ރަޖިސްޓްރީ ނުކޮށް ކާބޯތަކެތި ވިއްކާނަަމަ ފަސްލައްކަ ރުފިޔާގެ ޖޫރިމާނާއެއް!

ރަޖިސްޓަރީ ނުކޮށް ކާބޯތަކެތި ވިއްކާނަމަ ފަސްލައްކަ ރުފިޔާގެ ޖޫރިމަނާއެއް ކުރުމަށް އުޞޫލެއް އެކުލަވައިލައިފިއެވެ. 

ކާބޯތަކެތީގެ ޚިދުމަތްދޭ ތަންތަނާއި ފަރާތްތައް ރަޖިސްޓަރީކޮށް ލައިސަންސް ދޫކުރުމުގައި ޢަމަލުކުރާނެ އިންތިޤާލީ އުޞޫލު ބަޔާންކުރާ ޤަވާޢިދުގެ ނަމުގައި އެމްއެފްޑީއިން ވަނީ ޤަވާޢިދެއް ގެޒެޓްކޮށްފައެވެ.

 އެ ޤަވާޢިދުގެ ބުނެފައިވާ ގޮތުން އަންނަ އަހަރުގެ ފެބްރުއަރީ މަހުގެ 23 ވަނަ ދުވަހުގެ ކުރިން ކާބޯތަކެތީގެ ޚިދުމަތްދޭ ހުރިހާ ތަންތަނާއި ފަރާތްތަކުން ރަޖިސްޓްރީވާން ޖެހޭ ކަމަށެވެ.

އަދި ރަޖިސްޓަރީކޮށްފައިވާ ކާބޯތަކެތީގެ ޚިދުމަތްދޭ ތަންތަނާއި މީހުން ވެސް ގިނަވެގެން ހަ މަސް ދުވަހުގެ ތެރޭގައި ލައިސަންސް ހޯދުމަށްޓަކައި އެ އޮތޯރިޓީއަށް ހުށަހަޅަން ޖެހޭނެ ކަމަށް ވެސް ޤަވާޢިދުގައިވެއެވެ.

ޤަވާޢިދުގައި ބުނެފައިވަނީ އެ މުއްދަތުގައި ރަޖިސްޓްރީނުކޮށް ކާބޯތަކެތީގެ ޚިދުމަތް ދިނުމާއި ވިޔަފާރިކުރުމަކީ މަނާކަމެއް ކަމަށެވެ. ރަޖިސްޓްރީ ނުކޮށް ކާބޯތަކެތީގެ ޚިދުމަތް ދޭނަމަ އެކަމެއްގެ ކުޑަބޮޑުމިނަށް ބަލައިގެން 10،000 ރުފިޔާ އާއި 500،000 ރުފިޔާ އާ ދެމެދުގެ ޢަދަދަކުން ޖޫރިމަނާ ކުރެވޭނެ ކަމަށް ބުނެފައިވެއެވެ.

ކާބޯތަކެތި އުފެއްދުމާއި ތައްޔާރުކުރުމާއި ވިއްކުމާއި އިމްޕޯޓް ކުރުމާއި އެކްސްޕޯޓް ކުރުމާއި ރައްކާ ކުރުމާއި ފޯރުކޮށްދިނުމާއި ބަންދު ކުރުމާއި ހަދިޔާ ކުރުމާއި އޭގެ ވިޔަފާރި ކުރުން ވެސް އޭގެ ތެރޭގައި ހިމެނޭ ކަމަށް ބުނެފައިވެއެވެ.

މީގެއިތުރުން ޤަވާޢިދުގައި ބުނެފައުވަނީ އޮންލައިންކޮށް ރަޖިސްޓްރޭޝަނާއި ލައިސަންސަށް އެދެންޖެހޭނީ ސަރުކާރުގެ "ވަންގަވް" ޕޯޓަލް އާއި އެމްއެފްޑީއޭގެ "ދިރިތި" ޕޯޓަލަށް ކަމަށެވެ. އެ ދެ ތަނުގައި ރަޖިސްޓްރީ ވާން ޖެހޭ ތަންތަން ވަކިން ބަޔާންކޮށްފައިވެއެވެ.

އެމްއެފްޑީއިން ބުނެފައިވަނީ ވަގުތީ މާރުކޭޓުތަކާއި އުޅަނދުތަކާއި ސްޓޭންޑްތަށް ރަޖިސްޓްރީކުރަން ނުޖެހޭނެ ކަމަށެވެ. ނަމަވެސް އެ ތަންތަނުން ވެސް އެމްއެފްޑީއޭގެ މިންގަނޑުތަކާއި އެއްގޮތަށް ޢަމަލު ކުރަން ޖެހޭނެ ކަމަށްވެސް ބުނެފައިވެއެވެ.