ހަ ރަށެއްގައި މިސްކިތް ބިނާކުރުމުގެ މަސައްކަތް ރޯދަ ފަހުން ފަށަނީ

ހަ ރަށެއްގައި މިސްކިތް ބިނާކުރުމުގެ އަމަލީ މަސައްކަތް ރަމަޟާން މަހުގެ ފަހުން ފެށޭނެ ކަމުގައި އިސްލާމީ ކަންތައްތަކާއި ބެހޭ ވުޒާރާއިން ވިދާޅުވެއްޖެއެވެ.

ކުރިއަށް އޮތް ރަމަޟާން މަހަށް ފަހު 6 ރަށެއްގައި މިސްކިތް އެޅުމުގެ ޢަމަލީ މަސައްކަތް ފެށިގެންދާނެކަމަށް އެ އިދާރާއިން މަޢުލޫމާތުދެއްވައެވެ. މިސްކިތް ބިނާކުރުމަށް ކަނޑައަޅާފައިވާ ރަށްރަށަކީ، އއ.ރަސްދޫ، އދ.ފެންފުށި، ފ.ފީއަލި، ގދ. މަޑަވެލި، ހ.އ ބާރަށުގެ އިތުރުން ތ.ވޭމަންޑޫއެވެ.

އިސްލާމީ ކަންތައްތަކާ ބެހޭ ވުޒާރާއިން ބިނާކުރަން ނިންމާފައިވާ މިސްކިތްތައް ބިނާ ކުރުމަށް ރޭވިފައި ވަނީ 3 ސައިޒަކަށްކަމަށް އެ ވުޒާރާއިން ވިދާޅުވެފައިވެއެވެ. މިގޮތުން، 300 މީހުންގެ ޖާގައިގެ މިސްކިތާއި، 500 މީހުން، އަދި 700 މީހުންގެ ޖާގައިގެ މިސްކިތްތައް ބިނާކުރުމަށް ވެސް ވަނީ ރޭވިފައެވެ. 

މި މިސްކިތްތައް ޑިޒައިން ކުރެވިފައި ވާނީ މިސްކިތުގައި ޤުރުއާން ކިޔަވައިދެވޭ ގޮތަށް ކްލާސް ރޫމް ހިމެނޭގޮތަށެވެ. މީގެއިތުރުން މިސްކިތްތައް ނިމޭއިރު ހުންނާނީ ސޯލާ އާއި އެކު އޭސީ ކުރެވި، ނެވިލޯން ވެސް އެޅިފައި ކަމުގައި ވެސް އެ ވުޒާރާއިން ވިދާޅުވިއެވެ.

އެ ވުޒާރާއިން ވިދާޅުވީ މިސްކިތްތައް ފަރުމާ ކޮށްފައިވަނީ ރިޔަން ޕްރައިވެޓް ލިމިޓެޑްގެ ފަރާތުން ކަމަށާއި، މިސްކިތްތައް ފަރުމާކުރެވުފައި ވަނީ ރާއްޖޭގެ ތާރީހާއި ސަޤާފަތާއި މާހައުލާއި ގުޅޭގޮތަށް ކަމަށެވެ.