ކުޅިވަރު
ގޯލްޑަން ފުޓްސަލް ޗެލެންޖުގެ ފައިނަލުން ނައިވާދޫ އާއި ކާށިދޫ ޖާގަ ހޯދައިފި

ނައިވާދޫގެ ދެ ކުޅުންތެރިން އުފާފާޅުކުރަނީ---
މީގެ އެއް އަހަރު ކުރިން ގޯލްޑަން ފުޓްސަލް ޗެލެންޖުގެ ފައިނަލުގައި ކުޅުނު ދެ ޓީމު ސެމީ ފައިނަލުން ކަޓުވާލުމަށްފަހު، ނައިވާދޫ އާއި ކާށިދޫ މި އަހަރުގެ ފައިނަލުން ޖާގަ ހޯދައިފިއެވެ.
މިއީ ހދ އަތޮޅަށް ނިސްބަތްވާ ނައިވާދޫ އާއި މާލެ އަތޮޅަށް ނިސްބަތްވާ ކާށިދޫއިން މި މުބާރާތުގެ ފައިނަލަށް ދަތުރުކުރި ފުރަތަމަ ފަހަރެވެ.
ނައިވާދޫއިން މުބާރާތުގެ ފައިނަލަށް ދަތުރުކުރީ، ސެމީ ފައިނަލުގައި ލ. ގަން ބަލިކުރުމަށްފަހުއެވެ. ގަމަކީ 2023ގައި މުބާރާތުގެ ޗެމްޕިއަނުންނެވެ.
އަނިޔާގެ ސަބަބުން ޓީމުގެ އެންމެ މުހިންމު އެއް ކުޅުންތެރިއެއް ކަމުގައިވާ އަބްދުﷲ ޝާފިއު (ޝާއްޕެ)އާ ނުލައި ސެމީ ފައިނަލަށް ނިކުތް ނައިވާދޫން މެޗު ކާމިޔާބުކުރީ 3-1އިންނެވެ. އެ ޓީމުގެ ދެ ގޯލު މުޙައްމަދު ޝާއިން ކާމިޔާބުކުރިއިރު، ތިން ވަނަ ގޯލު ކާމިޔާބުކޮށްދިނީ މެޗުގެ މޮޅު ކުޅުންތެރިއާގެ މަޤާމް ހޯދި އަޙުމަދު ޙަމީދެވެ. އަދި ގަމުގެ ހަމައެކަނި ގޯލު ކާމިޔާބުކޮށްދިނީ ކެޕްޓަން އަޙުމަދު ޙަލީމެވެ.
މުބާރާތުގެ ފައިނަލަށް އަނެއް ކޮޅުން ދަތުރުކުރީ ކާށިދޫއެވެ. އެ ޓީމުން ފައިނަލަށް ދަތުރުކުރީ ގދ. ވާދޫ 4-2އިން ބަލިކުރުމަށްފަހުއެވެ.
މި މެޗުގައި ވާދޫގެ ގޯލުތައް ކާމިޔާބުކުރީ ނަޝާހް އަޙުމަދެވެ. އަދި ކާށިދޫގެ ދެ ގޯލު އިސްމާއީލް ރަޔާން ކާމިޔާބުކުރިއިރު، އަނެއް ގޯލު ކާމިޔާބުކުރީ، މެޗުގެ މޮޅު ކުޅުންތެރިއާގެ މަގާމު ހޯދި އަޖުލާން ޢަބްދުލް ހައްނާނެވެ. ކާށިދޫގެ ފުރަތަމަ ގޯލަކީ ވާދޫގެ ކެޕްޓަން އަޙުމަދު އަޔާޒް އަތުން ބައިކޮޅަށް ވަތް ގޯލެކެވެ.
މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންގާރަ ދުވަހުގެ ރެއެވެ.