ޚަބަރު
ޕްރެކްޓިސް ކުރަނިކޮށް އަނިޔާވި ޒުވާނާއަށް ވެންޓިލޭޓަރުގައި ފަރުވާދެނީ

މުބާރާތަށް ފަރިތަކުރިނަކޮށް އެކްސިޑެންޓުވި ޒުވާނާ---
އައްޑޫ ހުޅުމީދޫގައި މިއަދު ފެށުމަށް ހަމަޖެހިފައިވާ މޮޓޯ ރޭސިންގ މުބާރާތަށް ތައްޔާރުވަމުންދަނިކޮށް އެކްސިޑެންޓުވި ޒުވާނާއަށް އައިސީޔޫގައި ފަރުވާދެމުން އަންނަކަމަށް އިންދިރާ ގާންދީ މެމޯރިއަލް ހޮސްޕިޓަލް، އައިޖީއެމްއެޗްއިން ހާމަކޮށްފިއެވެ.
އައިސީޔޫގައި ފަރުވާދެމުން ދިޔަނަމަވެސް، އޭނާއަށް ލިބިފައިވާ އަނިޔާގެ ތަފްސީލު ހާމަކޮށްފައެއް ނުވެއެވެ.
މި އެކްސިޑެންޓުގައި އަނިޔާވެފައިވަނީ މަރަދޫފޭދޫއަށް ނިސްބަތްވާ އުމުރުން 18 އަހަރުގެ މުޙައްމަދު ޢިލްމުއަށެވެ.
އިއްޔެގެ ގާތްގަނޑަކަށް 11:30 ހާއިރު ހިނގި މި އެކްސިޑެންޓަކީ، އައްޑޫގައި ބާއްވާ "އެންމެންގެ ޑްރެގް ޗެމްޕިއަންޝިޕް" އަށް ތައްޔާރުވުމަށް ފަރިތަކުރަމުން ދަނިކޮށް، ސައިކަލް ކޮންޓްރޯލް ނުވެގެން ގޮސް ހަދަން ފަށާފައިހުރި ގެއެއްގެ ތަނބެއްގައި ޖެހިގެން ހިނގި އެކްސިޑެންޓެކެވެ.
މި އެކްސިޑެންޓުގެ ސަބަބުން ޢިލްމުއަށް އެންމެ ފުރަތަމަ ފަރުވާދިނީ އައްޑޫ އިކުއިޓޯރިއަލް ހޮސްޕިޓަލުގައެވެ. ނަމަވެސް ހާލު ސީރިއަސްވަމުން ދިއުމުން، އޭނާ ވަނީ އިއްޔެ އިތުރު ފަރުވާއަށް މާލެ ގެނަސްފައެވެ.
މިއަދު ފެށުމަށް ހަމަޖެހިފައިވާ "އެންމެންގެ ޑްރެގް ޗެމްޕިއަންޝިޕް" އަކީ މި މުބާރާތުގެ ދެވަނަ އެޑިޝަނެވެ. މި މުބާރާތް އިންތިޒާމު ކުރަނީ އައްޑޫ މޮޓޯ ސްޕޯޓް އެސޯސިއޭޝަނުންނެވެ. އެ އެސޯސިއޭޝަނުން ހާމަކޮށްފައިވާ ގޮތުގައި މިއީ ދެ ދުވަހުގެ މުއްދަތަށް ކުރިޔަށްގެންދާ މުބާރާތެކެވެ.
މި އަހަރުގެ މުބާރާތުގައި 57 އެތުލީޓަކު ވާދަކުރުމަށް ވަނީ ހަމަޖެހިފައެވެ.