މިރެއިން ފެށިގެން މަސްދަޅު ކޭސް ދޫކުރާނީ އޮންލައިންކޮށް ދޫކުރާ ޓޯކަން ތަރުތީބުން

މިރެއިން ފެށިގެން މާލޭ ސަރަޙައްދުގެ 13 ސަރަޙައްދަކުން މަސްދަޅު ކޭސް ދޫކުރުމަށް ނިންމާފައިވާއިރު، މި ސަރަޙައްދުތަކުން ޚިދުމަތް ދޭނީ އޮންލައިންކޮށް ދޫކުރާ ޓޯކަން ތަރުތީބަކުންކަމަށް، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާއިން ހާމަކޮށްފިއެވެ.

އެ ވުޒާރާއިން ވިދާޅުވީ، މަސްކޭސް ދޫކުރާ ތަންތަން އިތުރުކޮށް، މިކަމުގައި އޮންލައިން ޓޯކަން ނިޒާމެއް ޤާއިމްކުރުމަށް ނިންމީ، މަސްދަޅު ކޭސް ރައްޔިތުންނަށް ފޯރުކޮށްދިނުމުގައި ވީ އެންމެ ލުއިފަސޭހަ އިންތިޒާމުތައް ހަމަޖެއްސުމުގެ ގޮތުން ކަމަށެވެ.

މި ދުވަސްކޮޅަކީ ހޫނުގަދަ ދުވަސްކޮޅެއް ކަމުން، މަސްދަޅު ކޭސް ދޫކުރުމަށް ނިންމާފައިވަނީ ރޭގަނޑު އެކަންޏެވެ. އެގޮތުން ކޮންމެ ރެއެއްގެ 8:00 އިން 12:00 އަށް، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވުޒާރާއިން ކަނޑައަޅާފައިވާ ސަރަަޙައްދުތަކުން މަސްދަޅު ކޭސް ދޫކުރުން ކުރިޔަށްދާނެއެވެ.

އަދި މަސްދަޅު ކޭސް ދޫކުރާ ކޮންމެ ސަރަޙައްދަކަށް ވަކިވަކިން ޓޯކަން ނެގޭނެ އޮންލައިން ސިސްޓަމެއް ހަމަޖައްސާނެކަމަށް ވެސް އެ ވުޒާރާއިން ވަނީ ހާމަކޮށްފައެވެ. 

ކޮންމެ ސަރަޙައްދަކުން ވެސް ދޫކުރާނެ ވަކިއަދަދެއްގެ ޓޯކަން ކަނޑައަޅާފައިވާއިރު، ފޯނުން ޓޯކަން ނަންބަރު ނެގުމުގައި ދަތިވާ ބޭފުޅުންނަށް އެހީތެރިވެދޭނެކަމަށް ވެސް އެ ވުޒާރާއިން ވަނީ ހާމަކޮށްފައެވެ.

މަސްދަޅު ކޭސް ދޫކުރުމަށް މާލޭގެ 5 ސަރަޙައްދަކުން 8 ތަނެއް، އަދި ވިލިމާލޭގެ އެއް ތަނުގެ އިތުރުން، ހުޅުމާލޭގެ 4 ތަނެއް ވަނީ ކަނޑައަޅާފައެވެ. 

މާލެ ސަރަޙައްދުގައި މަސްދަޅު ކޭސް ދޫކުރާނެ ތަންތަނާއި، ވަކިވަކި ތަންތަނުން ދޫކުރާނެ ޓޯކަންގެ އަދަދުތައް:

• މިފްކޯ ކޮމްޕްލެކްސް (މާފަންނު): 200 ޓޯކަން
• އެމް.ޓީ.ސީ.ސީ ސޯމިލް: 200 ޓޯކަން
• ހެންވޭރު ދަނޑު: 100 ޓޯކަން
• ގަލޮޅު ދަނޑު – ސެޓަޕް 1 : 50 ޓޯކަން
• ގަލޮޅު ދަނޑު – ސެޓަޕް 2 : 50 ޓޯކަން
• ގަލޮޅު ދަނޑު – ސެޓަޕް 3 : 50 ޓޯކަން
• ގަލޮޅު ދަނޑު – ސެޓަޕް 4 : 50 ޓޯކަން
• ސޯޝަލް ސެންޓަރު : 100 ޓޯކަން
• ވިލިމާލެ – ވެމްކޯ ސައިޓް: 100 ޓޯކަން
• ހުޅުމާލެ – އުމަރު ޒާހިރު ބިލްޑިންގ: 100 ޓޯކަން
• ހުޅުމާލެ – ޕޮލްކޯ ޓަވރ (ސީ ބްލޮކް): 100 ޓޯކަން
• ހުޅުމާލެ – ހިޔާ ޓަވަރު 10 : 100 ޓޯކަން
• ހުޅުމާލެ – ކާމިލްދީދި ޕްރީސްކޫލް: 100 ޓޯކަން

މަސްދަޅުކޭސް ބަލައި އަންނައިރު އެ ފަރާތެއްގެ އައި.ޑީ.ކާޑާއި އެއްމަހުގެ ކަރަންޓު ބިލް ގެންނަންޖެހޭނެއެވެ. އަދި، އެއް ފަރާތަށް އެންމެ ގިނަވެގެން ދޫކުރާނީ، (3 މީޓަރަށް) 3 މަސްދަޅު ކޭހެވެ.

ފުރަތަމަ ދުވަހު ވެސް މާލެ ސަރަހައްދުގެ 9394 ގޭބީސީއަކަށް މަސްދަޅު ކޭސް ބަހާފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިން ވަނީ ވިދާޅުވެފައެވެ.