ދުނިޔެ
ވެރިކަން ވައްޓާލުމަށް ރާވަމުންދާކަމަށް ބުނެ ބްރެޒިލްގެ ކުރީގެ ރައީސަށް ދައުވާކޮށްފި

ބްރެޒިލްގެ ކުރިގެ ރައީސް، ހެއަރ ބޮލްސޮނާރޯ---
ބްރެޒިލްގެ ވެރިކަން ބަޣާވާތަކުން ބަދަލުކުރުމަށް ރާވަމުންދާކަމަށް ބުނެ، އެ ޤައުމުގެ ކުރީގެ ރައީސް، ހެއަރ ބޮލްސޮނާރޯ އާއި ގިނަ ބަޔަކަށް ދަޢުވާ ކުރުމަށް ޕްރޮސެކިއުޓަރ ޖެނެއަލް ކޯޓަށް ހުށަހަޅައިފިއެވެ.
އެ ޤައުމުގެ ޕްރޮސެކިއުޓަރ ޖެނެރަލް، ޕައުލޯ ގޮނެޓް ބުނީ ބޮލްސޮނާރޯ އާއި އިތުރު 33 މީހެއްގެ މައްޗަށް އެ ޤައުމުގެ ސްޕްރީމް ކޯޓުގައި ދައުވާ އުފުލާފައިވާނެ ކަމަށެވެ. އޭގެ ތެރޭގައި ކުރީގެ މިނިސްޓަރުންނާއި ކުރީގެ ނޭވީ ޗީފް ވެސް ހިމެނެއެވެ.
މި ދައުވާއާ ގުޅިގެން މައްސަލަ ވަކިގޮތަކަށް ނުނިމެނީސް، ބްރެޒިލްގެ މިލިޓަރީގެ ކެޕްޓަނެއްގެ ގޮތުގައި ވެސް ޚިދުމަތްކޮށްފައިވާ ބޮލްސޮނާރޯ ބަންދުކުރާނެކަމަށް ނުބެލެވޭކަމަށް ރިޕޯޓުތައް ބުނެއެވެ. އޭނާ ބްރެޒިލްގެ ރައީސެއްގެ މަޤާމު އަދާކޮށްފައިވަނީ 2019 އިން 2022 އަށެވެ.
ބޮލްސޮނާރޯއާއި އޭނާގެ ވާގިވެރިންނަށް ދައުވާކޮށްފައި މިވަނީ 2022 ވަނަ އަހަރުގެ ރިޔާސީ އިންތިހާބުގެ ނަތީޖާ ޤަބޫލުނުކޮށް، އެ ނަތީޖާތަކާ ދެކޮޅަށް ހަމަނުޖެހުން ހިންގުމާ ގުޅިގެން ފުލުހުން ކުރަމުންދާ ތަޙުޤީޤަށް ދެ އަހަރުވެފައި ވަނިކޮށެވެ.
މި ހަމަނުޖެހުންތައް ފެށުނީ، 2022ވަނަ އަހަރުގެ އިންތިހާބު ހަނިގޮތަކަށް ކާމިޔާބުކުރި ލުއިޒް އިނާޗިއޯ ލޫލާ ޑަ ސިލްވާ ބްރެޒިލްގެ ރައީސްކަމުގެ ހުވާކުރިތާ އެއް ހަފްތާ ފަހުންނެވެ.
ބޮލްސޮނާރޯ އާއި އޭނާއަށް ތާއީދުކުރާ ފަރާތްތަކާ ދެކޮޅަށް ފުލުހުން ތައްޔާރުކުރި ރިޕޯޓުގައި ބުނެފައިވަނީ، އެ މީހުން މަސައްކަތްކޮށްފައިވަނީ ޤާނޫނީ ގޮތުން އުފެދިފައި އޮތް ސަރުކާރެއް ޤާނޫނާ ޚިލާފަށް ވެރިކަމުން ދުރުކުރުމަށެވެ.
މި ދައުވާއާ ގުޅިގެން ބޮލްސޮނާރޯ ބުނީ، އޭނާ ޤާނޫނާ ޚިލާފު އެއްވެސް ޢަމަލެއް ނުހިންގާ ކަމަށާއި، ކުރިޔަށް ގެންދާ ތަޙުޤީޤަކީ ސިޔާސީ ފައިދާއެއް ހޯދުމަށް ކުރިއަށްގެންދާ ތަޙުޤީޤެއް ކަމަށެވެ.
އަދި ހަމަ މި މައްސަލައާ ގުޅިގެން ކޯޓުން ކުރިން ކޮށްފައިވާ ދެ ޙުކުމަކާ ގުޅިގެން، އުމުރުން 69 އަހަރުގެ ބޮލްސޮނާރޯއަށް ރިޔާސީ އިންތިހާބުގައި ދެން ވާދަކުރެވޭނީ 2030ގެ ފަހުންނެވެ.