ޚަބަރު
ކުދި މާރުކޭޓުތަކަށް އަމާޒުކުރި އޮޕަރޭޝަންގައި ދެ ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސްފި
އިމިގްރޭޝަނުން މިދިޔަ އަހަރު ހިންގި އޮޕަރޭޝަނެއްގެ ތެރެއިން، ފޮޓޯ: މޯލްޑިވްސް އިމިގްރޭޝަން
ހުލާސާ
މި އޮޕަރޭޝަންގައި ފަސް ތަނެއް ބަލާފައިވޭ.
މާލޭގައި ހިންގާ ކުދި މާރުކޭޓުތަކަށް އަމާޒުކޮށް އިއްޔެ ކުރިޔަށް ގެންދިޔަ ރެއިޑް އޮޕަރޭޝަންގައި ދެ ބިދޭސީއަކު މޯލްޑިވްސް އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން ހާމަކޮށްފައިވާ ގޮތުގައި އިއްޔެގެ އޮޕަރޭޝަނުގައި މާލޭގެ އެކި ސަރަޙައްދުތަކުގައި ހިންގަމުން އަންނަ 5 މާރުކޭޓެއް ވަނީ ބަލާފާސްކޮށްފައެވެ. އަދި މި އޮޕަރޭޝަންގައި އިމިގްރޭޝަންގެ ބެލުމުގެ ދަށަށް ގެންދިޔަ ދެ ބިދޭސީންނަކީ ވެސް، އިމިގްރޭޝަންގެ ޤާނޫނާ ޚިލާފަށް މަސައްކަތްކުރަމުން ދިޔަ ބިދޭސީންކަމަށް އެ މުވައްސަސާއިން ހާމަކޮށްފައިވެއެވެ.
ނަމަވެސް މި ބިދޭސީންގެ ޝަޙްސާއި ޤައުމީ ނިސްބަތް އެ އިދާރާއިން ހާމަކޮށްފައެއް ނުވެއެވެ.
ގަވާއިދާ ޚިލާފަށް ވިޔަފާރިކުރަމުންދާ ބިދޭސީން ހޯދުމަށް ހުއްޓުމެއްނެތި ކުރިއަށްގެންދާ ރެއިޑު އޮޕަރޭޝަންތަކުގެ ތެރެއިން، އިއްޔެ މާލޭގައި ހިންގަމުންދާ 5 ކުދި މާރުކޭޓެއް ވަނީ ބަލައި ފާސްކޮށްފައި. މި އޮޕަރޭޝަންގެ ތެރެއިން، ގަވާއިދާ ޚިލާފަށް މަސައްކަތްކުރަމުންދިޔަ 2 ބިދޭސީއެއް ވަނީ… pic.twitter.com/eYzNjWa1XO
— Maldives Immigration (@ImmigrationMV) February 19, 2025
މާލެ ތެރޭގައި ހިންގާ ކުދި މާރުކޭޓުތަކުގެ ގިނަ ގޮޅިތަކަކީ ވެސް މައިގަނޑު ގޮތެއްގައި މުޅިންހެން ބިދޭސީން ކޮންޓްރޯލް ކުރަމުން އަންނަ ތަންތަނެވެ. އަދި ޙާއްސަކޮށް ރޯދަމަހާ ގުޅިގެން، ހުސްކޮށް ހުންނަ ބިންތަކުގައި ވެސް ކުދި މާރުކޭޓު ހަދައިގެން ވިޔަފާރިކޮށް ހަދައެވެ. ނަމަވެސް، މި ގޮތަށް ހިންގާ ވިޔަފާރިތަކަށް ޙާއްސަ ޙުއްދަތަށް ނުނަގާތީ، ކަމާ ގުޅުންހުރި އިދާރާތައް އަންނަނީ މިފަދަ ކަންކަމަށް ފާރަވެރިވަމުންނެވެ.
އިމިގްރޭޝަނާއި، ބިދޭސީންގެ މައްސަލަ ޙައްލު ކުރުމަށް ހަދާފައިވާ ޓާސްކު ފޯހުން ގުޅިގެން އަންނަނީ، ރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން، މާލެ އާއި އަތޮޅު ތެރޭގައި އޮޕަރޭޝަންތައް ހުއްޓުމެއް ނެތި ހިންގަމުންދެއެވެ.
