ކުޑަހުވަދޫގެ ހިއްކި ބިމުގައި ފެނާއި ނަރުދަމާ ޤާއިމްކޮށް، ފެނުގެ ނިޒާމުގެ ކެޕޭސިޓީ އިތުރުކުރުމުގެ އެއްބަސްވުމުގައި ސޮއިކޮށްފި

ކުޑަހުވަދޫގެ ހިއްކި ބިމުގައި ފެނާއި ނަރުދަމާގެ ޚިދުމަތް ޤާއިމްކުރުމާއި އަދި ކުޑަހުވަދޫގައި މިހާރު ޤާއިމްކޮށްފައިވާ ފެނުގެ ނިޒާމުގެ ކެޕޭސިޓީ އިތުރުކުރުމުގެ މަސައްކަތުގެ އެއްބަސްވުމުގައި ސޮއިކޮށްފިއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ދ އަތޮޅަށް ފެއްޓެވި ދަތުރުފުޅުގެ ތެރެއިން، ކުޑަހުވަދޫގެ ރައްޔިތުންނާ ބައްދަލުކުރެއްވުމުގައި ބޭއްވި ޖަލްސާގައި މި މަސައްކަތް ހަވާލުކޮށްފައިވަނީ ރޯޑް ޑިވެލޮޕްމެންޓް ކޯޕަރޭޝަން، އާރުޑީސީއާއެވެ. 

މި އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާރގެ ފަރާތުން ސޮއިކުރެއްވީ މިނިސްޓަރ، ޑޮކްޓަރ އަބްދުﷲ މުއްޠަލިބެވެ. އަދި އާރުޑީސީގެ ފަރާތުން ސޮއިކުރެއްވީ، މެނޭޖިން ޑިރެކްޓަރ، ބްރިގޭޑިއާ ޖެނެރަލް (ރިޓަޔަޑް) ޢަލީ ޒުހެއިރެވެ. 

މި އެއްބަސްވުމުގެ ދަށުން، ކުޑަހުވަދޫގެ ހިއްކި ބިމުގައި ފެނާއި ނަރުދަމާ ޤާއިމުކޮށްފައިނުވާ ސަރަޙައްދުގައި ފެނާއި ނަރުދަމާ ހޮޅި އެޅުމާއި، ނަރުދަމާ ޕަންޕިން ސްޓޭޝަން ބެހެއްޓުމާއި، ނަރުދަމާ ޖަންކްޝަން ބެހެއްޓުމާއި، ފެން މީޓަރުތައް ބެހެއްޓުމާއި އަދި އައުޓް ފޯލްއެއް އެޅުން ހިމެނެއެވެ.

މީގެ އިތުރުން، ކުޑަހުވަދޫގެ ފެނުގެ ނިޒާމުގެ ކެޕޭސިޓީ އިތުރުކުރުމަށް ދުވާލަކު 100 ޓަނުގެ ފެން އުފެއްދޭ 2 އާރު.އޯ. ޕްލާންޓު ބެހެއްޓުމާއި 700 ޓަނުގެ ފެން ރައްކާކުރެވޭ ވަރުގެ 2 ޓޭންކު ބެހެއްޓުމުގެ އިތުރުން އައުޓްފޯލް އެޅުން ހިމެނެއެވެ.

މަސައްކަތުގެ އެއްބަސްވުމުގެ ދަށުން، މި މަޝްރޫޢުގެ މަސައްކަތް 700 ދުވަހުން ނިންމަންޖެހެއެވެ. އަދި މި މަސައްކަތުގެ އަގަކީ 87 މިލިއަން ރުފިޔާއެވެ.

މި އެއްބަސްވުމުގައި ސޮއިކުރެވުނުއިރު، ކުޑަހުވަދޫގެ ރައްޔިތުންގެ އެންމެ ބޮޑު އެއް ކަންބޮޑުވުމަކީ، އެތައް ދުވަހަކަށްފަހު ހިއްކި ބިމުން ލިބުނު ގޯތި ތަކުގައި ދިރިއުޅެވޭނެ ގޮތެއް ނެތުމެވެ. މިކަން ފަހި ނުވެ އޮތް އެންމެ ބޮޑު ސަބަބަކީ، ހިއްކި ބިމުގައި ފެނާއި ނަރުދަމާގެ ވަސީލަތްތައް ޤާއިމްވެފައި ނެތުމެވެ.