ޚަބަރު
ދިވެހިރާއްޖޭގެ ލާމަރުކަޒީ ނިޒާމު ތަރައްޤީކުރުމުގައި ވެސް ޓެކްނޮލޮޖީ ބޭނުންކުރަނީ

މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވޯކްސްގެ ފަރާތުން ބޭއްވި ނޫސްވެރިންގެ ބައްދަލުވުން، ފޮޓޯ: ރައީސް އޮފީސް
ދިވެހިރާއްޖޭގެ ލާމަރުކަޒީ ނިޒާމު ތަރައްޤީކޮށް ހަރުދަނާކުރުމުގައި ވެސް ޓެކްނޮލޮޖީ ބޭނުންކުރަން ނިންމަވާފައިވާކަމަށް، މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވޯކްސް، އަލްފާޟިލް އާދަމް ޝަރީފް އުމަރު ވިދާޅުވެއްޖެއެވެ.
މިނިސްޓަރ ޝަރީފް މިހެން ވިދާޅުވީ، އެ މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައެވެ.
މިނިސްޓަރ ވިދާޅުވީ، ދިވެހިރާއްޖޭގެ ލާމަރުކަޒީ ނިޒާމު ތަރައްޤީކޮށް ހަރުދަނާކުރުމުގައި ކުރިން ގެންގުޅުއްވީ ހަތަރު ސިޔާސަތެއް ކަމަށާއި، ނަމަވެސް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އިޝާރާތަށް، ލާމަރުކަޒީ ނިޒާމުގެ ސިޔާސަތުތަކުގެ ތެރޭގައި ޓެކްނޮލޮޖީ ހިމެނުމަށް މިހާރު ނިންމަވާފައިވާކަމަށެވެ.
އަދި ރައީސުލްޖުމްހޫރިއްޔާ މިގޮތަށް އިޝާރާތްކުރެއްވީ، އެ މަނިކުފާނު އެސްޓޯނިއާއަށް ކުރެވެވި ރަސްމީ ދަތުރުފުޅާ ގުޅިގެން ދިވެހިރާއްޖޭގައި ޓެކްނޮލޮޖީގެ ނިޒާމު ހަރުދަނާކުރުމަށް މަސައްކަތްޕުޅުތަކެއް ފެއްޓެވި ހިސާބުންކަމަށް ވެސް މިނިސްޓަރު ވަނީ ވިދާޅުވެފައެވެ.
މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވޯކްސްގެ މަސައްކަތްތައް މައިގަނޑު ގޮތެއްގައި ބަހާލާފައިވަނީ ދެ ކަމަކަށެވެ. އެއީ ދިވެހި ރާއްޖޭގެ ލާމަރުކަޒީ ނިޒާމު ހަރުދަނާކޮށް ތަރައްޤީކުރުމަށްޓަކައި ސިޔާސަތުތަކެއް ކަނޑައެޅުމަށާއި، ދިވެހިރާއްޖޭގެ ޕަބްލިކް ވޯކްސްގެ ޚިދުމަތްތައް ހަރުދަނާކުރުމަށް ސިޔާސަތުތަކެއް ކަނޑައެޅުމަށެވެ.
އަދި މީގެ ތެރެއިން ލާމަރުކަޒީ ނިޒާމު ހަރުދަނާކުރުމަށްޓަކައި މައިގަނޑު 4 ސިޔާސަތެއް ކަނޑައަޅުއްވާފައިވާކަމަށް މިނިސްޓަރ ވިދާޅުވިއެވެ. ނަމަވެސް، ރާއްޖޭގެ ޓެކްނޮލޮޖީގެ ނިޒާމު ހަރުދަނާކުރުމަށް ފެއްޓެވި މަސައްކަތްޕުޅުގެ ތެރެއިން، މި ސިޔާސަތުތަކުގެ ތެރޭގައި ޓެކްނޮލޮޖީ ކުރިއެރުވުމުގެ ސިޔާސަތެއް ހިމެނުއްވުމަށް ނިންމެވީކަމަށް ވިދާޅުވިއެވެ.
ދިވެހިރާއްޖޭގެ ލާމަރުކަޒީ ނިޒާމު ތަރައްޤީކޮށް ހަރުދަނާކުރުމުގެ ސިޔާސަތުތައް:
- ކައުންސިލްތައް މާލީގޮތުން ބާރުވެރިކުރުވުން.
- ރަށްވެހި ޚިދުމަތް ފޯރުކޮށްދިނުމުގައި ކައުންސިލްތަކުގެ ދައުރުފުޅާ ކުރުން.
- ކައުންސިލްތަކަކީ ރައްޔިތުންގެ ބައިވެރިވުމާ މަޝްވަރައިގެ މަތިން، ހާމަކަން ބޮޑު ގޮތެއްގައި ހިންގާ، ޖަވާބުދާރީވަނިވި މުއައްސަސަތަކަކަށް ހެދުން.
- ލޯކަލް ގަވަންމެންޓު އޮތޯރިޓީއިން ކައުންސިލްތަކަށް ބޭނުންވާ އެހީތެރިކަން ސަރުކާރުގެ ތެރެއިން ފޯރުކޮށްދިނުމުގެ މަސައްކަތްކުރުން.
- ލާމަރުކަޒީ ނިޒާމުގައި ޓެކްނޮލޮޖީ ހިމެނުން.