ޚަބަރު
މާލޭގައި މަސްދަޅު ކޭސް ބަހާ އިތުރު ސައިޓެއް ހަމަޖައްސަން ނިންމައިފި

މަސްދަޅު ބެހުން/ ފޮޓޯ: ދަ އެޑިޝަން
ރޯދަމަހަށް ޚާއްސަކޮށްގެން ސަރުކާރުން ރައްޔިތުނަށް ބަހާ މަސްދަޅު ކޭސްތައް މާލޭގައި ބަހާ އިތުރު ސައިޓެއް ޤާއިމުކުރުމަށް ނިންމައިފިއެވެ.
ރާއްޖޭގެ ހުރިހާ ގޭބީސީއަކަށް މަސްދަޅު ދޭން ފަށާފައިވާއިރު، މަސްދަޅު ބެހުމަށް ކަނޑައެޅިފައިވާ ސަރަހައްދުތަކުގައި ގިނަ އަދަދެއްގެ މީހުން ކިއުޖެހިފައި ތިބޭ މަންޒަރު ދަނީ ފެންނަމުންނެވެ. މަސް ދަޅު ކޭސް މާލޭގައި ބަހަމުން ދިޔައީ މާލޭ މިފްކޯގެ އޮފީސް ހުންނަ ސަރަހައްދާއި އެމްޓީސީސީ ސޯމިލް، ވިލިމާލޭ ވެމްކޯ ސައިޓް، ހުޅުމާލޭ އުމަރު ޒާހިރު ބިލްޑިން އަދި ހުޅުމާލޭ ހިޔާ ޓަވަރު 10 ގައި ހުންނަ ޔޫތު ސެންޓަރުންނެވެ.
މާލޭގައި ރޯދަ ހަދިޔާ ބެހުމުގެ ކަންކަމާއި އާންމުން އެކަމަށް އިޖާބަ ދެއްވި މިންވަރަށް ބަލައި، ރޯދަ ހަދިޔާ ބަހާނެ އިތުރު ތަނެއް ހަމަޖައްސާނެ ކަމަށް، ލޯކަލް ގަވާރމެންޓް މިނިސްޓާރ އާދަމް ޝަރީފް، އެކްސްގައި ކުރެއްވި ޕޯސްޓެއްގައި ވިދާޅުވެފައިވެއެވެ.
މަސް ދަޅު ބަހަން ކުރިން ނިންމާފައި އޮތީ މި މަހުގެ 28އާ ހަމައަށެވެ. ނަމަވެސް މިނިސްޓަރު ވިދާޅުވީ އެ މުއްދަތަށް ފަހު ވެސް މަސްދަޅު ބެހުމުގެ ކަންކަން ކުރިއަށް ގެންދާނެ ކަމަށެވެ. މަސްދަޅު ކިޔޫގައި ތިބެންޖެހޭ ވަގުތު ކުޑަ ކުރުމަށް ކުރެވޭނެ ކަންކަން ބަލައި، އެ ފިޔަވަޅުތައް ކުރިއަށް އޮތް ދުވަސްތަކުގައި އަޅާނެ ކަމަށް ވެސް މިނިސްޓަރު ވިދާޅުވިއެވެ.