ވައިގެމަގުން ރާއްޖެ އެތެރެކުރަން އުޅުނު 9 ކިލޯ ޑްރަގް އަތުލައިގެންފި!

ވައިގެ މަގުން ރާއްޖެ އެތެރެކުރަން އުޅުނު 9ކިލޯގެ މަސްތުވާތަކެތި ކަސްޓަމްސް އިން އަތުލައިގެންފިއެވެ. 

ކަސްޓަމްސް އިން ބުނެފައިވަނީ މި މަހުގެ 16 އަދި 18 ވަނަ ދުވަހު އަތުލައިގަތް މަސްތުވާތަކެތީގެ ތެރޭގައި ހެރޮއިން / ސިންތެޓިކް ކެތިނޯން / ކެނަބިސް / އެކްސްޓަސީ ހިމެނޭ ކަމަށެވެ.

މިގޮތުން 3.48ގ ހެރޮއިން އަތުލައިގަތީ މި މަހުގެ 16 ވަނަ ދުވަހުކަމަށް ބުނެފައިވެއެވެ. އަދި މި މަހުގެ 18 ވަނަ ދުވަހު އަތުލައިގަތް މަސްތުވާތަކެތީގެ ތެރޭގައި ހިމެނެނީ ސިންތެޓިކް ކެތިނޯންގެ 582ގ، އާއި 5210ގ ކެނަބިސްގެ އިތުރުން 2870ގގެ އެކްސްޓަސީއެވެ.

މިތަކެތި އަތުލައިގަނެފައިވަނީ ސެޕްޓެމްބަރު 18 ވަނަ ދުވަހު ރާއްޖެއައި އެއަރކާގޯ ޝިޕްމަންޓަކާއި، ޕޯސްޓް ޕެކޭޖެއް އަދި ސެޕްޓެމްބަރު 16 ވަނަ ދުވަހު ރާއްޖެ އައި ސްރީލަންކަން އެއަރލައިންސް ފްލައިޓް ނަންބަރު UL103އިން ދަތުރުކުރި 65 އަހަރުގެ ދިވެހި ފިރިހެން ފަސިންޖަރަކު ބަލައިފާސްކުރުމުގެ ތެރޭގައި ކަމަށް ކަސްޓަމްސް އިން ބުނެފައިވެއެވެ.

މި މައްސަލަތައް އިތުރަށް ތަހްޤީޤު ކުރުމަށް ފަސިންޖަރާއި، އަތުލައިގަނެވުނުތަކެތި ވަނީ ދިވެހި ފުލުހުންނާއި ހަވާލުކޮށްފައި ކަމަށް ކަސްޓަމްސްއިން ބުނެފައިވެއެވެ.