ހުޅުމާލޭ ހޮސްޕިޓަލްގެ ޑައިލިސިސް ސެންޓަރަށް 30 އެނދު އިތުރުކުރަނީ

ހުޅުމާލެ ހޮސްޕިޓަލުގެ ޑަޔަލިސިސް ސެންޓަރުގެ ޚިދުމަތް ފުޅާކުރުމަށް އެ ސެންޓަރަށް 30 އެނދު އިތުރުކުރުމަށް ބަޔަކާ ހަވާލުކޮށްފިއެވެ. 

ހުޅުމާލެ ހޮސްޕިޓަލުގައި ބޭއްވި ރަސްމިއްޔާތެއްގައި މި ދެ މަސައްކަތް ޙަވާލުކޮށްފައި ވަނީ، އަމިއްލަ ފަރާތްތަކުން އުފައްދާފައިވާ ދެ ކުންފުންޏެއްކަމަށްވާ މެޑްޓެކް އާއި މެޑިކޮމްއާއެވެ. 

ހުޅުމާލެ ހޮސްޕިޓަލުގެ ޑައިލިސިސް ސެންޓަރަށް އިތުރުކުރާ 30 އެނދުގެ މަޝްރޫޢުގެ މަސައްކަތް 3 މަސް ދުވަހުގެ ތެރޭގައި ނިންމުމަށް ހަމަޖެހިފައިވާކަމަށް ހުޅުމާލެ ހޮސްޕިޓަލުން ވިދާޅުވެފައިވެއެވެ. މި އެނދުތައް ޤާއިމުކުރުމަށް ހަމަޖެހިފައި ވަނީ ހުޅުމާލެ އޮރެންޖު ހިޔާގައެވެ. 

މި މަޝްރޫޢުގެ މަސައްކަތް ނިމުމާއެކު، ޑައިލިސިސް ޚިދުމަތް ހޯދުމަށް މިހާރަށްވުރެ ފަސޭހަވާނެ ކަމަށާއި، ޑައިލިސިސް ޚިދުމަތް ހޯދުމަށް ގިނަ ބަޔަކު ވެއިޓްލިސްޓްކޮށް ކިއުގައިޖެހޭ މައްސަލައަށް ހައްލެއް އަންނާނެކަމަށް ހުޅުމާލެ ހޮސްޕިޓަލުން ވިދާޅުވެއެވެ. 

ހުޅުމާލޭ ހޮސްޕިޓަލުގެ ޑައިލިސިސް ސެންޓަރުގައި މިވަގުތު 10 އެނދު ޤާއިމްކޮށްފައިވާއިރު، އޭގެތެރެއިން އެއް އެނދަކީ ކުއްލި އެމަރޖެންސީ ހާލަތްތަކަށް ޚާއްޞަކުރެވިފައިވާ އެނދެކެވެ. އަދި މި 10 އެނދާއެކު މިސެންޓަރުން މިވަގުތު 80 އަށްވުރެ ގިނަ މީހަކަށް ދަނީ ފަރުވާދެމުންނެވެ. ހަމައެހެންމެ، މީގެކުރިން ވަކި ގަޑިތަކެއްގައި ދެމުން އައި މި ޚިދުމަތް 24 ގަޑިއިރަށް ލިބޭގޮތަށް ބަދަލުކޮށްފައިވާކަމަށް އެ ހޮސްޕިޓަލުން ވިދާޅުވެއެވެ.

ހުޅުމާލޭ ހޮސްޕިޓަލުގައި ޑައިލިސިސްގެ ޚިދުމަތް ދޭންފެށީ 2012 ވަނަ އަހަރުއެވެ. އޭގެ ފަހުން މިވީ މުއްދަތުގައި މި ޚިދުމަތުގެ ފެންވަރު މަތިކުރުމަށް އެހޮސްޕިޓަލުން ދަނީ ގިނަ މަސައްކަތްތަކެއްކުރަމުންނެވެ.