ކުޅިވަރު
ގޯލްޑަން ފުޓްސަލް ޗެލެންޖު: އެންމެ ފަހުގެ ޗެމްޕިއަން އޭދަފުށި މުބާރާތުން ކަޓައިފި

މެޗު ކާމިޔާބުކުރުމަށްފަހު ގަމުގެ ކުޅުންތެރިން އުފާފާޅުކުރަނީ، ފޮޓޯ: އިމޭޖަސް އެމްވީ
ހުލާސާ
ސެމީގައި ގަމާ ދެކޮޅަށް ނިކުންނާނީ ނައިވާދޫ.
ގޯލްޑަން ފުޓްސަލް ޗެލެންޖު އެންމެ ފަހުން ކާމިޔާބުކުރި އޭދަފުށި އެ މުބާރާތުން ކަޓައިފިއެވެ.
އެ ޓީމު މި އަހަރުގެ މުބާރާތާ އަލްވަދާއު ކިޔަން ޖެހުނީ، ރޭ ކުޅުނު ކުއާޓާ ފައިނަލް މެޗުގައި ލ. ގަމާ ދެކޮޅަށް ކުޅުނު މެޗުން ޕެނަލްޓީ ޖަހައިގެން 6-5 އިން ބަލިވުމުންނެވެ.
ގަމުން ވަނީ ފާއިތުވެ ދިޔަ ދެ މުބާރާތުގެ ފައިނަލުގައި ވެސް ވާދަކޮށްފައެވެ. އެހެންކަމުން ސެމީ ފައިނަލުގައި އެ ޓީމު ޖެހިޖެހިގެން ވާދަކުރާތާ މިއީ ތިންވަނަ ފަހަރެވެ.
ކުއާޓާ ފައިނަލް މެޗުގެ ފުރަތަމަ ހާފުގައި އޭދަފުށިން ދެ ގޯލުގެ ލީޑެއް ނެގިއެވެ. މި ގޯލުތައް ކާމިޔާބުކޮށްދިނީ ނިޝާމް މުޙައްމަދު ރަޝީދާއި މުޢާޒް ޢަލީއެވެ.
ނަމަވެސް ދެވަނަ ހާފުގައި ގަމުގެ ޙަސަން ފަވާޒުގެ ދެ ގޯލުން މެޗު ނިމުނީ 2-2 އިން އެއްވަރުވެގެނެވެ.
އަދި ޕެނަލްޓީ ޝޫޓް އައުޓް ކާމިޔާބުކޮށް، ގަމުން ވަނީ ސެމީ ފައިނަލުން ޖާގަހޯދާފައެވެ.
މީގެ އިތުރުން، ރޭ ކުޅުނު އެހެން ކުއާޓާ ފައިނަލެއްގައި ނައިވާދޫން ވަނީ މަހިބަދޫ 7-4 އިން ބަލިކޮށްފައެވެ.
މި މެޗުގެ ފުރަތަމަ ހާފުގައި ނައިވާދޫ ވަނީ 5 ގޯލު ކާމިޔާބުކޮށްފައެވެ. އަދި ފުރަތަމަ ހާފުގައި ޖެހި ގޯލަކާއި ފަހު ހާފުގައި ޖެހި ތިން ގޯލާއެކު މަހިބަދޫއިން އެއް ގޯލަށް ފަރަގު ކުޑަކުރިއެވެ. ނަމަވެސް މެޗުގެ ކޮންޓްރޯލް ނުގެއްލެނީސް އިތުރު ދެ ގޯލު ކާމިޔާބުކޮށް، ނައިވާދޫއިން ސެމީގެ ޖާގައެއް ކަށަވަރުކުރިއެވެ.
ގަމާއި ނައިވާދޫ ބައްދަލުކުރާ ސެމީ ފައިނަލް މެޗު ކުޅުމަށް ހަމަޖެހިފައިވަނީ ހުކުރުދުވަހުގެ ރެއެވެ.