ޓެލަންގާނާގެ ހަދަމުންދާ ޓަނަލެއް ވެއްޓި 30 އަށްވުރެ ގިނަ މަސައްކަތްތެރިން ތާށިވެއްޖެ

އިންޑިއާގެ ޓެލަންގާނާގެ ނަގަރްކުރްނޫލް ސަރަހައްދުގައި ހަދަމުންދާ ޓަނަލެއް ވެއްޓި، 30 އަށްވުރެ ގިނަ މަސައްކަތްތެރިން ހާލުގައި ޖެހިފައިވާ ކަމަށް ބެލެވެއެވެ. މި ހާދިސާ ހިނގާފައިވަނީ މިއަދު ސްރީސައިލަމް ޑޭމުގެ ފަހަތުގައިވާ ސްރީސައިލަމް ލެފްޓް ބޭންކް ކެނާލް (އެސްއެލްބީސީ) ގެ ހަދަމުންދާ ބައެއްގައެވެ.

ފުލުހުން ހާމަކޮށްފައިވާ ގޮތުގައި ، މި ހާދިސާއާ ގުޅިގެން އިތުރު މައުލޫމާތު ހޯދުމަށް ކޮންސްޓްރަކްޝަން ކުންފުނިން ވަނީ އެސެސްމަންޓް ޓީމެއް ފޮނުވާފައެވެ. ކުންފުނީގެ ރަސްމީ ބަޔާނެއްގައި ބުނެފައިވާ ގޮތުން، ޓަނަލްގެ 14  ކިލޯމީޓަރުގައި ވައަތް ފަރާތުގެ ފުރާޅު 3 މީޓަރަށް ވެއްޓިފައިވަނީ މަސައްކަތްތެރިން އެތަނުގައި މަސައްކަތް ކުރަމުންދަނިކޮށެވެ. މި ޓަނަލް ހުޅުވާފައިވަނީ މީގެ ހަތަރު ދުވަސް ކުރިންނެވެ.

ޗީފް މިނިސްޓަރ ރެވަންތް ރެއްޑީ ވަނީ މި ހާދިސާއާ ގުޅިގެން ކަންބޮޑުވުން ފާޅުކޮށްފައެވެ. އޭނާ އޮންލައިން ޕޯސްޓެއްގައި ބުނެފައިވާ ގޮތުން، ގިނަ އަދަދެއްގެ މީހުންނަށް އަނިޔާވެފައިވާ ކަމަށް ބެލެވެއެވެ. ނަމަވެސް ވަކި އަދަދެއް އޭނާ ހާމަކޮށްފައެއް ނުވެއެވެ.

ޗީފް މިނިސްޓަރުގެ އޮފީހުން ބުނެފައިވާ ގޮތުން، މި ހާދިސާއާ ގުޅިގެން ޗީފް މިނިސްޓަރު ވަނީ ޑިސްޓްރިކްޓް ކަލެކްޓަރ، އެސްޕީ، ފަޔަރ ޑިޕާޓްމަންޓް، ހައިޑްރާ އަދި އިރިގޭޝަން ޑިޕާޓްމަންޓްގެ އޮފިޝަލުންނަށް ވަގުތުން ހާދިސާ ހިނގި ސަރަހައްދަށް ގޮސް އެހީތެރިކަން ފޯރުކޮށްދިނުމަށް އަންގާފައެވެ. އިރިގޭޝަން މިނިސްޓަރ އެން. އުއްތަމް ކުމާރު އާއި އެ މިނިސްޓްރީގެ އެހެން އޮފިޝަލުން ވަނީ ޚާއްޞަ ހެލިކޮޕްޓަރެއްގައި ހާދިސާ ހިނގި ސަރަހައްދަށް ފުރާފައެވެ.