Ads by Exprox

ޚަބަރު

ޒަކިއްޔާގެ މަރުގެ މައްސަލައިގެ ތަޙުޤީޤު ކުރިޔަށްދާ ގޮތް އެޗްއާރުސީއެމްއިން ބަލަން ފަށައިފި

ޒަކިއްޔާގެ މަރުގެ މައްސަލައިގެ ތަޙުޤީޤު ކުރިޔަށްދާ ގޮތް އެޗްއާރުސީއެމްއިން ބަލަން ފަށައިފި

ޒަކިއްޔާގެ މަރުގެ ތަޙުޤީޤު ދިގުލައިދާތީ ހޮޅުދޫގައި މިދިޔަ މަހު ބޭއްވި ސުލްޙަވެރި އިޙްތިޖާޖެއްގެ ތެރެއިން---

މިފްތާޙް މުޙައްމަދު

މިފްތާޙް މުޙައްމަދު

23 ފެބްރުއަރީ 2025، 09:41

23 ފެބްރުއަރީ 2025، 09:41

މިދިޔަ އަހަރުގެ ސެޕްޓެންބަރު މަހުގެ 10ވަނަ ދުވަހު ނ. ހޮޅުދޫ އިން ޒަޙަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ މައްސަލައިގެ ތަޙުޤީޤު ކުރިޔަށްދާގޮތާ ގުޅޭ ތަޙުޤީޤެއް، ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމް، އިން ފަށައިފިއެވެ.

އެޗްއާރުސީއެމްއިން ބުނީ، އެ ކޮމިޝަނުން މި ތަޙުޤީޤު ފެށީ، އެ މައްސަލައިގެ ތަޙުޤީޤު ކުރިޔަށްދާ ގޮތުން ޒަކިއްޔާގެ އާޢިލާގެ ފަރާތުން ކަންބޮޑުވުން ފާޅުކޮށްފައިވާތީކަމަށެވެ.

އަލްމަރްހޫމާ ޒަކިއްޔާ މޫސާގެ މަރުގެ މައްސަލައާ ގުޅިގެން ގާތްތިމާގެ މީހުންގެ ފަރާތުން ކޮމިޝަނަށް މި މައްސަލައިގެ ތަހްގީގު ދާގޮތާމެދު ހުރި ކަންބޮޑުވުންތަކެއް ހިއްސާކޮށްފައިވާތީ، މި މައްސަލައާ ގުޅިގެން ކަމާ ގުޅުންހުރި އިދާރާތަކުން އަމަލުކުރަމުންދާ ގޮތް މި ކޮމިޝަނުން ބެލުމަށް މިމައްސަލަދަނީ ތަހްގީގްކުރަމުންނެވެ.

އެޗްއާރުސީއެމްއިން އެކްސްގައި ކުރި ޕޯސްޓުގައި ވެއެވެ.

މި މައްސަލައާ ގުޅުންހުރި މަޢުލޫމާތު ހިމެނޭ ލިޔެކުޔުންތައް ދިވެހި ފުލުހުންގެ ޚިދުމަތުން ހޯދައި، ލިބިފައިވާ މަޢުލޫމާތުތައް ކޮމިޝަނުން ދިރާސާ ކުރަމުންދާކަމަށް ވެސް އެޗްއާރްސީއެމުން ވިދާޅުވިއެވެ.

މި މައްސަލައިގެ ތަޙުޤީޤުގައި އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި)ގެ އެހީތެރިކަން ހޯދަމުން އަންނަކަމަށް ފުލުހުން ވަނީ މިދިޔަ ޖެނުއަރީ މަހުގެ ފަހުކޮޅު ހާމަކޮށްފައެވެ. 

އަދި މި މައްސަލަ ދިގުލާދާތީ، އިއްޔެ ވެސް އެ ރަށުގެ ރައްޔިތުން ވަނީ ކަންބޮޑުވުން ފާޅު ކުރުމުގެ ހަރަކާތެއް ބާއްވާފައެވެ. އަދި އެ ރަށުގެ ޕޮލިސް ސްޓޭޝަން ދޮށަށް އެއްވެ، މައްސަލަ އަވަސް ކުރުމަށް ވެސް ގޮވާލާފައިވެއެވެ.

މީގެ އިތުރުން، މައްސަލައިގެ ތަޙުޤީޤުގައި ފުލުހުންގެ ސީނިއަރ ޓީމެއް ހޮޅުދޫއަށް ގޮސް، މައްސަލަ ރިވިއުކުރުމުގެ މަސައްކަތް ކުރަމުން އަންނަކަމަށް ވެސް ފުލުހުން ވަނީ ޖެނުއަރީ މަހުގެ ފަހުކޮޅު ހާމަކޮށްފައެވެ. 

މި މައްސަލާގައި ޑިސެންބަރުމަހު ފުލުހުން ބޭއްވި ނޫސްވެރިންގެ ބައްދަލުވުމުގައި  ހޮސްޕިޓަލާ ހަވާލާދީ ފުލުހުންގެ ޗީފް އިންސްޕެކްޓަރު މުހައްމަދު ސާމިޙް ވިދާޅުވީ، ޒަކިއްޔާ މަރުވީ ކަރަށް ލިބުނު ޒަޚަމްތަކަކާ ގުޅިގެން ކަމަށެވެ. އެގޮތުން ކަރުގެ ވާތްފަރާތުގައި ފުންކޮށް ތިން ޒަޚަމެއް އަދި ކަނާތްފަރާތުގައި ފުން ދެ ޒަޚަމެއް ހުރިކަމަށް ވެއެވެ. އަދި ކަރުގެ މެދުގައި ތިލަކޮށް ހުރި ޒަޚަމުގެ އިތުރުން، އިތުރު އެއްވެސް އަނިޔާއެއް ފެންނަން ނެތްކަމަށް ސާމިޙް ވިދާޅުވިއެވެ.

މިހާގިނަ ޒަޚަމްތަކެއް ހުރި ނަމަވެސް، އެއީ މީހަކު ދިން އަނިޔާތަކެއްކަން ބެލެވޭނެ އެއްވެސް ހެއްކެއް މިހާތަނަށް ފެނިފައިނުވާކަމަށް ވެސް ހާމަކޮށްފައި ވެއެވެ.

އުމުރުން 50 އަހަރުގެ ޒަކިއްޔާ މަރުވެފައި އޮއްވާ ފެނިފައިވަނީ އޭނާ ދިރިއުޅެމުންދިޔަ ގޭގެ ތެރެއިންނެވެ. 

މި ލިޔުން ކިޔާލުމުން

Ads by MSS