ޔޫރަޕިއަން ޔޫނިއަނުން ކެފެއިން ބޭނުންކުރުމާ މެދު އިންޒާރު ދޭން ފަށައިފި

ޔޫރަޕިއަން ޔޫނިއަން (އީޔޫ) އިން ކެފެއިންއަކީ އިންސާނުންނަށް ގެއްލުން ހުރި އެއްޗެއްކަމަށް ބުނެ، އާ ކެމިކަލް ސޭފްޓީ ގަވާއިދުތަކެއްގެ ދަށުން އިންޒާރު ދޭން ފަށައިފިއެވެ. މިކަން ހާމަވެފައިވަނީ "ދަ ޓެލެގްރާފް" އިން ކުރި ރިޕޯޓަކުންނެވެ.

27 ޤައުމު ހިމެނޭ މި ބްލޮކުން އާ ގަވާއިދެއްގެ ދަށުން ކެފެއިން ޕެސްޓިސައިޑެއްގެ ގޮތުގައި ބޭނުންކުރުން ވެސް މަނާކޮށްފައިވެއެވެ. އަދި ކޮފީގެ މައިގަނޑު ބައިކަމުގައިވާ ކެފެއިންއަކީ ހިތަށާއި، ހަށިގަނޑުގެ ފެނުގެ މިންވަރަށާއި، ހަށިގަނޑުގެ ފިނިހޫނުމިނަށް ނޭދެވޭ އަސަރުކުރާ އެއްޗެއްކަމަށް ބުނެފައިވެއެވެ.

ޔޫރަޕިއަން ފުޑް ސޭފްޓީ އޮތޯރިޓީގެ ސައިންޓިފިކް ހެކިތަކަށް ބިނާކޮށް ރިޕޯޓުގައި ބުނެފައިވަނީ "ކެފެއިންއަކީ ބޮޑެތި މީހުންގެ ހިތުގެ ނިޒާމަށާއި، ހަށިގަނޑުގެ ފެނުގެ މިންވަރަށާއި، ހަށިގަނޑުގެ ފިނިހޫނުމިނަށް ނޭދެވޭ އަސަރުކުރާ އެއްޗެކެވެ. އަދި ބޮޑެތި މީހުންނާއި ކުޑަކުދިންގެ މައި ނާރުގެ ނިޒާމަށް (ނިދުމާއި، ކަންބޮޑުވުމާއި، އުޅުމުގައި އަންނަ ބަދަލުތައް) އަދި މާބަނޑު އަންހެނުންގެ ދަރިފުޅުގެ ބަރުދަނަށް ވެސް ނޭދެވޭ އަސަރުކުރާ އެއްޗެެއްކަމަށެވެ.

ޔޫރަޕިއަން ކޮމިޝަނުން މި އަމުރު ނެރެފައިވަނީ ފްރާންސްގެ ކުންފުންޏެއް ކަމަށްވާ ޕްރޮގަރެއިން އިން ކެފެއިން ބޭނުންކޮށްގެން ބައްޓާއި އަލުވި ދަނޑުތަކުން މަދިރި ދުރުކުރުމަށް ހުއްދައަށް އެދުމުންނެވެ. ނަމަވެސް މިކަމުގެ ސަބަބުން ޔޫރަޕުގެ ގިނަ މީހުން ބޯ މައިގަނޑު ބުއިމެއް ކަމުގައިވާ ކޮފީއަށް އަމާޒުކޮށް ބްރަސެލްސްއިން އަޅާނެ ފިޔަވަޅުތަކާމެދު ބިރުވެރިކަން އުފެދިފައިވެއެވެ.

މި ޚަބަރާ ގުޅިގެން ޑެންމާކުގެ އެމްއީޕީ އަދި ޕެޓްރިއަޓްސް ފޯ ޔޫރަޕްގެ ޗީފް ވިޕް އަންޑަރސް ވިސްޓިސެން ވަނީ އީޔޫ އާއި އޭގެ ބިއުރޮކްރެޓުންނަށް ފާޑުކިޔާފައެވެ.