ކާނާ ވިހަވެގެން އިމިގްރޭޝަންގެ ޑިޓެންޝަން ސެންޓަރުގައި ތިބި ގިނަ ބިދޭސީންތަކަކަށް ފަރުވާދެނީ

ހުޅުމާލޭ ފޭސް-2 ގައި ހުންނަ އިމިގްރޭޝަން ޑިޓެންޝަން ސެންޓަރުގައި ތިބި ގިނަ ބިދޭސީންތަކަކަށް ކާނާ ވިހަވުމުގެ ސަބަބުން ފަރުވާންދޭން ފަށައިފިއެވެ.

މިކަމާ ގުޅިގެން އިމިގްރޭޝަނުން "އެކްސް"ގައި ރޭ ކުރި ޕޯސްޓެއްގައި ބުނީ، ފަރުވާ ދިނުމަށް ހޮސްޕިޓަލަށް ގެންގޮސްފައިވަނީ 17 ބިދޭސީންކަމަށެވެ. އަދި މި ބިދޭސީންގެ ފަރުވާގެ ކަންކަމަކީ މިވަގުތު އެ އިދާރާއިން އެންމެ އިސްކަމެއް ދީގެން ކުރަމުން އަންނަ ކަންތައް ކަމުގައި ވެސް އެ އިދާރާއިން ވަނީ ހާމަކޮށްފައެވެ.

ހުޅުމާލޭގައި ހުންނަ އިމިގްރޭޝަން ޑިޓެންޝަން ސެންޓަރުގައި ބަންދުގައި ތިބި ބިދޭސީންގެ ތެރެއިން ބަޔަކު މިރޭ ހޮސްޕިޓަލަށް ގެންދިޔައީ ކާނާ ވިހަވުމުގެ ސަބަބުން ކަމުގައި ދަންނަވަން. އެގޮތުން، މި ވަގުތު 17 މީހަކަށް ހުޅުމާލެ ހޮސްޕިޓަލުގައި ދަނީ ފަރުވާ ދެމުން. މި ކަމުގައި އަސަރުކޮށްފައިވާ ބިދޭސީންނަށް ވީ އެންމެ އަވަސް ފަރުވާއެއް ފޯރުކޮށްދިނުމަކީ މި ވަގުތު އެންމެ އިސްކަމެއް ދީގެން ކުރެވެމުންދާ ކަންތައް.

އިމިގްރޭޝަނުން "އެކްސް"ގައި ކުރި ޕޯސްޓްގައި ވެއެވެ.

މި ހާދިސާއާ ގުޅިގެން ފަރުވާ ދެމުން ގެންދަނީ ކޮން ޤައުމަކަށް ނިސްބަތްވާ ބިދޭސީންތަކަކަށްކަމެއް އެ އިދާރާއިން ހާމަކޮށްފައެއް ނުވެއެވެ.

އިމިގްރޭޝަންގެ ޑިޓެންޝަން ސެންޓަރަކީ އެ އިދާރާއިން ހިންގާ އޮޕަރޭޝަންތަކުގައި ގެނެވޭ ބިދޭސީންނާއި، އެކި މައްސަލަތަކުގައި ފުލުހުންގެ ބެލުމުގެ ދަށަށް ގެންގިއުމަށްފަހު ފުރުވާލުމަށް ނުވަތަ ޑީޕޯޓުކުރުމަށް ކަނޑައަޅާ ބިދޭސީން ފުރުވާލެވެންދެން ބައިތިއްބާ ތަނެވެ.