މަސްތުވާތަކެތިން ސަލާމަތްކުރުމަށް ދެވޭ ފަރުވާގެ ނިޒާމަށް މީހުން ވެއްދުން އަވަސްކުރުމަށް މަޝްވަރާކޮށްފި

މަސްތުވާތަކެތިން ސަލާމަތްކުރުމަށް ދެވޭ ނެޝަނަލް ޑްރަގް އެޖެންސީ (އެންޑީއޭ)ގެ ފަރުވާގެ ނިޒާމަށް މީހުން ވެއްދުމުގެ މަރުހަލާ އަވަސްކުރުމަށް މަޝްވަރާކޮށްފިއެވެ.

އެ އެޖެންސީން ހާމަކޮށްފައިވާ ގޮތުގައި މި ބައްދަލުވުން ކުރިޔަށް ގެންދިޔައީ އަންގާރަ ދުވަހެވެ. އަދި މި ބައްދަލުވުމުގައި ކަމާގުޅުންހުރި ފަރާތްތަކުން ވަނީ ބައިވެރިވެފައެވެ.

މި ބައްދަލުވުމުގައި މަޝްވަރާ ކުރެވުނު ކަންތައްތަކުގެ ތެރޭގައި، މަސްތުވާތަކެއްޗާ ދެކޮޅަށް މަސައްކަތްކުރާ އަމިއްލަ ޖަމްޢިއްޔާތައް ބާރުވެރިކުރުވުމާއި، އެ ފަރާތްތަކުގެ ރޯލު ފުޅާކުރުމަށް ފޯރުކޮށްދެވޭނެ އެހީތެރިކަމަކާ ގުޅޭ ގޮތުން މަޝްވަރާކުރެވުނެވެ. 

މީގެ އިތުރުން، މުރާޖަޢާ ކޮމިޓީން މައްސަލަތައް ނިންމުމުގެ މަރުޙަލާ އަވަސްކުރުމަށް ވެސް މި ބައްދަލުވުމުގައި ނިންމާފައިވެއެވެ. އަދި މި ބައްދަލުވުމުގައި ނިންމުނު ކަންތައްތަކުގެ ސަބަބުން، މަސްތުވާތަކެއްޗާ ދެކޮޅަށް ކުރެވޭ މަސައްކަތްތައް އިތުރަށް ހަރުދަނާވެ، ފަރުވާގެ ޚިދުމަތްތައް އިތުރަށް ފުޅާވެގެންދާނެ ކަމަށް އުންމީދުކުރެވޭ ކަމަށްވެސް އެންޑީއޭ އިން ވަނީ ހާމަކޮށްފައެވެ.

ފަރުވާއަށް މީހުން ވެއްދުމަށް ދެން ނިންމުނު އަނެއް ކަމަކީ، ފަރުވާ ފުރިހަމަ ނުކުރާ ފަރާތްތަކަށް ފިޔަވަޅުއެޅުމެވެ. 

މި ބޮޑު ޤައުމީ މައްސަލައާ ދެކޮޅަށް ފުލުހުންނާއި އެންޑީއޭއިން މިހާރު ހިންގަމުންދާ ޕްރޮގްރާމުގެ ތެރެއިން މަސްތުވާތަކެތި ބޭނުންކުރާ 100 އަށްވުރެ ގިނަ މީހުން މިހާތަނަށް ފަރުވާގެ ނިޒާމުގެ ތެރެއަށް ވަނީ ވައްދާފައެވެ.

މި ޕްރޮގްރާމްގެ ދަށުން ރިހެބިލިޓޭޝަން ފަރުވާ ޢަމާޒުކުރަނީ، މަސްތުގެ ޙާލަތުގައި މުޖުތަމަޢުގެ ތެރޭގައި އުޅޭ މީހުންނަށެވެ. އެގޮތުން މަގުމަތީގައި ސަލާންޖަހަން އުޅޭ މަސްތުވާތަކެތި ބޭނުންކުރާ މީހުންނާއި ވައްކަމާއި ފޭރުމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގައި ނިދާ، މަގުމަތިވެފައިވާ މީހުން ފަރުވާ ނިޒާމަށް ގެނެސް، އެ މީހުންނަށް ބޭނުންވާ ފަރުވާ ދަނީ ދެމުންނެވެ.