ހުޅުމާލޭގައި ހުރި ގުދަނެއްގައި އަލިފާނުގެ ހާދިސާއެއް ހިނގައިފި

ހުޅުމާލޭ ފޭސް-1ގައި ހުރި ގުދަނެއްގައި ރޭ އަލިފާނުގެ ހާދިސާއެއް ހިނގައިފިއެވެ.

މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފްގެ މާލޭ އޭރިޔާ ކޮމާންޑުން ހާމަކޮށްފައިވާ ގޮތުގައި މި އަލިފާނުގެ ހާދިސާގެ ރިޕޯޓު ސިފައިންނަށް ލިބިފައިވަނީ ރޭގެ 12:36 ހާއިރެވެ. 

އަލިފާން ރޯވެފައިވަނީ ހުޅުމާލޭ ފޭސް-1ގައި ހުންނަ "ފްރިޒް" ގުދަނުގެ 4 ވަނަ ފަންގިފިލާގައެވެ. އަދި މި ހާދިސާގެ ރިޕޯޓު ލިބުމާއެކު ހުޅުމާލެ ފަޔަރ ސްޓޭޝަންގެ ފަޔަރ ފައިޓަރުން ވަގުތުން ހަރަކާތްތެރިވެފައިވާކަން އެމްއެންޑީއެފްއިން ވަނީ ހާމަކޮށްފައެވެ.

މި އަލިފާންގަނޑު އިތުރަށް ނުފެތުރެނީސް އެމްއެންޑީއެފްއިން ވަނީ ގާތްގަނޑަށް ހާދިސާގެ ރިޕޯޓު ލިބުނުތާ ބައިގަޑިއިރުގެ ތެރޭގައި އަލިފާންގަނޑު ކޮންޓްރޯލްކޮށްފައެވެ. އެގޮތުން ރޯވެފައިހުރި އަލިފާން އެއްކޮށް ނިއްވާލެވިފައިވަނީ 01:03 ހާއިރެވެ.

މި ހާދިސާގައި އެއްވެސް މީހަކަށް އަނިޔާވެފައެއް ނުވެއެވެ.