރު މީހުން ޑޮކްޓަރަށް ދައްކާފައިވާ  ކަމަށްވެސް ޞިއްޙީ ވުޒާރާގެ ތަފާސްހިސާބުތަކުން ދައްކައެވެ.