ޗެމްޕިއަންސް ލީގު: ޔޫރޮޕާ ލީގު ކާމިޔާބުކުރި އެޓަލާންޓާ އާއި އޭސީ މިލާން ކަޓައިފި

ޔޫއެފާ ޗެމްޕިއަންސް ލީގުގެ ޕްލޭ-އޮފް ބުރުން، މިދިޔަ ސީޒަންގެ ޔޫރޮޕާ ލީގު ކާމިޔާބުކުރި އިޓަލީގެ އެޓަލާންޓާ އާއި އެ ޤައުމުގެ އޭސީ މިލާން ކަޓައިފިއެވެ. 

ޗެމްޕިއަންސް ލީގުން އެޓަލާންޓާ ކެޓީ ދެވަނަ ލެގުގައި ކްލަބް ބުރޫޖްއާ ބައްދަލުކުރި މެޗުން 3-1 އިން ބަލިވުމުންނެވެ. ޕްލޭ-އޮފްގެ ފުރަތަމަ ލެގު ވެސް ކާމިޔާބުކުރީ ބްރޫޖެވެ. 

މި މެޗުގައި ބުރޫޖުގެ ޗެމްސްޑިން ޓަލްބީގެ ފުރަތަމަ ގޯލަކީ، މި މުބާރާތުގައި މިހާތަނަށް އެ ކްލަބުން އެންމެ އަވަހަށް ކާމިޔާބުކުރި ގޯލެވެ. އޭނާ މި ގޯލު ކާމިޔާބުކުރީ މެޗުގެ ދެވަނަ މިނެޓުގައެވެ.

އެ ޓީމުން ވަނީ ފުރަތަމަ ހާފުގައި 3 ގޯލުގެ ލީޑެއް ނަގާފައެވެ. އެ ޓީމުގެ ދެވަނަ ގޯލު ޓަލްބީ ކާމިޔާބުކުރިއިރު ފުރަތަމަ ހާފުގެ އިތުރު ވަގުތުގައި ތިންވަނަ ގޯލު ކާމިޔާބުކުރީ ފެރަން ޖަޓްލާއެވެ.

އެޓަލާންޓާގެ ގޯލު ކާމިޔާބުކުރީ ދެވަނަ ހާފުގައި ކުޅެން ނިކުތް އަޑެމޮލާ ލުކްމަންއެވެ. މިއީ ކުޅެން ނިކުތްތާ 34 ސިކުންތުގެ ތެރޭގައޮ އޭނާ ކާމިޔާބުކުރި ގޯލެކެވެ.

އިޓަލީއަށް ނިސްބަތްވާ އޭސީ މިލާން މުބާރާތުން ކެޓީ ދެވަނަ ލެގުގައި ނެދަލޭންޑްގެ ފެޔެނޫދުއާ ބައްދަލުކުރި މެޗު 1-1 އިން އެއްވަރުވުމުންނެވެ. ފެޔެނޫދުން ވަނީ އެ ޓީމުގެ އަމިއްލަ ދަނޑުގައި ކުޅުނު ފުރަތަމަ ލެގު 1-0 އިން ކާމިޔާބުކޮށްފައެވެ.

މި މެޗުގައި ފުރަތަމަ ލީޑު ނެގީ މުބާރާތް 7 ފަހަރު ކާމިޔާބުކޮށްފައިވާ އޭސީ މިލާނެވެ. ތެއޯ ހެނާންޑޭޒްގެ މި ގޯލަކީ ޗެމްޕިއަންސް ލީގުގެ މި ސީޒަންގައި ކާމިޔާބުކުރި އެންމެ އަވަސް ގޯލެވެ. ތެއޯ ހެނާންޑޭޒް މި ގޯލު ކާމިޔާބުކުރީ މެޗުގެ 36ވަނަ ސިކުންތުގައެވެ.

ނަމަވެސް މެޗުގެ 73ވަނަ މިނެޓުގައި ހޫލިއަން ކަރަންޒާ ކާމިޔާބުކުރި ގޯލާއެކު، 2-1ގެ އެގްރިގޭޓް ސްކޯއަކުން މުބާރާތުގެ ގަދަ-16އަށް ދަތުރުކުރީ ފެޔެނޫދެވެ.

މުބާރާތުގެ ގަދަ-16 ގެ މެޗުތައް ކަނޑައެޅިގެން ދާނީ ހުކުރު ދުވަހު އޮންނަ ޑްރޯ ސެރެމަނީގައެވެ.