ޚަބަރު
އެޗްޑީސީ އެޕްރެންޓިޝިޕް ޕްރޮގްރާމުން 28 ޒުވާނުން ދަސްވެނިވެއްޖެ

ެޗްޑީސީ އެޕްރެނޓިޝިޕް ޕްރޮގްރާމް 2024" ގެ ދަސްވެނިވުމުގެ ޖަލްސާ، ފޮޓޯ: އެޗްޑީސީ
މިނިސްޓްރީ އޮފް ޔޫތު އެމްޕަވާމަންޓް، އިންފޮމޭޝަން އެންޑް އާރޓްއާއި އެޗްޑީސީއާ ގުޅިގެން ހިންގި "އެޗްޑީސީ އެޕްރެނޓިޝިޕް ޕްރޮގްރާމް 2024 " ގެ ދަށުން 28 ޒުވާނުން ދަސްވެނިވެއްޖެއެވެ.
މޯލްޑިވްސް ނެޝަނަލް ސްކިލްސް ޑިވެލޮޕްމެންޓް އޮތޯރިޓީގެ ނެޝަނަލް ސްޓޭންޑަރޑްތަކާ އެއްގޮތަށް ކުރިޔަށް ގެންދިޔަ މި ޕްރޮގްރާމުގައި، 6 ދާއިރާއަކުން ކޯސްތައް ހިންގާފައިވެއެވެ.
އޭގެ ތެރޭގައި ހިމެނެނީ:
- ކޮމްޕިއުޓާ ހާޑްވެއާ އެންޑް ނެޓްވޯކިން
- ކޮންސްޓްރަކްޝަން ސައިޓް ސުޕްވައިޒޭޝަން
- އިލެކްޓްރިކަލް އިންސްޓްލޭޝަން އެންޑް މެއިންޓެއިނެންސް
- ފްރޮންޓް އޮފީސް
- ގާޑެނިން
- ހެލްތު އެންޑް ސޭފްޓީ އިން ކޮންސްޓްރަކްޝަން
މި ޕްރޮގްރާމަކީ މަސައްކަތުގެ މާހައުލުގައި ތިބެގެން އެ މަސައްކަތުގެ ތަޖުތިބާކާރުންގެ ބެލުމުގެ ދަށުން މަސައްކަތްތައް ދަސްކޮށް، ތަމްރީނާއި ތަޖުރިބާ ހޯދުމުގެ ފުރުސަތު ގައުމީ ފެންވަރުގައި ހުޅުވާލައިގެން ކުރިއަށްގެންދާ ޕްރޮގުރާމެއްކަމަށް ޔޫތު މިނިސްޓްރީން ވަނީ ހާމަކޮށްފައެވެ.
އަދި މި ޕްރޮގްރާމުގެ މައިގަނޑު އެއް މަޤުސަދަކީ، މަސައްކަތްތެރިކަމުގެ ދާއިރާއިން ތަމްރީނު ހޯދުމަށް ޝައުގުވެރިހާ ހުރިހާ އުމުރެއްގެ ދިވެހީންނަށް އެ ފުރުސަތު ހޯދައިދީ، އެ މުވައްޒަފުންނަކީ މަސައްކަތްތެރިކަމުގެ ދާއިރާއިން ސަރުކާރު ޤަބޫލުކުރާ ފެންވަރުގެ ބަޔަކަށް ހެދުންކަމަށް ވެސް މިނިސްޓްރީން ހާމަކޮށްފައިވެއެވެ.
މީގެ އިތުރުން، ނެޝަނަލް ކޮމްޕިޓެންސީ ބޭސްޑް ޓްރެއިނިންގް ސްޓެންޑާރޑް ތަކުގައި ހިމަނާފައިވާ ހުރިހާ ކޮމްޕިޓެންސީއެއް ހާސިލްކުރުވައި،
ފަންނީ ޤާބިލް ދިވެހީން އުފައްދުމާއެކު، ދިވެހީންނަށް ކުރެވޭ މަސައްކަތްތަކަށް ބިދޭސީންގެ ބަދަލުގައި ދިވެހީން ބޭނުންކުރުމަށް ބާރު އެޅުން ހިމެނެއެވެ.
އަދި ތެދުވެރިކަމާއި، ނަޒާހަތްތެރިކަމާއިއެކު އަމިއްލަ މަސައްކަތުން ދިރިއުޅުމުގެ ޚަރަދުބަރަދު ހަމަޖައްސާލެވޭނެ މިންވަރުގެ އާމްދަނީއެއް ހޯދައި، އަބުރުވެރިކަމާއިއެކު ދިރިއުޅެވޭނެމަގު ޒުވާން ދިވެހީންނަށް ފަހިކޮށްދިނުމަކީ ވެސް މިޕްރޮގުރާމުގެ މަޤްސަދެއްޖަމަށް ޔޫތު މިނިސްޓްރީން ވަނީ ހާމަކޮށްފައެވެ.
ނެޝަނަލް އެޕްރެންޓިސްޝިޕް ޕްރޮގްރާމްގެ ދަށުން ތަމްރީނުތައް ކުރިޔަށް ދާނީ މައިގަނޑު 6 ދާއިރާއަކަށް ހާއްސަ ކުރެވިގެންނެވެ. އޭގެ ތެރޭގައި ފަތުރުވެރިކަމުގެ ދާއިރާ، ދަތުރުފަތުރުގެ ދާއިރާ، އިމާރާތްކުރުމުގެ ދާއިރާ، އިޖްތިމާއީ ދާއިރާ، މަސްވެރިކަމާއި ދަނޑުވެރިކަމުގެ ދާއިރާ، އަދި އިންފޮމޭޝަން، ކޮމިޔުނިކޭޝަން ޓެކްނޮލޮޖީ ދާއިރާ ހިމެނެއެވެ.