އެމްބައްޕޭގެ ހެޓްރިކަކާއެކު މެންޗެސްޓަރ ސިޓީ ޗެމްޕިއަންސް ލީގުން ކަޓުވާލައިފި

ޔޫއެފާ ޗެމްޕިއަންސް ލީގުގެ ޕްލޭ-އޮފްގެ ދެވަނަ ލެގުގައި ކީލިއަން އެމްބައްޕޭ ހެދި މޮޅު ހެޓްރިކަކާއެކު، މުބާރާތް އެންމެ ފަހުން ކާމިޔާބުކުރި ރެއާލް މެޑްރިޑުން، އިނގިރޭސި ޗެމްޕިއަން މެންޗެސްޓަރ ސިޓީ ކަޓުވާލައިފިއެވެ.

ރެއާލްގެ ބާރނަބެއު ސްޓޭޑިއަމްގައި ކުޅުނު މި މެޗަށް ސިޓީއިން ނިކުތީ، ޕްލޭ-އޮފްގެ ފުރަތަމަ ލެގުގައި ލިބުނު 3-2ގެ ނާކާމިޔާބީ ބަދަލުކޮށްލުމަށެވެ. ނަމަވެސް މެޗުގެ ފުރަތަމަ ހަތަރު މިނެޓުގެ ތެރޭގައި ރައުލް އެސެންސިއޯ ދިން ބޯޅައަކުން، ސިޓީގެ ގޯލުކީޕަރ އެޑަސަންގެ ބޯމަތިން ހިއްލާލުމަށްފަހު އެމްބައްޕޭ ކާމިޔާބުކުރި ގޯލާއެކު، ސިޓީއަށް ކުރަން ޖެހުނު މަސައްކަތް އިތުރުވިއެވެ.

އަނިޔާގެ ސަބަބުން އަރލިން ހާލަންޑާއި ނުލާ ކުޅެމުންދިޔަ ސިޓީއަށް އިތުރު ގޮންޖެހުމަކަށްވީ، އެމްބައްޕޭގެ ގޯލަށްފަހު އެ ޓީމުގެ ފަހަތަށް ކުޅެމުންދިޔަ ޖޯން ސްޓޯންސްއަށް އަނިޔާވެ އޭނާ ބަދަލުކުރަން ޖެހުމެވެ. 

ފުރަތަމަ ހާފުގައި ރެއާލްއިން ވަނީ އިތުރު ގޯލެއް ކާމިޔާބުކޮށް އެ ޓީމުގެ ލީޑު ފުޅާކޮށްފައެވެ. މި ގޯލު ވެސް ކާމިޔާބުކޮށްދިނީ އެމްބައްޕޭއެވެ. ސިޓީގެ ޕެނަލްޓީ އޭރިއާ ތެރެއިން ރޮޑްރީގޯ ދިން ބޯޅަ ގޯލުގެ ތެރެއަށް އޭނާ ފޮނުވާލީ، ސިޓީގެ ޑިފެންޑާރ، ޖެސްކޯ ވާޑިއޯލް ކައިރިން ރީތިކޮށް ނައްޓާލުމަށްފަހުއެވެ.

އެމްބައްޕޭގެ ހެޓްރިކް ފުރިހަމަކުރީ ދެވަނަ ހާފުގައެވެ. މެޗުގެ 61 މިނެޓުގައި ކަނާތްފަރާތުން ތިރިތިރިން ފޮނުވާލި ބޯޅަ ގޮސް ވަނީ ގޯލުގެ ދުރު ކަނަށެވެ.

ސިޓީއަށް މެޗުގައި ކާމިޔާބުކުރެވުނު ހަމައެކަނި ގޯލު ފެނިގެން ދިޔައީ މެޗުގެ އިތުރު ވަގުތުގައެވެ. އެއީ ރެއާލްގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމެއްގައި އޮމަރު މަރްމޯޝް ފޮނުވާލި ބޯޅަ ގޯލުގެ ހުރަސްދަނޑީގައި ޖެހިފައި ނިކުތުމުން، ނިކޯ ގޮންޒާލޭޒް ކާމިޔާބުކުރި ގޯލެކެވެ. މިއީ ސިޓީއަށް އޭނާ ކާމިޔާބުކޮށްދިން ފުރަތަމަ ގޯލު ވެސް މެއެވެ.

މި ނަތީޖާއާއެކު، ރެއާލުން ގަދަ-16އަށް ދަތުރުކުރީ 6-3ގެ އެގްރިގޭޓް ސްކޯރއަކާއެކުއެވެ. 

މިއީ މާޔޫސްވެފައިހުރި ސިޓީގެ ކޯޗު، ޕެޕް ގާޑިއޯލާއަށް، އެ ޓީމު ވަރުގަދަކުރަން ބޮޑު ބަދަލުތަކެއް ގެންނަންޖެހޭކަން ހާމަކޮށްދިން އިތުރު މެޗެކެވެ.