ޒަކިއްޔާގެ މަރުގެ މައްސަލައިގައި ފުލުހުން ޢަމަލުކޮށްފައިވާ ގޮތް އިންޓެގްރިޓީ ކޮމިޝަނުން ވެސް ބަލަނީ

ނ. ހޮޅުދޫއިން ޒަޙަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ މައްސަލައިގައި ފުލުހުންގެ ތަޙުޤީޤު ކުރިޔަށްދާ ގޮތާ ގުޅިގެން އާންމު ރައްޔިތުން ފުލުހުންގެ މައްޗަށް ގިނަ ތުޙުމަތުތަކެއް ކުރާތީ، އެ މައްސަލައިގެ ތަޙުޤީޤު ހިނގަމުންދާގޮތް ނޭޝަނަލް އިންޓެގްރިޓީ ކޮމިޝަނުން ބެލުމަށް ނިންމައިފިއެވެ.

އެ ކޮމިޝަނުން ހާމަކޮށްފައިވާ ގޮތުގައި މި މައްސަލައިގެ ތަޙުޤީޤު ކުރިޔަށްދާގޮތެއް ބެލުމަށް ނިންމީ، މި މައްސަލައިގައި ފުލުހުން އިޙުމާލެވެފައިވާކަމަށް ވެސް ބުނަމުންދާތީއެވެ. އަދި މިއީ އެ ކޮމިޝަނުގެ ވާޖިބު އަދާކުރުމުގެ ގޮތުން، އަމިއްލަ އިސްނެގުމަށް ބަލަމުންދާ މައްސަލައެއްކަމަށް ވެސް ވަނީ ހާމަކޮށްފައެވެ.

ނ.ހޮޅުދޫ، ނިއުލައިފް ގޭގައި ދިރިއުޅެމުންދިޔަ ނ.ހޮޅުދޫ، މާރަނގަ، ޒަކިއްޔާ މޫސާ މަނިކުގެ މަރުގެ މައްސަލަ ތަޙްޤީޤުކުރުމުގައި ފުލުހުން އިހުމާލުވެފައިވާ ކަމަށް ބުނެ، ޢާއްމު ރައްޔިތުން ފުލުހުންގެ މައްޗަށް ސީރިއަސް ތުހުމަތުތަކެއް ކުރަމުންދާތީއާއި، އަދި މިއީ ޢާއްމު ރައްޔިތުންގެ ކަންބޮޑުވުން އޮތް މައްސަލައަކަށްވާތީ، ޤާނޫނު ނަންބަރު: 2015/27 (ނޭޝަނަލް އިންޓެގްރިޓީ ކޮމިޝަންގެ ޤާނޫނު) ގެ 37 ވަނަ މާއްދާގެ ދަށުން ކޮމިޝަންގެ އަމިއްލަ އިސްނެގުމުގެ މަތީން އެ މައްސަލަ ތަޙްޤީޤު ކުރުމުގައި ޤާނޫނާއި، ގަވާއިދާ، ފުލުހުން އަމަލު ކުރަންޖެހޭ އުސޫލުތަކާ ޚިލާފަށް ދިވެހި ފުލުހުން ޢަމަލުކޮށްފައިވޭތޯ ބެލުމަށް 20 ފެބުރުވަރީ 2025 ގައި ކޮމިޝަނުން ނިންމާފައިވެއެވެ.

ނޭޝަނަލް އިންޓެގްރިޓީ ކޮމިޝަނުން ހާމަކޮށްފައިވެއެވެ.

މި މައްސަލައާ ގުޅިގެން ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ވެސް ވަނީ ތަޙުޤީޤެއް ފަށާފައެވެ. އެޗްއާރުސީއެމްއިން ބުނީ، އެ ކޮމިޝަނުން މި ތަޙުޤީޤު ފެށީ، އެ މައްސަލައިގެ ޖިނާއީ ތަޙުޤީޤު ކުރިޔަށްދާ ގޮތުން ޒަކިއްޔާގެ އާޢިލާގެ ފަރާތުން ކަންބޮޑުވުން ފާޅުކޮށްފައިވާތީކަމަށެވެ.

ޒަކިއްޔާ މަރުވެފައިއޮއްވާ ފެނުނީ މިދިޔަ އަހަރުގެ ސެޕްޓެންބަރު މަހުގެ 10ވަނަ ދުވަހެވެ. 

މި މައްސަލާގައި ޑިސެންބަރުމަހު ފުލުހުން ބޭއްވި ނޫސްވެރިންގެ ބައްދަލުވުމުގައި  ހޮސްޕިޓަލާ ހަވާލާދީ ފުލުހުންގެ ޗީފް އިންސްޕެކްޓަރު މުހައްމަދު ސާމިޙް ވިދާޅުވީ، ޒަކިއްޔާ މަރުވީ ކަރަށް ލިބުނު ޒަޚަމްތަކަކާ ގުޅިގެން ކަމަށެވެ. އެގޮތުން ކަރުގެ ވާތްފަރާތުގައި ފުންކޮށް ތިން ޒަޚަމެއް އަދި ކަނާތްފަރާތުގައި ފުން ދެ ޒަޚަމެއް ހުރިކަމަށް ވެއެވެ. އަދި ކަރުގެ މެދުގައި ތިލަކޮށް ހުރި ޒަޚަމުގެ އިތުރުން، އިތުރު އެއްވެސް އަނިޔާއެއް ފެންނަން ނެތްކަމަށް ސާމިޙް ވިދާޅުވިއެވެ.

މިހާގިނަ ޒަޚަމްތަކެއް ހުރި ނަމަވެސް، އެއީ މީހަކު ދިން އަނިޔާތަކެއްކަން ބެލެވޭނެ އެއްވެސް ހެއްކެއް މިހާތަނަށް ފެނިފައިނުވާކަމަށް ވެސް ހާމަކޮށްފައި ވެއެވެ.