ރާއްޖެއަށް ޑްރަގް އެތެރެކުރި 65 އަހަރުގެ މީހަކު ހައްޔަރުކޮށްފި!

ރާއްޖެއަށް ޑްރަގް އެތެރެކުރި 65 އަހަރުގެ ދިވެހި ފިރިހެނަކު ހައްޔަރުކޮށްފިއެވެ. 

މި މައްސަލައާ ގުޅިގެން ހައްޔަރުކޮށްފައި ވަނީ އައްޑޫ ސިޓީ ހިތަދޫއަށް ނިސްބަތްވާ މީހެކެވެ.

އޭނަ އަކީ ސެޕްޓެމްބަރު 16 ވަނަ ދުވަހު ރާއްޖެ އައި ސްރީލަންކަން އެއަރލައިންސް ފްލައިޓް ނަންބަރު UL103އިން ރާއްޖެއަށް މަސްތުވާތަކެތި އެތެރެ ކުރި މީހެކެވެ.

އޭނާގެ އަތުން މަސްތުވާތަކެތި ފެނިފައި ވަނީ ބަލައި ފާސްކުރުމުގެ ތެރޭގައެވެ. އޭނާގެ އަތުން 3.49ގ ގެ ހެރޮއިން ފެނިފައި ވެއެވެ.

މިމައްސަލާގައި ހައްޔަރުކޮށްފައިވާ މީހާ އަކީ ބަންދާއި ހައްޔަރުގެ ރެކޯޑް އޮންނަ މީހެކެވެ. މިމައްސަލައާ ގުޅިގެން އެ މީހާގެ ބަންދަށް ކްރިމިނަލް ކޯޓުން ވަނީ 15 ދުވަސް ޖަހައިފައެވެ.