ޚަބަރު
"ދިވެހީން ތަޖުރިބާކުރި މޫސުމީ ކާރިސާތަކަށް ޢިލްމީ ކަޅިއެއް"

ޤައުމީ ދުވަހުގެ ރަސްމީ ޖަލްސާގެ ތެރެއިން---
"ދިވެހީން ތަޖުރިބާކުރި މޫސުމީ ކާރިސާތަކަށް ޢިލްމީ ކަޅިއެއް"، މި މައުޟޫޢުގެ މައްޗަށް އަލިއަޅުވާލައި، ދިވެހި ޤައުމިއްޔަތުގެ އިސްވަރުން އިންތިޒާމުކޮށްގެން އިރުވައި މޫސުމުގެ ހިޔަވިހާ ނަކަތުގެ ސިންތާ ބޭއްވެވުމަށް ނިންމަވައިފިއެވެ.
ދިވެހިބަހާއި ސަގާފަތާއި ތަރިކައާ ބެހޭ ވުޒާރާގައި ހާމަކޮށްފައިވާ ގޮތުގައި މި ސިންތާ އޮންނާނީ މިއަދު 13:30 ގައި އެ ވުޒާރާގައި ޤާއިމުކޮށްފައިވާ އިސްވަރު އޮފީހުގައެވެ. އަދި މި ސިންތާ ފެށުމުގެ ގޮތުން ދިވެހި ތާރީޚުގެ އިސްވާރު، އަލްއުސްތާޛު އަޙްމަދު ޝާކިރު (ކަށިމާ ޝާކިރު) ގެ ވާހަކަފުޅު ދެއްކެވުން އޮންނާނެކަމަށް ވެސް ސަގާފަތާ ބެހޭ ވުޒާރާއިން ހާމަކޮށްފައިވެއެވެ.
މިއަދު ބާއްވާ ސިންތާގައި އަލިއަޅުވާލަން ހަމަޖެހިފައިވާ މަޢުޟޫޢުއަށް އިންސާފުކޮށްދެއްވުމަށް ހަމަޖެހިފައިވަނީ، ސިންތާގެ ދާރިސް، އަދި މޫސުމީ ދާއިރާގައި 25 އަހަރަށް ވުރެން ގިނަ ދުވަހު ޚިދުމަތްކުރައްވާފައިވާ ތަޖުރިބާކާރެއް ކަމުގައިވާ އަލްފާޟިލް ޙުސައިން ވަޙީދެވެ. އަލްފާޟިލް ޙުސައިން ވަޙީދަކީ 24 އޮގަސްޓު 1998 އިން ފެށިގެން މޫސުމާބެހޭ ޤައުމީ އިދާރާ، މޯލްޑިވްސް މީޓިއޮރޮލޮޖިކަލް ސަރވިސްގައި މީޓިއޮރޮލޮޖިސްޓެއްގެ ގޮތުގައި މަސައްކަތް ކުރައްވަމުން ގެންދަވާ، މޫސުމީ ދާއިރާގެ ފުންނާބު އުސް ތަޖުރިބާކާރެކެވެ.
މަސައްކަތުގެ ތަޖުރިބާގެ އިތުރުން، ޙުސެއިން ވަޙީދު ހުންނެވީ މޫސުމާ ބެހޭ ދާއިރާތަކުން އެކި ފެންވަރުގެ ތަމްރީންތައް ވެސްފުރިހަމަކޮށްފައެވެ. އެގޮތުން 2018 ވަނަ އަހަރު ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން އެންވަޔަރަންމަންޓަލް މެނޭޖްމަންޓްގެ ދާއިރާއިން ފުރަތަމަ ޑިގްރީ ހާސިލުކުރައްވައި، 2024 ވަނަ އަހަރު ހަމަ އެ ޔުނިވަރސިޓީން ޖިއޯސްޕޭޝަލް ޓެކްނޮލޮޖީސް ފޮރ ޑިޒާސްޓަރ މެނޭޖްމަންޓްގެ ދާއިރާއިން މާސްޓަރސް ޑިގްރީ ވަނީ ހާސިލުކުރައްވާފައެވެ.
މިއަދު ބޭއްވުމަށް ހަމަޖެހިފައިވާ މި ސިންތާގައި، ދުވަހުގެ މައުޟޫޢާ ގުޅޭ ޕެނަލް ޑިސްކަޝަނެއް ވެސް އޮންނާނެއެވެ. އަދި "ދިވެހި ތާރީޚަށް އައު އަލިކަމެއް"، މި ފޮތުގެ ޑިޖިޓަލް ކޮޕީއެއް، އެ ފޮތް ޑިޖިޓަލްކުރެއްވި އަމިއްލަފަރާތަކުން ދިވެހިބަހާއި ސަގާފަތާއި ތަރިކައާ ބެހޭ ވުޒާރާއަށް ހަދިޔާ ކުރެއްވުން އޮންނާނެއެވެ. މިއީ ދިވެހިބަހާއި ތާރީޚަށް ޚިދުމަތްކުރާ ޤައުމީ މަރުކަޒުން ޝާއިޢުކޮށްފައިވާ ފޮތެކެވެ.
ދިވެހި ޤައުމިއްޔަތުގެ އިސްވަރަކީ ރައީސުލްޖުހޫރިއްޔާ ޑޮކްޓަރ މުޙައްމަދު މުޢިއްޒު އެކަށައަޅުއްވާފައިވާ ދިވެހި ޤައުމިއްޔަތު އިޔާދަ ކުރުމުގެ ޤައުމީ ނިޒާމުގެ މުހިންމު އެއް ގުނަވަނެވެ. ދިވެހި ޤައުމިއްޔަތުގެ އިސްވަރުގެ މަސްއޫލިއްޔަތުތަކުގެ ތެރޭގައި ދިވެހި ޤައުމިއްޔަތުގެ ބަހާތަކުގެ އެކި ރޮނގުރޮނގުން، ރާއްޖޭގެ ދެ މޫސުމާއި ނަކަތްތަކުގައި ސިންތާތަކާއި މަހާސިންތާތައް އިންތިޒާމުކޮށް ބޭއްވުން ހިމެނެއެވެ. ކުރިއަށް އޮތް ތަނުގައި ކޮންމެ ނަކަތެއްގައި މިފަދަ ސިންތާތައް ބޭއްވެވުމަށް ވަނީ ނިންމަވައިފައެވެ.