ޚަބަރު
"ރެޑީ ފޯރ ފިއުޗަރ"ގެ ނަމުގައި ޒުވާނުންގެ ހުނަރުތައް ތަރައްޤީކުރުމަށް ޚާއްޞަ ޕްރޮގްރާމެއް

ޒުވާނުންގެ ފަންނު ތަރައްޤީ ކުރުމަށް ކޮންމެ މަހަކު ބާއްވާ ފަންނު އުފާ / ފޮޓޯ: ޕީއެސްއެމް ނިއުސް
ޒުވާނުންނަށް ދިރިއުޅުމުގެ ހުނަރުތައް ދަސްކޮށްދިނުމަށް "ރެޑީ ފޯ ފިއުޗާރގެ " ނަމުގައި ޚާއްސަ ޕްރޮގުރާމެއް ބޭއްވުމަށް ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއިން ހަމަޖައްސަވައިފިއެވެ.
މި ޕްރޮގުރާމަކީ ކުރިމަގުގައި ދިމާވެދާނެ ގޮންޖެހުންތަކާއި، ޖިސްމާނީ އަދި ނަފްސާނީ ގޮތުން އުނދަގޫ ޙާލަތްތަކުގައި ޢަމަލުކުރަންވީ ގޮތްތަކުގެ ތަމްރީނު ޒުވާނުންނަށް ފޯރުކޮށްދިނުމަށް ބާއްވާ ޕްރޮގުރާމެކެވެ.
މި މަހުގެ 22 ވަނަ ދުވަހުން 24 ވަނަ ދުވަހާ ހަމައަށް، ބޭއްވުމަށް ކަނޑައެޅިފައިވާ "ރެޑީ ފޯ ފިއުޗާރ" ޕްރޮގްރާމުގައި، އަމިއްލަ ނަފްސަށް އޮންނަ އިތުބާރު ދަމަހައްޓާނެ ގޮތްތަކާއި، މުވާސަލާތި ހުނަރުތައް އިތުރުކުރާނެ ގޮތްތައް ކިޔައިދީ، ދިމާވާ ގޮންޖެހުންތަކާއެކު ވެސް ޤާބިލު މީހަކަށް ވާނެގޮތުގެ ތަމްރީނުތައް ދެވިގެންދާނެއެވެ.
18 އަހަރާއި 35 އަހަރާ ދެމެދުގެ ޒުވާނުންނަށް އަމާޒުކޮށްގެން ކުރިއަށް ގެންދާ މިޕްރޮގްރާމުގައި ޒުވާނުން އެކަކު އަނެކަކާ ގުޅިގެން ކުރެވޭނެ އެކިއެކި ހަރަކާތްތަކާއި، އިސްވެ މަސައްކަތްކުރުމުގެ ހުނަރުތައް ތަރައްޤީކުރުމުގެ ތަފާތު އެކި ހަރަކާތްތައް ކުރިއަށްގެންދިއުމަށް ވަނީ ހަމަޖެހިފައެވެ.
ޒުވާނުން ބާރުވެރިކުރުމާއި މަޢުލޫމާތާއި ފަންނާ ބެހޭ ވުޒާރާއިން ގެންދަނީ ޒުވާނުން ބާރުވެރިކުރުވުމަށް ތަފާތު ޕްރޮގްރާމްތަކެއް ހިންގަވަމުންނެވެ. އެގޮތުން ޔޫތު ވެލްނެސް ލައުންޖްގެ ނަމުގައި ޒުވާނުން ބާރުވެރިކުރުމަށް ޚާއްޞަ ޕްރޮގްރާމެއްވެސް ދަނީ ކުރިއަށްގެންދަވަމުންނެވެ. މިޕްރޮގްރާމަކީ ޖިސްމާނީ އަދި ނަފްސާނީ ގޮތުން ދުޅަހެޔޮ ސިއްހަތެއްގައި އުޅުމަށް ޒުވާނުން ބާރުވެރިކުރުމަށް ހިންގާ ޕްރޮގްރާމެކެވެ.