ކުޑަހުވަދޫގެ ތަރައްޤީއަށް ބޭނުންވާ ކަންކަމާއި ގުޅޭގޮތުން ރައީސުލްޖުމްހޫރިއްޔާ މަޝްވަރާކުރައްވައިފި

ދ. ކުޑަހުވަދޫގެ ތަރައްޤީއަށް ބޭނުންވާ ކަންކަމާއި ގުޅޭގޮތުން މަޝްވަރާކުރެއްވުމަށް މިއަދު ހަވީރު ނިލަންދެއަތޮޅު ދެކުނުބުރީ އަތޮޅު ކައުންސިލް އިދާރާގައި ވަނީ ބައްދަލުވުމެއް ބާއްވާފައެވެ.

މި ބައްދަލުވުމުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކުޑަހުވަދޫ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިތުރުން، މުއައްސަސާތަކުގެ އިސްވެރިންގެ ކަންބޮޑުވުންތައް އަޑުއައްސަވާފައެވެ.

މި ބައްދަލުވުމުގައި ކުޑަހުވަދޫ ކައުންސިލުން ވަނީ އެރަށުގައި އިންޑަސްޓްރިއަލް ޒޯނެއް ނެތުމުން ކުރިމަތިވެފައިވާ ދަތިތައް ހިއްސާކުރައްވާ، އެ ރަށުގައި އިންޑަސްޓްރިއަލް އޭރިއާއެއް ޤާއިމުކުރުމަށް އެދިވަޑައިގެންފައެވެ. މީގެ އިތުރުން، ރަށަށް މަސް ފެކްޓްރީއެއް ބޭނުންވާކަން ފާހަގަކޮށް، މަސްވެރިކަމުގެ ދާއިރާއިން ކުރިމަތިވަމުންދާ ގޮންޖެހުންތައް ވެސް އެ ކައުންސިލުން ވަނީ ރައީސް އާއި ހިއްސާކުރައްވާފައެވެ. ހަމަ އެހެންމެ، ކުޑަހުވަދޫއަށް ދިމާވެފައިވާ ރަށް ގިރުމުގެ މައްސަލައަށް ޙައްލެއް ހޯއްދަވާދެއްވުމަށް ރައީސުލްޖުމްހޫރިއްޔާގެ އަރިހުގައި ވަނީ ދަންނަވާފައެވެ.

މީގެ އިތުރުން ކުޑަހުވަދޫ ކައުންސިލުން ވަނީ، ރައީސުލްޖުމްހޫރިއްޔާގެ މި ދަތުރުފުޅަކީ އެމަނިކުފާނުގެ ރިޔާސީ ދައުރުގައި އެރަށަށް ކުރައްވާ 3 ވަނަ ދަތުރުފުޅުކަން ފާހަގަކުރައްވާފަ އެވެ. ހަމަ އެހެންމެ، ޤައުމު ތަރައްޤީކުރުމަށް ރައީސުލްޖުމްހޫރިއްޔާ ގެންގުޅުއްވާ ސިޔާސަތުތަކަށް ކުޑަހުވަދޫ ކައުންސިލުން ތާއީދުކުރައްވާކަން އެ ކައުންސިލުން ވަނީ ފާހަގަކުރައްވާފައެވެ. އަދި ރައީސްގެ މި ދަތުރުފުޅުގެ ތެރެއިން ފެށިގެންދާ މަޝްރޫޢުތަކަކީ ނުހުއްޓި ކުރިއަށްދާނެ މަޝްރޫޢުތަކެއްކަމުގައި ހައްދަވައިދެއްވުމަށް ކައުންސިލުން ވަނީ އެދިވަޑައިގެންފައެވެ.

މި ބައްދަލުވުމުގައި، ކުޑަހުވަދޫ އަންހެނުން ތަރައްޤީއަށް މަސައްކަތްކުރާ ކޮމެޓީއިން ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަންހެނުންގެ ތަރައްޤީއަށް ކުރައްވަމުން ގެންދަވާ މަސައްކަތްތައް ފާހަގަކޮށް އެކަމަށް ޝުކުރުދަންނަވާފަ އެވެ.

މީގެ އިތުރުން މި ބައްދަލުވުމުގައި، ރައީސް ވަނީ އާބަން ސެންޓަރުގެ ގޮތުގައި ކަނޑައަޅުއްވާފައިވާ ރަށްތަކަށް ކޮށްދެއްވުމަށް ވަޢުދުވެވަޑައިގެންފައިވާ ކަންކަން ކުރިއަށްގެންދަވާނެކަން ފާހަގަކުރައްވާފައެވެ. ހަމަ އެހެންމެ، ބައްދަލުވުމުގައި ބައިވެރިވެވަޑައިގެންނެވި ވަޒީރުން ވަނީ، އެރަށުގެ ތަރައްޤީއަށް ކުރައްވަމުން ގެންދަވާ މަސައްކަތްތަކާ ގުޅޭ އެންމެ ފަހުގެ މަޢުލޫމާތުތައް ކައުންސިލާއި ޙިއްޞާކުރައްވާފައެވެ.

މި ބައްދަލުވުމުގައި ރައީސުލްޖުމްހޫރިއްޔާ ވިދާޅުވީ، ކުޑަހުވަދޫ ކައުންސިލުން ފާހަގަކުރެއްވި މައްސަލަތަކަށް ޙައްލު ހޯއްދެވުމަށް މަސައްކަތް ކުރައްވާނެ ކަމަށެވެ.