ކުޅިވަރު
އައިސީސީ ޗެމްޕިއަންޝިޕް: ކޯލީގެ ސެންޗަރީއަކާއެކު، ޕާކިސްތާނުގެ މައްޗަށް 6 ވިކެޓުން އިންޑިއާ ކުރިހޯދައިފި

އިންޑިއާގެ ވިރާތު ކޯލީ އުފާފާޅުކުރަނީ--
ހުލާސާ
އައިސީސީ ޗެމްޕިއަންސް ޓްރޮފީ، ގްރޫޕް އޭ:
ޕާކިސްތާން 241 (49.4 އޯވަރު): ސައުދު 62، ރިޒްވާން 46؛ ކުލްދީޕް 3-40
އިންޑިއާ 244-4 (42.3 އޯވަރު): ކޯލީ 100، ޝްރެޔާސް 56؛ ޝަހީން 274
ވިރާތު ކޯލީގެ ސެންޗަރީއަކާއެކު، އައިސީސީ ޗެމްޕިއަންޝިޕްގައި ޕާކިސްތާނުގެ މައްޗަށް 6 ވިކެޓުން އިންޑިއާ ކުރިހޯދައިފިއެވެ.
ދުބާއީގައި ކުޅުނު މި މެޗުގެ ނަތީޖާއާއެކު އިންޑިއާއަށް ގާތްގަނޑަކަށް ސެމީފައިނަލްގެ ޖާގައެއް ކަށަވަރުވެފައިވާއިރު، ޕާކިސްތާނު އޮތީ މުބާރާތުން ކަޓާފާނެކަމުގެ ބިރުވެރިކަމެއްގެ ތެރޭގައެވެ.
މެޗުގައި ޓޮސް ދިމާވެގެން ޕާކިސްތާނުން ނިންމީ ކުޅެންއަރާށެވެ. އެގޮތުން ފުރަތަމަ އިނިންގްސްގައި އެ ޓީމުން ވަނީ 241 ލަނޑު ހަދާފައެވެ. މިއީ އެވަރޮޖްކޮށް ވަން-ޑޭ އިންޓަނޭޝަނަލް މެޗުގެތަކުގައި ހަދާ 258 ލަނޑުގެ އެވަރެޖަށްވުރެންވެސް ދަށް ސްކޯއެކެވެ.
ޕާކިސްތާނަށް އެންމެ ގިނަ ލަނޑުހެދީ 62 ލަނޑު ހެދި ސައުދު ޝަކީލް އާއި 46 ލަނޑު ހެދި މުޙައްމަދު ރިޒްވާންއެވެ. ނަމަވެސް މިއީ ސައުދުއަށް 76 އަދި ރިޒްވާންއަށް 77 ބޯޅައިން ހެދުނު ލަނޑުތަކެކެވެ.
އިންޑިއާއަށް އެންމެ ގިނަ ވިކެޓު ނަގައިދިނީ، 40 ބޯޅައިން 3 ވިކެޓު ނެގި ކުލްދީޕް ޔާދަވް އާއި 31 ބޯޅައިން 2 ވިކެޓު ނެގި ހަރުދިކް ޕާންޑިޔާއެވެ.
ޕާކިސްތާނުން ހޮވަން އެރުމަށްފަހު، އެ ޓީމަށް ލިބުނު އެންމެ ބޮޑު ހިއްވަރަކަށްވީ، 5ވަނަ އޯވަރުގައި އިންޑިއާގެ ކެޕްޓަން ރޯހިތު ޝަރުމާ ނުބައިކޮށްލުމެވެ. މިއީ ޕާކިސްތާނުގެ މޮޅު އުކުންތެރިޔާ، ޝަހީން އަފްރީދީ ވާތުން އެއްލި ނުރައްކާތެރި ބޯޅައަކުން ހޯދި ކާމިޔާބެކެވެ.
ނަމަވެސް ވިރާތު ކޯލީ ވަނީ އިންޑިއާއަށް މި މެޗު ފަސޭހަކޮށްދީފައެވެ. އޭނާ މި މެޗުގައި ހެދި ސެންޗަރީއަކީ، އޭނާގެ 51ވަނަ އޯޑީއައި ސެންޗަރީއެވެ. އަދި އޭނާގެ ލަނޑުތަކާއެކު، 45 ބޯޅަ ބާކީ އޮއްވައި އިންޑިއާއިން ވަނީ ޕާކިސްތާނު ބަލިކޮށްފައެވެ.
މި ނަތީޖާއާއެކު އިންޑިއާ އޮތީ ގްރޫޕްގެ އެއްވަނައިގައެވެ. އަދި ޕާކިސްތާނަށް މިވަނީ އެ ޓީމުގެ ދެ މެޗު ވެސް ގެއްލިފައެވެ. އަދި މިއަދު ނިއުޒީލޭންޑުން ބަނގުލަދޭޝް ބަލިކޮށްފިނަމަ، ޕާކިސްތާން މުބާރާތުން ކަޓައި، ސެމީގެ ފުރުސަތު ލިބޭނީ ނިއުޒީލޭންޑަށާއި އިންޑިއާއަށެވެ.