ޕެރޫގެ ފޫޑްކޯޓެއްގެ ފުރާޅު ވެއްޓި 3 މީހުން މަރުވެ، 74 މީހަކަށް އަނިޔާވެއްޖެ

ޕެރޫގެ އުތުރުގައި ހުންނަ  ޝޮޕިންގ ސެންޓަރެއްގެ ފޫޑްކޯޓުގެ ފުރާޅު ވެއްޓި، މަދުވެގެން 3 މީހުން މަރުވެ، 74 މީހުންނަށް އަނިޔާވެއްޖެކަމަށް އެ ގައުމުގެ އޮތޯރިޓީތަކުން ހުކުރު ދުވަހު ބުނެފިއެވެ.

ފަޔަރ ޑިޕާޓްމަންޓުގެ ކޮމާންޑަރ ގެލްކީ ގޮމެޒް އެމެރިކާ ޓީވީއަށް ދެއްވި މަޢުލޫމާތުގައި، މިހާތަނަށް މަރުވެފައިވަނީ 2 ފިރިހެނުންނާއި އަންހެނެއްކަމަށް ވިދާޅުވިއެވެ. އަދި ލޯކަލް ގަވަރމަންޓް ހެލްތު އޮފިޝަލް އަނީބަލް މޮރިލޯ ވިދާޅުވީ އަނިޔާވި މީހުންގެ އަދަދު 74 އަށް އަރާފައިވާ ކަމަށެވެ. އޭގެ ތެރޭގައި 10 ކުޑަކުދިންނާއި، 11 ބޮޑެތި މީހުން އަނިޔާ ލިބިފައިވާ މީހުން ހިމެނެއެވެ.

މި ހާދިސާ ހިނގީ ޕެރޫގެ ތިންވަނައަށް އެންމެ ބޮޑު ސިޓީ ކަމަށްވާ ޓްރުޖިލޯގައި ހުންނަ ރިއަލް ޕްލާޒާ ޝޮޕިންގ ކޮމްޕްލެކްސްގައެވެ. މި ސިޓީއަކީ ޕެރޫގެ ވެރިރަށް ލިމާއިން 500 ކިލޯމީޓަރު (310 މޭލު) އުތުރުގައި އޮންނަ ސިޓީއެކެވެ. ހާދިސާ ހިނގި ވަގުތު ފޫޑްކޯޓުގައި ގިނަ އަދަދެއްގެ އާއިލާތަކެއް ތިބިކަމަށް ލޯކަލް މީޑިއާތަކުން ރިޕޯޓުކޮށްފައިވެއެވެ.

މިހާރު ވެސް ސަތޭކައަށްވުރެ ގިނަ ފަޔަރ ފައިޓަރުންނާއި ފުލުހުން ހަލާކުވެފައިވާ ތަކެތީގެ ތެރެއިން އިތުރު މީހުން ހޯދުމުގެ މަސައްކަތުގައި އުޅެއެވެ. މޮރޮރިލޯ ވިދާޅުވި ގޮތުގައި އަދިވެސް އެއް ކުއްޖަކު ފުރާޅުގެ މެޓަލް ސްޓްރަކްޗަރގެ ދަށުގައި ޖެހިފައިވާކަމަށް ބެލެވެއެވެ.

އިންޓީރިއަރ މިނިސްޓަރ ޖުއާން ޖޮސޭ ސަންޓިވަނޭޒް އަންދާޒާކުރައްވާ ގޮތުގައި ވެއްޓުނު ފުރާޅުގެ ބޮޑުމިނަކީ 700 އިން 800 އަކަފޫޓެވެ. އަދި ސަލާމަތްކުރުމުގެ މަސައްކަތް ކުރިއަށް ގެންދިއުމަށް ހައިޑްރޯލިކް ކްރޭންތައް ބޭނުންވާކަމަށް އެ މިނިސްޓަރު ވިދާޅުވިއެވެ.

ރީޖަނަލް އެމަރޖެންސީ އޮޕަރޭޝަންސް ސެންޓަރުން ބުނާ ގޮތުގައި މި ހާދިސާ ހިނގީ ރޭ 8:41 ގައެވެ. ނަމަވެސް މި ހާދިސާގެ ރިޕޯޓު ލިބުނީ އޭގެ ގާތްގަނޑަކަށް ބައި ގަޑިއިރު ފަހުންނެވެ.