ހަތް މަހުގެ ކުއްޖަކު ރޭޕް ކުރި މީހަކަށް އިންޑިއާގައި މަރުގެ އަދަބު ދީފި

އިންޑިއާގެ ކޮލްކަތާގައި ހަތް މަހުގެ ކުއްޖަކު ރޭޕް ކުރި މީހަކަށް މަރުގެ އަދަބު ދީފިއެވެ.

ކޮލްކަތާގެ ޚާއްސަ ކޯޓަކުން ރާޖީވް ގޯޝް ނަމަކަށް ކިޔާ މީހަކަށް މި މައްސަލައިގައި ވަނީ މަރުގެ ހުކުމް އިއްވާފައެވެ. މަރުގެ އަދަބުގެ އިތުރުން، އަނިޔާ ލިބުނު ކުއްޖާގެ އާއިލާއަށް 10 ލައްކަ ރުޕީސްގެ ބަދަލު ދިނުމަށް ވެސް ކޯޓުގެ ހުކުމުގައި ވެއެވެ.

ދަޢުވާ ކުރާ ފަރާތްތަކުން ވިދާޅުވާ ގޮތުގައި މި ހާދިސާ ހިނގާފައިވަނީ 2024 ވަނަ އަހަރުގެ ނޮވެމްބަރު 30 ވަނަ ދުވަހު ކޮލްކަތާގެ ބުރްތޮލާ ސަރަޙައްދުގައެވެ. މަގުމަތީގައި ދިރިއުޅޭ މައިންބަފައިން ކުއްޖާ ގެއްލިގެން ހޯދަމުންދަނިކޮށް، ގަޑިތަކެއް ފަހުން ވަނީ ބޮޑެތި އަނިޔާތަކާއެކު މަގުމަތިން ފެނިފައެވެ. މެޑިކަލް ޓެސްޓްތަކުން ދައްކާގޮތުން ކުއްޖާއަށް ވަނީ ޖިންސީ ގޯނާކޮށްފައެވެ.

ވަށައިގެންވާ ސަރަޙައްދުގެ ސީސީޓީވީ ފޫޓޭޖް ބެލުމަށްފަހު ފުލުހުން ތުހުމަތު ކުރެވޭ މީހާ ދެނެގަނެ، މި މައްސަލައިގެ ތަޙުޤީޤު އަވަސް މިނެއްގައި ނިންމައި، 26 ދުވަހުގެ ތެރޭގައި ދަޢުވާ ކުރުމަށް ކޯޓަށް ހުށަހެޅުނެވެ. އަދި އަވަސް މައްސަލައެއްގެ ގޮތުގައި ޝަރީޢަތް ކުރިއަށް ގެންދެވުނެވެ.

ދަޢުވާ ސާބިތުކުރުމަށް 24 ހެކިންނާއި 7 މެޑިކަލް މާހިރުންގެ ހެކިބަސް ނެގުނެވެ. އަދި ޑީއެންއޭ ހެކީގެ ގޮތުގައި ދައުވާ ލިބޭ މީހާގެ ދަތްތަކުގެ ނިޝާންތަކުގެ ތަޙުލީލުތައްވެސް ކޯޓަށް ހުށަހެޅުނެވެ.

އަނިޔާ ލިބުނު ކުއްޖާއަށް މިހާރު ވެސް ދަނީ ކޮލްކަތާގެ އާރުޖީ ކާރު މެޑިކަލް ކޮލެޖް އެންޑް ހޮސްޕިޓަލްގައި ނާޒުކު ޙާލަތެއްގައި ފަރުވާ ދެމުންނެވެ.