މާލެ ސަރަހައްދުގެ ގޭތަކަށް މާދަމާ މެންދުރު މަސްދަޅުކޭސް ބަހަން ފަށަނީ

2025 ވަނަ އަހަރު ރަމަޟާން މަހަށް ސަރުކާރުން ގޭބީސީތަކަށް ހަދިޔާކުރާ މަސްދަޅު ކޭސްތައް ބެހުން، މާދަމާ މެންދުރުފަހު ފަށާނެކަމަށް މާލެ ސިޓީ ކައުންސިލުން މަޢުލޫމާތު ދެއްވައިފިއެވެ.

މާލެ ސިޓީ ކައުންސިލުން ނެރެފައިވާ އިޢުލާނުގައި ވަނީ، މާލެ ސަރަހައްދުގެ ގެތަކަށް މަސްދަޅު ބެހުން ކުރިއަށް ދާނީ މާދަމާއިން ފެށިގެން ފެބްރުއަރީ މަހުގެ 28 ވަނަ ދުވަހުގެ ނިޔަލަށް ކަމަށެވެ. 

މަސްދަޅު ކޭސް ބެހުމަށް ހަމަޖެހިފައިވާ ވަގުތުތައް: 

ހުކުރުދުވަސް ފިޔަވާ ކޮންމެ ދުވަހެއްގެ:

• މެންދުރުފަހު 14:30 - 18:00 އަށް
• ރޭގަނޑު 20:30 – 23:00 އަށް

މަސްދަޅު ކޭސް ދޫކުރާ ތަންތަން:

• ތައިސޭކޮށި، އާންމު ހިދުމަތްތަކާ ބެހޭ ބައިން
• މިފްކޯގެ ހެޑް އޮފީހުގެ ގޯތިތެރެއިން
• ހުޅުމާލެ ފޭސް 1 (އުމަރު ޒާހިރު ބިލްޑިންގް)
• ހުޅުމާލެ ފޭސް 2 (ހިޔާ ޓަވަރު 10 ގެ ގްރައުންޑް ފްލޯ)
• ވިލިމާލެ (ސިޓި ކައުންސިލްގެ އޮފީސް)

މަސްދަޅު ކޭސް ބަލާ ދާއިރު ގޭބިސީގެ ކަރަންޓް ބިލްގެ އެންމެ ފަހު 3 މަހުގެ ބިލްގެ ތެރެއިން ކަރަންޓް މީޓަރު އެނގޭނެ ފަދަ ލިޔުމަކާއި އަދި ބަލާ އަންނަ މީހެއްގެ އައި.ޑީ ކާޑު ގެންނަން ސިޓީ ކައުންސިލުން އިރުޝާދުދެއްވައެވެ.

މަސްދަޅު ކޭސް ދޫކުރާނީ ހަމައެކަނި ދިވެހިންނަށް ކަމަށް ވެސް އެ ކައުންސިލްގެ އިޢުލާނުގައި ފާހަގަކޮށްފައިވެއެވެ.