ރައީސުލްޖުމްހޫރިއްޔާ ޖޭއެސްސީއަށް އައު މެންބަރަކު ޢައްޔަނު ކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ވަނީ ޖުޑީޝަލް ސަރވިސް ކޮމިޝަން (ޖޭއެސްސީ) އަށް އައު މެންބަރަކު ޢައްޔަނު ކުރައްވާފައެވެ. މިގޮތުން ޖޭއެސްސީގެ މެންބަރުކަމަށް ޢައްޔަނު ކުރެއްވީ ގއ. ވިލިނގިލި، ވައިޖެހޭގެ އަލްފާޟިލް ޔަޒްމީދު މުޙައްމަދެވެ.

މިއަދު މެންދުރުފަހު ރައީސް އޮފީހުގައި ބޭއްވުނު ރަސްމިއްޔާތެއްގައި އަލްފާޟިލް ޔަޒްމީދު މުޙައްމަދު ވަނީ ޖޭއެސްސީގެ މެންބަރުކަމުގެ ހުވާ ކުރައްވާފައެވެ. އޭނާއަށް ހުވާ ލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އޮނަރަބަލް ޑޮކްޓަރ މުޙައްމަދު އިބްރާހީމެވެ. ހުވާކުރެއްވުމަށްފަހު ރައީސުލްޖުމްހޫރިއްޔާ ވަނީ އަލްފާޟިލް ޔަޒްމީދު މުޙައްމަދަށް ޖޭއެސްސީގެ މެންބަރުކަމަށް ޢައްޔަނު ކުރެއްވި ކަމުގެ ލިޔުން ޙަވާލުކުރައްވާފައެވެ.

މި ޢައްޔަނުކުރެއްވުމާ ގުޅިގެން، ކުރިން ޖޭއެސްސީގައި ރައީސުލްޖުމްހޫރިއްޔާގެ ފަރާތުން ތަމްސީލުކުރެއްވި ރ. އިނގުރައިދޫ، ހިތްވަރު އަލްއުސްތާޛު މުޙައްމަދު ސަމީރު ވަނީ މަޤާމުން ވަކިކުރައްވާފައެވެ.

މި ޢައްޔަނުކުރެއްވުން ވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 158 ވަނަ މާއްދާގެ (އ) އާއި، ޤާނޫނު ނަންބަރު 10/2008 (ޖުޑީޝަލް ސަރވިސް ކޮމިޝަނުގެ ޤާނޫނު) ގެ 3 ވަނަ މާއްދާގެ 8 ވަނަ ނަންބަރުގައި ބަޔާންކޮށްފައިވާ ގޮތުގެމަތީން ކުރައްވާފައެވެ. މިއީ ރައީސުލްޖުމްހޫރިއްޔާ ޢައްޔަންކުރައްވާ މެންބަރެއްގެ ހައިސިއްޔަތުން ކުރެވުނު ޢައްޔަނުކުރުމެކެވެ.