ސައިންސް / ދުނިޔެ

އަހަރުތަކަކަށްފަހު އިޖިޕްޓުން ފިރުއައުނާގުޅުންހުރި މަހާނައެއް ހޯދައިފި

އަހަރުތަކަކަށްފަހު އިޖިޕްޓުން ފިރުއައުނާގުޅުންހުރި މަހާނައެއް ހޯދައިފި

އަހަރުތަކަކަށްފަހު އިޖިޕްޓުން ފެނުނު ފިރުއައުނާގުޅުންހުރި މަހާނަ

އާމިނަތު ޔުމްނާ

އާމިނަތު ޔުމްނާ

20 ފެބްރުއަރީ 2025، 08:03

20 ފެބްރުއަރީ 2025، 08:03

އިޖިޕްޓުގެ ތާރީޚުގައި ވަރަށް މުހިންމު ކުރިއެރުމެއް ލިބިއްޖެއެވެ. އެއީ 100 އަހަރަށްވުރެ ގިނަ ދުވަސްވީފަހުން އަލަށް ފިރުއައުނެއްގެ "ޓޫމްބް" ނުވަތަ މަހާނަ އެއް ހޯދުމެވެ. މި މަހާނައަކީ 18 ވަނަ ޑައިނަސްޓީގެ ފިރުއައުނު ތުތްމޯސް ދެވަނައިގެ ޓޫމްބްއެވެ.

ބްރިޓިޝް-އިޖިޕްޝަން ޓީމަކުން މި މަހާނަ ހޯދާފައިވަނީ ލަކްސޯ ސިޓީ ކައިރީގައިވާ ތީބަން ނެކްރޮޕޮލިސްގެ ހުޅަނގު ފަރާތު ވާދީތަކުންނެވެ. ކުރިން ދެކެފައިވާ ގޮތުގައި 18 ވަނަ ޑައިނަސްޓީގެ ފިރުއައުނުންގެ މަހާނަތައް ހުރީ މިތަނުން 2 ކިލޯމީޓަރު ދުރުގައި ހުންނަ "ވެލީ އޮފް ދަ ކިންގްސް" އާ ކައިރިންނެވެ.

މަހާނަ ހޯދި ޓީމުގެ ފީލްޑް ޑައިރެކްޓަރު ޑރ. ޕިއަރސް ލިތަރލޭންޑް ވިދާޅުވި ގޮތުގައި މަހާނައިގެ ފުރާޅުގެ ބައެއް އަދިވެސް ހަލާކުނުވެ ހުއްޓެވެ. އޭގައި ނޫކުލައިގެ ކުލަޖައްސާފައިވާއިރު ފުރާޅުގައި ރަން ކުލައިގެ ތަރިތައް ކުރަހާފައިވެއެވެ. މިފަދަ ފުރާޅުތައް ހުންނަނީ ހަމައެކަނި ފިރުއައުނުންގެ މަހާނަތަކުގައެވެ.

ތުތްމޯސް ދެވަނައިގެ މަމީ ދެ ގަރުނު ކުރިން ހޯދާފައިވީ ނަމަވެސް، އޭނާގެ އަސްލު މަހާނަ މިހާތަނަށް ނުހޯދުނެވެ. އޭނާގެ ވެރިކަން ކުރިއަށް ގޮސްފައިވަނީ ގާތްގަނޑަކަށް މީލާދީން ކުރީގެ 1493 އިން 1479 އަށެވެ. އޭނާއަކީ ޓުޓަންކާމަންގެ ކާބަފައިންގެ ތެރެއިން މީހެކެވެ. އަދި އޭނާއަކީ އިޖިޕްޓުގެ އެންމެ މަޝްހޫރު ފިރުއައުނުންގެ ތެރޭގައި ހިމެނޭ ހަތްޝެޕްސުޓްގެ ފިރިމީހާއެވެ.

ޑރ. ލިތަރލޭންޑް ވިދާޅުވި ގޮތުގައި މި މަހާނަ ހޯދުމުން 18 ވަނަ ޑައިނަސްޓީގެ ކުރީކޮޅުގެ ފިރުއައުނުންގެ މަހާނަތައް ހުރި ތަން އެނގުނެވެ. އެހެންނަމަވެސް މަހާނަ ހުސްކޮށް ހުރީ ވަގުން ވަގަށް ނެގީތީކީ ނޫނެވެ. އޭގެ ބަދަލުގައި މަހާނަ ހެދުމަށްފަހު އެތާގައި  ފެންބޮޑުވެގެން މަހާނައިގެ ތަކެތި އެހެން ތަނަކަށް ބަދަލުކޮށްފައިވާކަމަށް ބެލެވެއެވެ.

މި ހޯދުމަކީ އިޖިޕްޓޮލޮޖީއަށާއި އިންސާނީ ތާރީޚު ދެނެގަތުމަށް ލިބުނު ވަރަށް ބޮޑު ކުރިއެރުމެއް ކަމަށް އިޖިޕްޓުގެ ފަތުރުވެރިކަމާއި އާސާރީ ތަރިކައިގެ ވަޒީރު ޝަރީފް ފަތްހީ ވިދާޅުވިއެވެ.
                    

މި ލިޔުން ކިޔާލުމުން

Ads by MSS