ޚަބަރު
ރޯދަމަހަށް ޚާއްސަކޮށްގެން ގެނައި އަސާސީ ބާވަތްތަކުގެ މުދާ އެސްޓީއޯއިން އަގުހެޔޮކޮށް ވިއްކަން ފަށައިފި

އެސްޓީއޯ/ ފޮޓޯ: ކޯރޕޮރޭޓް މޯލްޑިވްސް
ރޯދަމަހަށް ޚާއްސަކޮށްގެން ގެނައި ފިޔާ، ބިސް އަދި އަލުވި އެސްޓީއޯއިން އަގުހެޔޮކޮށް ވިއްކަން ފަށައިފިއެވެ.
ރޯދަމަހަށް އަސާސީ ތަކެތީގެ އަގު ބޮޑުވިޔަނުދީ ދެމެހެއްޓުމަށް ސަރުކާރުގެ ވިޔަފާރި ކުންފުނި އެސްޓީއޯއިން ކޮންމެ އަހަރަކު ވެސް އަސާސީ މުދާ ރައްޔިތުންނަށް ހެޔޮއަގުގައި ފޯރުކޮށްދެމުން ދެއެވެ. އެސްޓީއޯއިން ރޯދަމަހަށް ޙާއްސަކޮށްގެން މިހާރު އަސާސީ މުދާތައް ގެންނަން ފަށާފައިވާއިރު އެ ކުންފުނިން ގެނެސްފައިވާ ފިޔާ، ބިސް، އަލުވި އަދި ލުނބޯ މިހާރު ވަނީ ވިއްކަން ފަށާފައެވެ. އަދި މިތަކެތި އެސްޓީއޯއިން ވިއްކަނީ ބާޒާރުގައި އާންމުކޮށް މިހާރު ހުރި ވަރަށް ވުރެ ހެޔޮކޮށެވެ.
އެސްޓީއޯއިން އަގުހެޔޮކޮށް ވިއްކަމުންދާ އަސާސީ މުދާތަކާއި އަގުތައް:
- ބިސް ކޭހެއް - 320 ރުފިޔާއަށް (ވަކިން 2ރ. ބިހެއް)
- އަލުވި ބަސްތާއެއް - 310 ރުފިޔާއަށް (18ރ. ކިލޯއެއް)
- ފިޔާ ބަސްތާއެއް - 310 ރުފިޔާއަށް (14ރ. ކިލޯއެއް)
- ލުނބޯ [5 ކިލޯގެ ކޭހެއް] - 145 ރުފިޔާއަށް (40ރ. ކިލޯއެއް)
މި ތަކެތި އެސްޓީއޯގެ ހޯލްސޭލް ސެންޓަރާއި އިންޑަސްޓްރިއަލް ވިލެޖް ޒޯންގައި ހުންނަ އެސްޓީއޯ ވެއާހައުސްއިން ގަނޑުކޮށް ލިބޭނެކަމަށް އެކުންފުނިން ވިދާޅުވެއެވެ. މީގެއިތުރުން ރީޓެއިލްކޮށް މިތަކެތި އެސްޓީއޯ ޕީޕަލްސް ޗޮއިންސްއިން ލިބޭނެއެވެ.