ކޮންމެ ކްލަބަކަށް ދޭން ކަނޑައެޅި ފައިސާގެ ތެރެއިން 5 ލައްކަ ޖަމާކޮށްދީފި

ދިވެހި ޕްރިމިއަރ ލީގު ކުޅޭ ކޮންމެ ޓީމަކަށް ދިނުމަށް ސަރުކާރުން ކަނޑައެޅި 1.5 މިލިއަން ރުފިޔާގެ ތެރެއިން 5 ލައްކަ ރުފިޔާ މިދިޔަ އާދީއްތަ ދުވަހު ޖަމާކޮށްދީފިއެވެ.

ސަރުކާރުން ވަނީ ފުރަތަމަ ޑިވިޝަނުގައި ވާދަކުރާ 10 ޓީމަށް ވެސް މި ފައިސާ ދޫކުރުމަށް ނިންމާފައެވެ

ފުޓުބޯޅަ އެސޯސިއޭޝަން އޮފް ދަ މޯލްޑިވްސް އިން މި އަހަރަށް އެކުލަވާލި ކަލަންޑަރުގައި، ލީގު ފެށުމުގެ ގޮތުން ކުޅޭ ޗެރިޓީ ޝީލްޑް މެޗު ކުޅުމަށް ހަމަޖައްސާފައި އޮތީ މި މަހުގެ 14 ވަނަ ދުވަހެވެ. 

ނަމަވެސް އެ ތާރީޙު ވަނީ 24 ފެބުރުއަރީއަށް ބަދަލުކޮށްފައިކަމަށް މަޢުލޫމާތު ލިބިފައިވެއެވެ. މި މެޗު ފަސްކުރަން ޖެހުނީ ނަވާރަ އަހަރުން ދަށުގެ ޔޫތު ޗެމްޕިއަންޝިޕް ފެށުން ލަސްވުމުންކަމަށްވެއެވެ.

ސަރުކާރުގެ އިތުރުން، އެފްއޭއެމްއިން ވެސް ފުރަތަމަ ޑިވިޝަނުގެ ކޮންމެ ކްލަބަކަށް އެއް މިލިއަން ރުފިޔާ ދޭން ނިންމިއެވެ. މި ފައިސާ ދިނުމަށް އެފްއޭއެމްއިން ނިންމީ މަރުހަލާތަކަކަށް ބަހާލައިގެންނެވެ. މި ނިންމުން ނިންމީ ނޯމަލައިޒޭޝަން ކޮމިޓީގެ ކުރީގެ ޗެއާމަން އަހްމަދު ޒުހޫރު އިސްވެ ހުންނަވައެވެ. 

ނަމަވެސް އެފްއޭއެމްއިން ކްލަބުތައް ހިންގަން ފައިސާ ދޫކުރުމަކީ ކުރަންޖެހޭނެ ކަމެއް ނޫން ކަމަށާއި، އަދި ދުނިޔޭގެ ފުޓުބޯޅައިގެ މައި އިދާރާ ފީފާއިން ވެސް މި ކަމަށް ތާއީދު ނުކުރާކަމަށް ޒުހޫރު ވިދާޅުވެފައިވެއެވެ.

އޭގެ ފަހުން ނޯމަލައިޒޭޝަން ކޮމެޓީ ކުޑަކުރުމަށްކަމަށް ބުނެ، އެ ކޮމެޓީން ވަކިކުރި މީހުންގެ ތެރޭގައި ޒުހޫރު ވެސް ހިމެނެއެވެ.

ޕްރިމިއަރ ލީގަށް ތައްޔާރުވުމަށް މިހާތަނަށް ފަރިތަކުރުންތައް ފަށާފައިވަނީ ހަމައެކަނި މާޒިޔާ ސްޕޯޓްސް އެންޑް ރެކްރިއޭޝަނުންނެވެ.