އެތުލެޓިކޯއަށް ދުލެއް ނުދީ، ބާސެލޯނާއިން ލަ ޕާމާސް ބަލިކޮށް އަނބުރާ ލީގު އެއްވަނައަށް

ސްޕެނިޝް ލަ ލީގާގައި ރޭ އިރާކޮޅު އެތުލެޓިކޯއިން ވެލެންސިއާ ބަލިކޮށް ލީގުގެ އެއްވަނައަށް އެރުމުން، އެއީ ވަގުތީ ކަމަކަށް ހަދައި، ބާސެލޯނާއިން ދަންވަރު ލަ ޕާމާސް ބަލިކޮށް އަނބުރާ ލީގުގެ އެއްވަނައަށް އަރައިފިއެވެ.

އެތުލެޓިކޯއިން ވެލެންސިއާ ބަލިކުރީ 3-0 އިންނެވެ. އަދި އެއަށްފަހު ލީގުގެ އެއްވަނައިގައި އެ ޓީމުން ދެ ޕޮއިންޓުގެ ލީޑެއް ނެގިއެވެ.

އޭގެ ފަހުން ބާސެލޯނާއިން ލަ ޕާމާސް 2-0 އިން ބަލިކުރުމަށްފަހު، އެއް ޕޮއިންޓުގެ ފަރަގަކާއެކު މިވަނީ އަނބުރާ އެއްވަނައަށް އަރާފައެވެ.

މި މެޗުގައި ބާސެލޯނާއިން ކާމިޔާބުކުރި ފުރަތަމަ ގޯލަކީ، ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތުމަށްފަހު މެޗުގެ 62 ވަނަ މިނެޓުގައި ޑެނީ އޮލްމޯ ކާމިޔާބުކުރި ގޯލެކެވެ. ލެމީން ޔަމާލް ދިން ބޯޅައަކުން އޮލްމޯ ކާމިޔާބުކުރި މި ގޯލަކީ، މިދިޔަ ނޮވެންބަރު މަހަށްފަހު އޭނާ ކާމިޔާބުކުރި ފުރަތަމަ ގޯލެވެ. 

ބާސެލޯނާގެ ދެވަނަ ގޯލު ކާމިޔާބުކުރީ މެޗުގެ އިތުރު ވަގުތުގައެވެ. މިއީ ފެރަން ޓޮރޭސް ކާމިޔާބުކުރި ގޯލެކެވެ. އޭނާ ކުޅެން ނިކުތީ މެޗު ނިމެން ފަސްމިނެޓަށް ވެފައިވަނިކޮށް ޔަމާލްގެ ބަދަލުގައެވެ.

މިރޭ ރެއާލް މެޑްރިޑް ޖިރޯނާއާ ދެކޮޅަށް ކުޅެން ހަމަޖެހިފައިވާއިރު، ރެއާލް އެ މެޗު ކާމިޔާބުކޮށްފިނަމަ ބާސެލޯނާއާ ޕޮއިންޓުގެ ގޮތުން ހަމަހަމަވާނެއެވެ. ނަމަވެސް ބާސެލޯނާ އުޅެނީ ފައިދާ ގޯލުގެ ގޮތުން ކުރީގައެވެ.