ވެސްޓް ހޭމް މެޗުން ބަލިވެ، އާސެނަލްއަށް ލިބުނު ފުރުސަތު ގެއްލިއްޖެ

އިންގްލިޝް ޕްރިމިއަރ ލީގުގައި ރޭ ވެސްޓް ހޭމް މެޗުން އާސެނަލް ބަލިވުމުން، ލީގުގެ އެއްވަނައިގައި އޮތް ލިވަޕޫލްއާ އޮތް ފަރަގު ކުޑަކުރުމަށް ލިބުނު ފުރުސަތު އެޓީމަށް ގެއްލިއްޖެވެ.

މިދިޔަ ބުދަ ދުވަހު އެސްޓަން ވިލާއާ ދެކޮޅަށް ލިވަޕޫލުން ކުޅުނު މެޗު 2-2 އިން އެއްވަރުވުމުން، އާސެނަލް ރޭގެ މެޗަށް ނިކުތީ ލިވަޕޫލްއާ ދެމެދު އޮތް ފަރަގު 5 ޕޮއިންޓަށް ކުޑަކޮށްލުމުގެ އުއްމީދުގައެވެ. އަދި މިރޭ ލިވަޕޫލުން މެންޗެސްޓަރ ސިޓީއާ ދެކޮޅަށް ކުޅެން ޖެހިފައި އޮތުމީ، އާސެނަލް ހިންހަމަ ޖެހޭނެ ނަތީޖާއެއް ނިކުމެދާނެ މެޗެއްކަމަށް އެ ޓީމުން ދެކުނެވެ. 

ނަމަވެސް އަމިއްލަ ސަޕޯޓަރުންގެ ކުރިމަތީގައި އާސެނަލް އެ ޓީމަށް ލިބުނު ފުރުސަތު ގެއްލުވާލިއެވެ. މި ދެ ޓީމު ވެސްޓް ހޭމްގެ ދަނށުގައި މިދިޔަ ނޮވެންބަރު މަހު ކުޅުނު މެޗު 5-2 އިން އާސެނަލް ކާމިޔާބުކުރި ނަމަވެސް، އާސެނަލްގެ ދަނޑުގައި ވެސްޓްހޭމްގެ ގޯލަށް އެ ޓީމަށް އަމާޒުކުރެވުނީ އެންމެ ދެ ހަމަލާއެވެ.

ވެސްޓް ހޭމް އިން މި މެޗުގައި ލީޑު ނެގީ ފުރަތަމަ ހާފު ނިމެން މިނެޓަކަށްވެފައި ވަނިކޮށެވެ. މިއީ އެ ޓީމުގެ ކަނާތްފަރާތުން ފަހަތަށް ކުޅޭ އާރޮން ވެން ބިސާކާ ގޯލު ކުރިމައްޗަށް ނަގައިދިން ރީތި ހުރަހަކުން، ޖެރޮޑް ބޮވެން ކާމިޔާބުކުރި ގޯލެކެވެ. 

އާސެނަލް ކޮޅަށް ބޮވެން މި ކާމިޔާބުކުރި ގޯލަކީ އޭނާ ޕްރިމިއަރ ލީގުގައި ކާމިޔާބުކުރި 50ވަނަ ގޯލެވެ. 

އާސެނަލްއަށް އިތުރު މާޔޫސްކަމެއް ގެނުވީ، މެޗުގެ 73ވަނަ މިނެޓުގައި އެ ޓީމުގެ ފަހަތަށް ކުޅެމުންދިޔަ މައިލްސް ލެވިސް-ކެލީއަށް ރަތްކާޑު ދެއްކުމުންނެވެ. އެއީ ވެސްޓް ހޭމްއިން އުފެއްދި ހަމަލާއެއް ހުއްޓުވުމަށް، އާސެނަލްގެ އެންމެ ފަހު ޑިފެންޑަރުގެ ގޮތުގައި ހުރެ އޭނާ ކުރި ފައުލަކަށް ދެއްކި ސީދާ ރަތްކާޑެކެވެ. 

މި ނަތީޖާއާ ގުޅިގެން މިރޭ ލިވަޕޫލުން މެންޗެސްޓަރ ސިޓީ ބަލިކޮށްފިނަމަ، އެ ޓީމަށް 11 ޕޮއިންޓުގެ ލީޑެއް ލިބޭނެއެވެ.